PONGWANG LAIPEX 7 - OTSAO BAIBEL (BSI)

Tinu-mualyem

¹ Jowanpae Noa ang thüi: “Hünzom kako pangwüi koplaxle khua mongto noplax; chaxwannu tok ma ku mik-hu ma sukya nang tata tix atakle.

² Zanglom-zom ma tsaokya müi pangwüi oshem anüt pong, ikoxle mama chitsaokya müibu a oshem tuipong nang füi tomle khua ma laxlax toxlax.

³ Osabu chuwüi oli pangwüi hanshem anüt pong koplax. Ija a o-jux hia müi ibu pangwüi a chaxwannu tok ma tamchatle oli afikle atsat-atsün angkya hanpakma ile moklax.

⁴ Athax makhange nyix anüt mong ma kue zangwat ajoüi, ilaxle kue zingkya zünmok pangwüi amüt angkya hanpakma ija a nyix-punyi bama zangnak-zangngai chithwonle watngoüi.”

⁵ Ilaxle Jowanpae fakya kaxtom pangwüi Noa-e mok.

⁶ Chaxwannu ma tinu-mualyemle changpongma Noa a zanglao 600 nguile tüikya.

⁷ Chix üntoxle chix kakonu, ilaxle sasün hwom hia hwom kakonu hwom, khuanu mongto dongle tinu-mualyem ma chimaxle azang.

⁸ Zanglom zom ma chitsaokya hia tsaokya müi üntoxle o-jux oli pangwüi honu-hola honu-hola le,

⁹ Zang kaxtom lailaile Noa füi tomle khuanu mongto dong.

¹⁰ Nyix anüt füima tinu-mualyemle hüi.

¹¹ Chemtue Noa zangpua 600 changkya hex, lyetkua anyi angkya nyixbün-anüt lükya to haxmong tokya ti chaxwan tok to fuakle lai, ilaxle zangding tokya thokjao-thokle zangwat,

¹² ilaxle ojao chithwonle chaxwan tok ma nyix-punyi wün-punyi zangwatle ngo.

¹³ Ija nyix wüi Noa hia chix kakonu, sasün Shem, Ham hia Jafet hwom tamchu hwom kakonu hwom füi tomle khuanu mongto dong.

¹⁴ Hwom füi tomle, tsom-müi hia faomüi, chongkya hixkya pangwüi, tamchu o-jux oli pangwüi dong.

¹⁵ Zang kaxtom ningle, Noa füi tomle, zünmok pangwüi honu-hola honu-hola le khuanu mongto dong.

¹⁶ Noa tokfüi ma Jowanpae kotho chito khange khua ka hak.

¹⁷ Nyix punyi hanpakma chizangle tinu-mualyem ngo, ilaxle khua tinu tok to fuale chang ang müile ti zule hüi.

¹⁸ Ti a süzu-süzule zule pao, ilaxle khua a tinu tok to chwotle aham.

¹⁹ Tinu a haxhua atsuakyabu to ngaxchu wüi chwople zule hüi;

²⁰ ija tinu a haxhuabu to fakbün onüie jao kaile tsuale hüi.

²¹ Chaxwan tok angkya zünmok pangwüi zile pao: o-jux, müi, üntoxle khünak-mixsa pangwüi.

²² Chaxwannu tok ma zakdünle ngokya pangwüi zile pao.

²³ Chaxwannu tok angkya zünmok pangwüi Jowanpae amüt: khünak-mixsa, müinüjen, ilaxle o-nüjen pangwüi. Noa hia chix füi tomle tüikyabu tata khuanu ding ma chiamütle dantox.

²⁴ Hota boma nyixpunyi mong ma ti ojao chizople ngo.