PONGWANG LAIPEX 32 - OTSAO BAIBEL (BSI)

Jakop-e Esau füi Apong ang Achwon

¹ Jakop hwom hom to chatle ngopongma, kaxtaimixbu chix füi apong.

² Chemtue chixe hwom ngünle laxpuix, chixe thüi: “Ija a Zang pom changpu.” Idaile chixe ikha ang Mahanaim

³ Edom nok to hotüi Esau hato achale Jakop-e kaxhomix awün.

⁴ Chixe ibibile wünlaxo lükya tsai-kax apuale chix ang thüi: “Ku, Jakop, nang kaxkax ma laxle tüikya da-e, ku hopunu Esau hato kaxho fapu; ku a Laban hom to ngolaxle athax kople chat ang chitsuakle ngole hüidaoa.

⁵ Ku ma tsom-pom: mantsakbu, chunbu, zwonbu, üntoxle dabu huanuma tüile. Kue nang chingcha lomle, tüta küntsik-mongmakya taxtüiünfa le tsaiju-kaxjule kaxho ahüi ngopu.”

⁶ Kaxhomixbu chatlaxle Jakop ang thüi: “Kwom hüntüi Esau hato nguile toxdaoa; chix a nang füi apong ang hüile ngole. Chix füi tomle khünak 400 jao tüile.”

⁷ Ija atatlaxle Jakop a abünle za. Chixe chix khünakbu othom anyi ang achangle ahan; ija ningle chix müi: chun, zwon, maihu hia utbu chuwüi ahan.

⁸ Chix mongto thüt: “Esau nguilaxle pongwang angkya othom to single changkoxchu mama othom tuita a paole azang ang thoüi.”

⁹ Ifüima Jakop-e zangjop: “Ku apu hia ku apa Isak nyi Zang, ku kax to apahüi! Jowanpa, nange ku ma chaxwan to mamixbu hato chat angkya akaxpu, ilaxle ija a ku hanpakma omüimüi angwüi changüi le akaxpu.

¹⁰ Ku nang dapa a nang chingcha hia mongkün atak koxle ojao chiasukya khünak changpu. Kue Jordan shuanu tale changpongma chemchu chitüile chak-hua ma kiathox tata füi tale lepu, ikoxle athax ku, khünak hia müi othom anyi achangle ahanle pu-tsa laxle chatpu.

¹¹ Atüi Esau chak tokya nange ku khosünfa le kue joppu. Kwom sheko hia naosom hwom to lünle pangwüi amüt ang chix a kwom zan to kale tüile le ku a müimamale abüt-abanle tüile.

¹² Nange ku ang, pangnu müile hüi angkya tamchu owaechu akiak ang chithole shuanu kax angkya fixtsang büta kusix-kuli lai ang koxüihex-ole tsaokya nang kaxtsao texle atak-hüi.”

^13-15 Ija ja chix ikhama pom ilaxle chix tuina kha angkya hotüi Esau ang kox ang, chix hingho ang ibibile süile kop: Zwonunu 200 ilaxle zwonpongpong 20; chunnunu 200 ilaxle chunlala 20; ut honunu 30 füi hosabu; maihu hununu 40 ilaxle hupongpong 10; mantsak honunu 20 ilaxle olala 10 ibibi.

¹⁶ Ibu pangwüi chixe chix dabu chak to zyempong-zyempong ang achangle ahanle kox, ilaxle hwom ang thüi: “Hünzom ku thoto achale leün ilaxle hünzom othom-othom bama oba toxle changkox.”

¹⁷ Tunpa angkya füi chixe ile akax: “Chemtue atüi Esau apongle ‘hünzom owa kux tamchu ochichi to le angkya?’ le atüikya zuma

¹⁸ hünzome, ‘Ibu a nang da Jakop kux changle; ibu a chix hopunu Esau hato hingho ang ahüikya changle, ilaxle chixchu kwom füifüi ma hüile tüile’ le lan angkya changle.”

¹⁹ Chixe othom anyi-lükya, azom lükya ilaxle ifüima hüile ngokya othom pangnusa angwüi, ilailaile lan angkya anole kox. Tamnüilechu füifüima chix hüile tüikya apua angkya akax.

²⁰ Chemthüikoxle chix mongto: “Kue thochito achale alyetkya hinghobue chix mong anom-anaile chang ang thoüi, ilaxle kue chix jao apongkya zuma, chixe ku mongmüile pongkopüi”, le chixe thüt.

²¹ Idaile chixe chix hingho-chaktwon thochito achale alyet, ikoxle chix a ija ja pom ma wüi nuile tox.

Peniel ma Jakop Ashingkya

²² Ija ja zangnak ma wüi zolaxle, hosheko nyi, chix dabu ilaxle sasün hwom 11 tüikya komle laxlaxle Jabbak shuanu tale le.

²³ Hwom pangwüi shua atale changkya füima chixe tuinabu chuwüi bakle ata,

²⁴ ikoxle chix a hwom füishuk to chix tata ngo. Ifüima zangngaiüi khakhama mixsün tuita nguilaxle chix füi alople ashing.

²⁵ Ija mixsüne, chixe münlüttsuaküi laxle le ngünkya zuma, chixe Jakop to ke ma chietle kemik adox ang tom.

²⁶ Ija mixsüne thüi: “Athaxpi zangngaitu nguile hüile, ku pao ang danfa.” Jakop-e lan: “Nange ku to mohimanle machang tanto kue nang mündan.”

²⁷ Ija mixsüne atüi: “Nang mün chemle changkya?” Chixe lan: “Ku a Jakop changpu.”

²⁸ Ija mixsüne thüi: “Athax nang mün a Jakop le münchangüi. Nang Zang füi tamchu ku füi ashingle changdaoa ilaxle nange wüi anaodaoa; ikhoma nang mün a Israel”

²⁹ Jakop-e lan: “Athaxpi nang mün apuahüi.” Ikoxle chixe lan: “Nange ku mün chemle thüi ang awanse tsupu?” Ifüima chixe Jakop to mohiman.

³⁰ Jakop-e thüi: “Kue thün-khang asaole jao Zang ngün ang kopdaoa, ikoxlechu athax kople ku ozün ma ngopu.” Ikhoma chixe ijakha ang Peniel le nyak.

³¹ Jakop Peniel dantoxlaxle achex pongma zanghan dongle changdaokya; ilaxle chix a ke adoxkya khoma faifai le aham.

³² Jakop-e ketui ma thomzün apongle changkya khoma, anyix kople Israel sixli hwome kemik angkya müi ohak münsax.