PONGWANG LAIPEX 35 - OTSAO BAIBEL (BSI)

Bethel ma Jakop to Mohiman

¹ Zang-e Jakop ang thüi: “Kangmomlax, Bethel to paolax ilaxle ikhato ngolax. Ikhato ku ang tö-tsap tuita tanlax. Ku a, nang hüntüi Esau thoto paole azang pongma nang füi apongkya Zang changpu.”

² Ikhoma Jakop-e hwom homkha tamchu hwom füi tüikya khünak pangwüi ang thüi: “Hünzom ma tüikya mixnok baozangbu awütdao üntoxle ma alüile atsaole changlax üntoxle hünzom nyizabu lüilax.

³ Ifüima kem pangwüi Bethel to donghax. Ikhato kue Zang ang tö-tsap tuita zaile kox angkya changle. Chix a, ku khosam ma tüipongma ku zangjop to lankya Zang tamchu ku apaopao pangnu khato ku füi ngole hüikya Zang changpu.”

⁴ Ikhoma hwome ma ma atüitüi mixnok baozangbu komkaile Jakop chak to kox, ilaxle hwom na angkya nasaxbu wüi sukle kox; ilaxle ibu pangwüi Jakop-e, Shekem zui ma tüikya Ok pünnu tong ma khomle tox.

⁵ Hwom lomba to ahamle tüipongma, hwom akhople tüikya tingnu pangnu khato wüi, khünaknu hato za angkya ahüi, ikhoma hwom to owaechu achuale chichang.

⁶ Ma khünaknu pangwüi koplaxle Jakop a Luz to ngui. Ijongkha ang anyix a Bethel le nyakle. Ija a Kanan haxtok ma changle.

⁷ Chixe ikhama tö-tsap zailaxle ijakha ang Bethel angkya Zang mün to nyak, chemthüikoxle chix hotüi Esau thoto paole azang pongma, Zang ikhama chix lailai to chix hato ngaile aho.

⁸ Rebika dacha Deborah zile pao. She a Ok pünnu fang ma, Bethel zongma shuathongchi ma akhün. Idaile ikha a “mangsopkya Ok pünnutong”, le nyak.

⁹ Chemtue Jakop Mesopotamia nok tokya chatle chatpuix, Zang chix hato ngai ilaxle chix to mohiman.

¹⁰ Zang-e chix ang thüi: “Nang mün a Jakop changle, ikoxlechu athax makhange nang mün a Israel le changüi.” Ile Zang-e chix ang Israel le mün kox.

¹¹ Ilaxle Zang-e chix ang thüi: “Ku a Khüthak Zang changpu. Susa hwom huanuma alailax. Hwom makhange jat-libu tüle laiüi, ilaxle nang a wanghombu putong ang changüi.

¹² Kue Abraham hia Isak nyi ang koxkya haxtok nang ang koxüi, ilaxle nang tokfüi ma ija haxtok nang sixli hwom ang koxüi.”

¹³ Ifüima Zang-e chix danle tox.

¹⁴ Zang-e chix füi zangwünle changkya khama Jakop-e münwan ang long athün ilaxle ija to grepti-ju hia olip müngae lile atsao.

¹⁵ Chixe ijakha ang Bethel le nyak.

Rachel Zikya

¹⁶ Jakop-e hwom kako pangwüi Bethel to dantoxlaxle achex, ilaxle hwom a Efrath alop haxkhakha ma tüipongma, Rachel ang nao ngün angkya otu nguile hüi ilaxle she a tüle nuzaole sikngün.

¹⁷ Chemtue she nuzaole sikngün ngopuix, ipongma dachae thüi: “Rachel, nang taxza, ija a mama sasün tuita changle.”

¹⁸ Ikoxle she a zitho lüjao max, ile she zakthomüima ija nao ang she-e Benoni le mün koxle tox, ikoxlechu hopae chix ang Benjamin le mün kox.

¹⁹ Rachel zikya zuma, she a Efrath lomnu zui ma zu; ijakha ang athaxpongma Bethlehem le nyakle.

²⁰ Jakop-e ikhamachu münwan long athün, ijae anyix kople ikha a Rachel zukting changle le ahole.

²¹ Jakop ikha angkya achexle pao üntoxle Edar longhom akailaxle tachi ma chix pom zai.

Jakop Sasün Hwom

²² Jakop ikhato ngopongma, sasün Reuben-e chix dacha Bilhah füi chinunchakkaile chang; ija atatlaxle Jakop ang tüle mongtsik. Jakop ang sasün hwom 12 tüikya.

²³ Liah sasün hwom a Reuben (Jakop sasün tüichongsa jao), Simeon, Liwi, Judah, Isakar, ilaxle Reuben, hwom bibi.

²⁴ Rachel sasün hwom a Jusep hia Benjamin nyi.

²⁵ Rachel dacha Bilhah sasün nyi a Dan hia Neptali nyi.

²⁶ Liah dacha Zilpah sasün nyi a Gad hia Ashar nyi. Naosom ibibi a Mesopotamia nok to pux-paikyabu.

Isak Zikya

²⁷ Jakop, hopa Isak hato Mamre to pao. Hebron zui angkya ija Mamre a Abraham hia Isak nyi ngwotnui jao changkya.

²⁸ Ipongma Isak a zanglao 180 tsünlole ngolaxle

²⁹ owüiole azule tix chix zi; ilaxle sasün Esau hia Isak nyie chix mangzu.