PONGWANG LAIPEX 49 - OTSAO BAIBEL (BSI)

Jakop Okim Tsai-kax

¹ Jakop-e sasün hwom selaxle thüi: “Ku hama asoxhüi; athax füichi ma hünzom to chempangle changüihex ija kue wünfang:

² “Jakop sasün hwom asoxlaxle, hünpa Israel kax apahüi.

³ “Kusa tüichongpa Reuben, nang a ku janzüi changle; ku mixmüi ang changkya nao. Ku sasün hwom khakhama nang angamkya tamchu tsak-zongle tüikya mix.

⁴ Nang a tinu tichap ningle, ikoxchu nang akhokya le chichang, chemthüikoxle nang a ku dacha füi jipkya mix changle; nange hünpa lya wün ahaidaoa.

⁵ “Simeon hia Liwi nyi a tüita-naopa. Okhie ma chang-paxbu mix to chakmok ang twonle.

⁶ Hwom huxsa zangwün ma ku münwomüi, hwom katzua to kue müntsaüi. Mongtsiktsik ma hwome mix-lang; tsom-pom to chakmok-janlangkya hwome abaokya ang laxle.

⁷ Za-adünkya hwom mongtsik to othuak-ozom naxtüikox, üntoxlechu hwom mongtsik to. Kue hwom Israel haxtok awangle chiakle sam ang tomüi. Hwom kue hwom khünakbu khato paole sam ang tomüi.

⁸ “Judah, hüntüi-hünnao hwome nang to achuak-achenüi. Nange nang zanbu to dingkux ma fyetüi, nang tüita-naopa hwom nang chitong to akhuxüi.

⁹ Judah a mailang tuita ningle, chixe sax ang müi langlaxle longlua to chatlaxle ozax tinle jiple ngo. Chix to pox ang owa mongchu chichongtsuak.

¹⁰ Judah chak ma chongwang kiathox twonüi, ilaxle chix sixli hwome jento apün-adale ngoüi. Jat-libue chix hato süidünüi, ilaxle chix kax ma laxle akhuxüi.

¹¹ Chixe chix mansa grep zu ma fün, ataxle müikya ozu tuita ma a. Chixe chix nyizabu aji ningle khikya grepti-ju ma so.

¹² Grep ti linglaxle chix mik aji ningle khi, tsomti linglaxle chix wa thobokle tse.

¹³ “Zebulun a tinu kax to ngoüi. Chix fa a chongkya khuanubu hanpakma nazaknui ang changüi. Chix haxtok a Sidon alople tüiüi.

¹⁴ “Isakar a hünlix-püisütle jiple nazak ngokya, Tsakkya mantsak tuita ningle changle.

¹⁵ Chixe nazaknui müitüia le ngün, chaxwan-longkho chasa single ngün. Idaile hün dan angkya chixe tok-khya aho, ilaxle da tuita ningle atsangle amok.

¹⁶ “Dan a chix khünaknu lompa ang changüi. Hwom a Israel nok mama jat-libu ningle changüi.

¹⁷ Dan a tuita lommun angkya pu ningle changüi; lomkax ma ngokya oje füikya pu, ojae man chisok ma tule koxpuix, ija mankho ma ngakya mix tswon-wüt puix.

¹⁸ “Jowanpa, ku a nang khosün hanpak tanle ngopu.

¹⁹ “Gad to a ahuxmix othom tuitae singüi, ikoxle anongle chix mixe hwom achuale changüi.

²⁰ “Ashar chak makhange sütli huanuma alaiüi. Chixe wanghom tuitae saxkya sütling koxüi.

²¹ “Neptali a mongtex ma zikle aham ngokya müikhi ningle changpu, ojae tsaimüi-kaxmüikya zangwünkoplaxle tüipuix.

²² “Jusep a shuasa kax ma ngokya fao mantsak tuita ningle, haxhua tokya fao mantsaksa tuita ningle.

²³ Chix zanpabue chix to za-adünle sing, hwom hap-sanbu füi chix achuale zik.

²⁴ Ikoxlechu chix hapnu a shingmong lüwüi tüikya, ilaxle Israel nok long chunnyetpa tuita mün ma, Jakop Khüthak Zang chak füi, chix chak a tüle shingmongle tüikya.

²⁵ Nang to asunkya a hünpa Zang changle. Ija Khüthak Zang-e nang hato, ding tokya zangwat ajo, tamchu haxmong tokya tibu fuakle alai. Üntoxle tsom-pom hia su-sabu mohimanle pu-tsa ang tom.

²⁶ Saxziak hia maipuabu mohiman tüikya, kaipongkya mohiman haxnubu Mongzaozekya haxnu angkya jali ibu, mohiman ibu Jusep khang ma paxle naxngo, hotüi-honao hwom füi ajankya tuita khangpong ma a.

²⁷ “Benjamin a tüle shixkya shwon tuita changle, swompui hansonge chixe langüi ilaxle joküi.”

²⁸ Ibibi pangwüi Israel homjen 12 changle, ilaxle ibu a, sasün hwom pangnusa ang, hwom füi ashemkyakya kaxzexle wünzua kaxtsuak pongma hopae akaxkya kax changle.

Jakop Zikya hia Akhünkya

²⁹ Ifüima Jakop-e sasün hwom ang kaxtom koxle thüi: “Athaxpi ku a mamix hwom füi lumchi to tom angkya hanpak nguile hüipu. Ku a apu-apa hwom füi tomle,

³⁰ Kanan haxtok ma Mamre zongma handünchi Makpelah ma Hit sün Efron haxtok ma tüikya longlua ma zuhüi.

³¹ Ija kha a hwome Abraham hia Sarah nyi mang akhünkya kha changkya. Ikhama hwome Isak hia Rebika nyi akhün, ilaxle kue Liah chuwüi ikhama akhünpu.

³² Ija haxtok hia ikhama tüikya longlua a Hit nok ma shakle kopkya changle. Ku chu ikhama wüi zuhüi.”

³³ Chemtue Jakop-e sasün hwom zün-saikya kax ashukle changpuix, chix chatle lya ma shui üntoxle zile pao.