ROM NOK HATO ZAKYA POL LAIZA 7 - OTSAO BAIBEL (BSI)

Aju-asokya bama Wanlom

¹ Tüinaohom, hünzom pangnue wüi wanlom bama komle awanle ngokya daile, kue akax angkya bama hünzome awanüi le ongpu. Wanlome khünak to ozün ma ngopongma tata apünüi.

² Namthütba, kako tandaokya sheko tuita a wanlom ma, chix mazi tanto ma kakopa ma akungle kha thomle; ikoxle otue chix ziüihex, chix füi akungle khale thomkya she angkya wanlom khak-kha dakya ang achangpu.

³ Ikoxle ma kakopa ozün ma tüingale mama mix füi ngole jangchangba, she ang chinunchakkai cha le nyaküi, ikoxle hokakopa zi le jangchang thüikoxle, wanlom ma she a khale chithomkya mixcha tuita, ilaxle she mama lüka ma ating anokle changkoxlechu Ija a chinunchakkaikya münchang.

⁴ Ilailaile, o kutüi-kunaohom, keme Zang oziak opua dünle kox angkya hanpakma, hünzom mama mix kux, thüikoxle zidaokya chatle azünkya Zang kux ang achang ang, Khrista tsangtsa makhange wanlom ma hünzomchu omang ang achangpu.

⁵ Chemthüikoxle kem müi-hi-aji mongtex ma ngopongma, wanlom makhange chüile alaikya ochax lyense tsukya mongzoke kem tsangtsa ma mwot mok, ilaxle ochax hanpakma oziak opua dünle kox.

⁶ Ikoxlechu tix, amiba kem khale thomkya wanlom zi ilaxle ija khak-kha chak tokya kem dandaoa. Idaile keme zale thomkya ozang wanlom ma chichang homle, Chasa ma lomtang ozün ma keme Zang thothapu.

Wanlom hia Ochax

⁷ Jangchangba keme chemle thüiüi? Wanlom ochax changle le thüiüi hia? Ile otuechu münchang! Ibachu ku ang ochax apuale fakya a wanlom changle. Wanlome “Nüfux taxtüi”, le chithüi thüikoxba nüfux a chem hex kue chiawanse.

⁸ Ochax-e wanlom ma fe angkya onui ataklaxle, angünngün pangnu to nüfux dong angkya ku mongto chüi. Chemthüikoxle wanlom füi atsai laxle ochax a omang.

⁹ Noxta wanlom chilax homtoxle ku ozün ma ngokya, ikoxle otue wanlom hüipuix, ochax chatle azang ilaxle ku omang ang achang.

¹⁰ Wanlom ojae hünzom khüzün kox angkya hex, ijae ku a omang changle le ahole.

¹¹ Wanlom makhange mok angkya opong atak laxle ochaxe ku dyen; ile wanlom makhange ochaxe ku lang.

¹² Idaile chix po ma, wanlom a otsao, sukya tamchu müikya changle.

¹³ Ile thüikoxle müikyae ku zi ang koxle lehia? Ile otuechu münchang! Ikoxle ochax a ochax wüi changpu le aho ang, üntoxle ochax a onüi ang ochax changpu le ngün ang kox angkya hanpakma, oja müikya tüipuix, ija makhange ochaxe kuma zi angkya alai.

Khünak Mongkha to Alünkya

¹⁴ Keme wanlom a otsao changpu le awanle; ikoxle ku a ziün angkya khünak, ochax da ang hang daokya mix tuita changle.

¹⁵ Kue chem mokpuix kue münawan; chemthüikoxle kue mokse tsukya kue münmok; itülüi, kue chem thua anupuix, ija mix kue mokle.

¹⁶ Kue mokse chitsukya kue mokkya zuma, kue wanlom ma thaikya müntüile laxkya imjo ahole.

¹⁷ Idaile ija mwot mokkya a ku tomtata münchang; ikoxle ija a kuma ngokya ochax changle.

¹⁸ Ku ma müikya müntüile kue awan ngopu: Ija a, ku müi-hi-aji ma. Chemthüikoxle müikya mwot moksele tsukya kuma tüikoxlechu, kue ija mok ang müntho.

¹⁹ Kue müikya moksele tsukya münmok; itülüi, kue mokse chitsukya ochax mix mokle.

²⁰ Kue, mae mokse chitsukya mix mokle jangchang thüikoxle, ija makhange ija mokkya mix a ku münchangle ahole; itülüi, ija a kuma tüikya ochax changpu.

²¹ Idaile wanlom ijae mwot mokle ngokya kue apongle; kue otue müikya mokse tsupuix, kue chichangchizang-zang paile kople.

²² Ku kün-monge a Zang wanlom füi mongmüi le.

²³ Ikoxlechu kue ku tsangtsa ma mama wanlome mwot mokkya ngünle: ija a ku khangkae changle le laxkya wanlom füi azankya wanlom tuita changle. Ijae ku, ma tsangtsa ma mwot mokle ngokya ochax wanlom chak to kople thomkya mix tuita ang achangle.

²⁴ Oh! Ku otukux künmax mongshan ngokya mix hex! Ku zi angkya khato paole ngokya ija tsangtsa chak tokya ku owae azünüi?

²⁵ Kem Jowanpa Jisu makhange, Zang ang münchong fapu! Idaile kue kulualua to ku mong khato Zang wanlom thothale, ikoxchu müi-hi-aji wanlom thothale.