PONGWANG LAIPEX 38 - OTSAO BAIBEL (BSI)

Judah hia Tamar Nyi

¹ Ipongma Judah a hotüi-honao hwom dantoxlaxle Adulam nok angkya mixsün Hirah hato ngo ang pao.

² Ikhato Judah-e Kanancha, Shua le amünkya mixpa sacha tuita apong. Chixe she a ma kakonu ang apüi.

³ She-e chix ang Er le amünle sasün tuita puxle kox.

⁴ She ma chatle chuwüi nao nguidongle sasün tuita pux. Ija nao ang Onan le amün.

⁵ Anaole chuwüi she-e sasün tuita pux. Ija nao ang Shelah le mün kox. Ija naosa ngün pongma Judah a Akzib ma tüikya.

⁶ Chix sasün tüichongpa Er hanpakma Judah-e she tuita Tamar le amünkya atak.

⁷ Er zanglom-saikha ojao chimüi. Ijae Zang ang mongma adün. Ikhoma Jowanpae chix lang.

⁸ Ifüima Judah-e Er honao Onan ang thüi: “Donglaxle hünnachong füi jiplax. Nang a she lüka honao, she zongto sangmütpa tuita daile, tamchu olom ma hüile ngoünkoxle, hüitüi ang sixli alaile laxkox.”

⁹ Ile changkoxchu naosom a chixsu chixsa ang chilaxüi le awanlaxle, chemtue she füi jip-pomle changpuix, hotüi hanpak ang sixli chitüile naxchang ang Onan-e chix oti otok to alyet.

¹⁰ Chixe ile hwonkya Zang zongto chimüikya tuita ang achang, ikhoma Jowanpae chix chuwüi zile pao ang tom.

¹¹ Ifüima Judah-e chix nomcha Tamar ang thüi: “Ku sacha Shelah tsongkya tan ang nang hünpa hato chatle ngolax.” Chixe ija a, Shelah chuwüi hotüi hwom lailaile langle nak awütle zalaxle hwonkya changle. Ikhoma Tamar a hopa hwom hom to chatle ngo.

¹² Ifüima alüile chingo homtoxle Judah kakonu zile pao. Chemtue chixe mangsopkya mongma zakle changpuix, Adulam a chix zuikhui Hirah hokhi Timnah to pao. Chix chunbu ikhato tüikya.

¹³ Tamar hama she hohochong, chix chunmun züt ang Timnah to hüi angkya ta le wünle kox.

¹⁴ She-e awunle ngokya chunmun nyi-za lüi; thün-khung nyie she thün to alu ilaxle Timnah to leüi lom ma tüikya Enaim lompong ma thungle ngo. Judah sasün naoshukpa Shelah mixmüi ang achangle tsongle hüikoxle ngaxchu athax kople hokhi ating-anokle chang ang apong-ataile mafa.

¹⁵ Chemtue Judah-e she ngünle laxpuix, chixe she a ma tsangtsa hangkya mixcha tuita changüi le thüt, chemthüikoxle she-e thün to khungle thom.

¹⁶ Lommun ma chix she hato hüilaxle atüi: “Müidaoa! Obi pong saxlaxpu?” (chixe ija a ma nomcha changle le chitik.) She-e lan: “Nange ku ang chemfaüi?”

¹⁷ Chixe lan: “Kue nang ang ku zwon kha angkya zwonsa tuita ahüifang.” She-e lan: “Müiüihex! IKoxle nange ku hato nang zwon ma-ahüi tanto, kaxshing kopkya ang chang ang, nange ku ang tütali thüichu tox angkya wüi!”

¹⁸ “Ikoxle kue kaxshing kop ang chem dantoxüi?”, le chixe atüi. She-e lan: “Ozu füikya nang shintop ilaxle nange kople ahamkya kiathox, ibibi toxlax.” Chixe ibu she ang koxle tox. Ifüima hokhi tomle jip le she ma nao atüi.

¹⁹ Tamar a hom to chat, she thün-khung nyi sik ilaxle ma zomnu nyi-za chatle lax.

²⁰ Ija mixcha hato zwon apüile tox ang tamchu kaxshing kop ang toxdaokya chix mwot-katbu lax ang Judah-e chix zuikhui Hirah tomle apao. Hirah thoma ija mixcha hom ma chibang.

²¹ Chixe Enaim nok owawa ma atüi: “Ikha angkya tsangtsa hangle ngokya mixcha omaünpuix?” Hwome lan: “Ikhama tsangtsa hangkya mixcha jaojao münngo.”

²² Chix Judah hato chatlaxle thüi: “Kue she münataktsuak. Ekha tokya khünakbue pi ikhato tsangtsa hangkya mixcha jaojao münngo le thüile.”

²³ Judah-e thüi: “Ibu mwot-kat she-e wüi makux angle naxthomkox. Owawae kem chanyi koxle wüi münmüiüi. Kue she ang otha thom ang lompu, ikoxle nang thoma she chibang.”

²⁴ Lyet azom tukux füima owawae Judah ang thüi: “Nang nomcha Tamar tsangtsa hangkya mixcha tuita ningle ngolaxle athaxpi she ma naotüiüna.” Judah-e kaxkox: “She kotok to alailaxle zokle langdao.”

²⁵ Chemtue she kotok to alaile changpuix, she-e hohopa hato ija kax hole achat: “Ku ma tüikya ija zu hia kiathox owa kux changkya hex, hukoplax. Ku ma nao atüikya a, ibu tuina hopupae atüikya changpu.”

²⁶ Judah-e ibu chix kux changpule awanle lax üntoxle thüi: “Kue she ku sasün Shelah füi ating-anokle chang ang kang koxdaose changkoxa. She wüi münthai, ku wüi thaidaongüna.” Ifüima Judah she füi tomjip-tompom le chichang.

²⁷ Chemtue she ang nao ngün angkya hanpak ngangle hüipuix, she ma nao apyet le tüikya awan ang kop.

²⁸ Nao ngün ang kakkya zuma tuitae chak alai. Naotan mixnubue ija ma zükhik füi khakle kop. Hwome thüi: “Owang ma puxkya nao a ija changle.”

²⁹ Ikoxle ija naoe chix chak chatle adün ilaxle ata nao wüi thoma ngün. Ija ma naotan mixnubue thüi: “Nange nang lom ile jamle laxpia!” Idaile chix ang Perez le mün kox.

³⁰ Ifüima honao chak ma zükhik füi khakdaole pux, ilaxle chix ang Zerah le mün kox.