PONGWANG LAIPEX 8 - OTSAO BAIBEL (BSI)

Tinu-mualyem Ashukkya

¹ Ifüima Zang-e Noa hia chix füi tomle khua ma tüikya tsom-pom hia faomüibu texle atak. Zang-e chaxwannu tok ma zangwin awin ang tom ilaxle ti azop.

² Chaxwan thün angkya tümikbu hia zangding tokya watti dongkya okhabu thap ilaxle ding tokhange zangwat ti dütle ngokya thwon ang tom.

³ Ifüima chaxwannu tok angkya ti süzop-süzople zople pao. Hanpak nyix 150 lükya hansong füi tomle ti zuale tsuak.

⁴ Lyetjang anüt ma nyixbün anüt lükya to khua a Ararat haxnukho ma nazak.

⁵ Ti a lyetbün kople atungle wüi ngo. Lyetbün ma lyetkua owang nyixkha haxnukho haxthün ngün ang kop.

⁶ Nyix-punyi lükya hanhom ma Noa-e chixe zingkya khua thangmik daplaxle okha apao.

⁷ Ija okha a chaxwan thün angkya ti zuale machang machangle paotox-nguitoxle pile aham ngo.

⁸ Ifüima chaxwan thün angkya ti mazua-zuapuix awan ang chixe osu tuita danle apao.

⁹ Chaxwan thün pangnu khato wüi ti tüile ngokoxle ija osue chitingnui chiatak ikhoma khua hato wüi chatle ngui. Iningle chixe chix chak thüi üntoxle khua ma chix hato wüi chatle ngui ang tom.

¹⁰ Anaole chu nyix anüt tanle ngolaxle chixe ija osu khua angkya danle apao.

¹¹ Ija osu hansong ma chix hato chatle ngui, ilaxle ija osa tun ma athax ile pakkya olip pünchak tuita tüikya. Imakhange Noa-e chaxwan thün angkya ti zuale tsuakkya awanle lax ang kop.

¹² Ifüima chix mama nyix anüt tamtanle nui ilaxle osu danle apao. Izuma ija osa chix hato tamchichat.

¹³ Chemtue Noa zanglao 601 ma pongwang lükya lyetnu owang nyix nguile hüipuix, ifüi tomle chaxwan thün angkya ti zuale hüi.

¹⁴ Lyetkua anyi lükya nyixtsa anüt to chaxwannu zuale tsuak.

¹⁵ Ifüima Zang-e Noa ang thüi:

¹⁶ “Nang kakonu tamchu hünsa hwom hia hwom kakonu hwom koplaxle nang khua angkya thailax.

¹⁷ Nang füi tüikya zünmok: o-jux hia müibu tamchu alyangle ahamkya zünmok pangwüi khua angkya athailax ilaxle hwom chaxwannu awangle pu-tsa ang dankox.”

¹⁸ Ikhoma Noa-e chix kakonu, sasün hwom tamchu sasün hwom kakonubu koplaxle khua angkya thai.

¹⁹ Ilaxle müinüjen pangwüi, alyangle ahamkya zünmok pangwüi khua angkya mali makankanle lai.

Noa-e Tö Koxkya

²⁰ Ifüima Noa-e Jowanpa ang tötsap tuita tan ilaxle zanglom zom ma tsaokya müi hia o-juxbu kha angkya kop ilaxle ibu tötsap ding ma zokle ashunle tö kox.

²¹ Chemtue Jowanpae ija ongan müikya atumle laxpuix, chixe chix mongto thüi: “Khünak khoma hexle kue tamchatle haxtok to thuakzomle münchangüi; chemthüikoxle khünak mongjang a chix naosün ma tüitan tokhange wüi ochax changle. Kue hwondaokya ningle tamchatle ozün ma tüikya zünmok max ang müntomüi.

²² Chaxwannu tsünlole ngokya kople, küi-thwom angkya hia puamün zütle athün angkya hanpak tüiüi. Zangkong hia zangkham, tsonu hia zangwa, zangnak hia zangngai othuithuima ngoüi.”