PONGWANG LAIPEX 31 - OTSAO BAIBEL (BSI)

Laban Hom angkya Jakop Pao

¹ Laban sasün hwome “Jakop-e kem apa kux pangwüi laxdaoa. Chixe tuina ibu pangwüi kem apa kuxkux wüi kopkya changpu”, le akaxkya Jakop-e atatlelax.

² Tamchu Laban-e chix to amipongkya ningle mik-hu müile chichangkya Jakop-e ngün ang kop.

³ Ifüima Jowanpae Jakop füi akax: “Nang hünpu-hünpa hwom haxtok to mamixbu lomle chatlax üntoxle ku a nang füi tüile.”

⁴ Idaile Jakop-e chix chunbu nyele ngokya zang kotho to Rachel hia Liah nyi sele kat.

⁵ Chixe hokhi ang thüi: “Hünpae amipongkya ningle ku to mik-hu müile chichangkya kue ngün ang kople. Ikoxlechu ku apa hwom Zang ku füi ngole tüile.

⁶ Kue hünpa to zongbakle fongle hüikya hünkhie ngünle hüipu.

⁷ Ikoxle ngaxchu hünpae ku dyen ilaxle chixe otha koxüi thüikya othom bün ma lüixchüix le ngo. Ikoxlechu chixe ku to chakmokle chang angkya Zang-e chidan.

⁸ Chemtue Laban-e, ‘zwonbu zazathuakle atüitüi nang hingchak mün hex-o’ le thüipuix, izuma chunbue zazathuakkyakya pux.

⁹ Ile hünpa kux kha angkya tsom-pombu tswonle paolaxle ku kux ang koxdaoa.

¹⁰ “Chunbu atu-amai tue kue tam wünmang chito, chun onubu ding to ngakya chunlabu abakle tit-tit-lokya, toptopkya, zazathuakkya tamchu tumtumtak le zakyakya wüi hexta le ngün.

¹¹ Wünmang chito Jowanpa kaxtaimix tuitae ku füi akaxle thüi: ‘Jakop, hule koplax;

¹² honu ding to ngakya chunlabu pangwüi tit-tit-lole, zazadüt le, tamchu tum-tum-tak le zakyakya wüi changle. Laban-e nang to hwonkya ngünlaxle kue ile chang ang tompu.

¹³ Ku a Bethel ma nang hato ngaikya Zang changpu.’”

¹⁴ Rachel hia Liah nyie Jakop kax to lan le thüi: “Kem ang apa hwom angkya kopse lükya chemchu müntüi.

¹⁵ Chixe kem to püntüi ningle hwonle. Kwom chixe hangpu, ilaxle athax a kwom mün to kopkya ngun-syen bakdao tüikox angpu.

¹⁶ Zang-e apa ang tuina chemtukux koxle tüipuix ibu pangwüi kemkux tamchu kemsu-kemsa hwom kux changpu. Zang-e chemle akax daolaxpuix ija ningle mokle le-kox!”

^17-18 Idaile Jakop Kanan haxtok tokya hopa hwom hato chat ang achwon. Chixe ma kakonu hwom tamchu naosom hwom utbu khoma angatle lax ilaxle chix tsom-pombu komle thochi ma shwomlaxle achex. Mesopotamia haxtok ma chixe kop-lole changkya tuina komle chixe kop.

¹⁹ Laban a chix chun munbu züt ang kale asu, ile chix chitüi pongma, hwom homkhae shwomle ngokya hopa kux chapa Rachel-e ahuxle kop.

²⁰ Hwom pao angkya apuale chitoxkya ma Jakop-e Laban dyen.

²¹ Chixe ma tuina komkaile koplaxle nonokhaile achexle pao. Eufrat shuanu tale le füima Jakop-e Gilid haxtok haxhua chitole ang süt.

Laban-e Jakop Achua

²² Nyix-azom homkya füimatix Laban hama Jakop pakya wünle kox.

²³ Chixe ma khünakbu koplaxle Jakop füito achuale zikle nyix-anüt füima Gilid haxtok haxhua chito hwom hama alop.

²⁴ Ija ja wünmang chito Laban hato Zang ngailaxle thüi: “Nange Jakop to aza-anale taxchang.”

²⁵ Jakop-e haxnukho ma chix pom tuita zai, ija füi atale Gilid haxsha ma Laban-e hwom pom zai.

²⁶ Laban-e Jakop ang thüi: “Nange ku büthüikoxle dyenle toxpu? Ku sacha hwom zandabu kopkya ningle chemkhoma tswonle paopu?

²⁷ Ile pao angkya ku hama ngaxchu chiwüntoxle nang ahuxle paopuix nyi? Nange ku hama wünlaxle paopuix thüikoxle, mongmüi-pwonla atungle tsai-lwom ngaole hia thuaput-waxmaibu mütle kue nang zunle toxse.

²⁸ Nange ku ang kusu hwom füi tun-apongle chang ang ngaxchu chitom ilaxle kusa hwom füi wünzua kax akax ang ngaxchu chitom. Ija ningkya mwot a ongat mwot changpu!

²⁹ Kue nang to tüle chu hwontsuakse, ikoxlechu awün wünmang chito hünpa hwom Zang-e nang aza-anale chichang angkya kaxkhün koxle ku füi akaxdaoa.

³⁰ Nange chat-sele hom sung laxle ku ha angkya laile paokya changpule kue awanle, ikoxle kwom homkhae shwomle ngokya chapa nange chemthüi ang ahuxle pao?”

³¹ Jakop-e lan: “Nange hünsa hwom ku füi ja nang naktomfa le ku zakoxa.

³² Ikoxlechu ikhama owawae nang homkhae shwomle ngokya chapa koplaxle ngokya mix jangbang, ija khünak a mik max ang tom angkya wüi changle. Ikhama ku khünakbu ngünmixbu ang tüipongma, nangkux nangka lomlax.” Hopa homkha angkya chapa Rachel-e ahux laxle tüikya Jakop-e chitik.

³³ Laban nguilaxle Jakop pomkha bakle lom, ifüima chix Liah hia she dacha nyi pom to ngui ilaxle bakle lom ikoxlechu ija chapa chiatak. Ifüima chix Rachel pom to ngui.

³⁴ She-e hopa hwom hom tokya chapa ahuxle kopkya sholaxle tüikya ut hün nyitsong tuita dingma Rachel thungle tüikya. Laban-e pomkha bakle lom, ikoxlechu ija chiatak.

³⁵ Rachel-e hopa ang thüi: “Apa, ku füi mong taxma, ku nang pomtho ma ajong ang münmüi, ku ang tsangtsa male asule.” Laban-e bakle lom ikoxlechu chix chapa chiataktsuak.

³⁶ Oshukma Jakop ang mongtsikle shu, ilaxle thüi: “Kue chem-müt kopdaopu? Nange ku ipongpongle tung angkya kue nang wanlom chem amadaopu?

³⁷ Athax nange kutüi-kunao komle alütle ipongpongle lomdaoa, ikoxle nang homkha angkya jali ija changpule nange chem atak? Atak le jangtüiba ikhama, nang khünakbu hia ku khünakbu noke ngünle danhu; hwome künyi bama opupu thaipuix fünle naxfa.

³⁸ Nang füi ngokya ku zangtsa nguile hüipu, nang chun hia nang zwonbu chitsa chilwon le otuechu chitüitox, ilaxle kue nang chun hosa chemtuechu kople saxkya nox chitüitoxpu.

³⁹ Chemtue chun tuita faozan chak to maxle changüihex, ija maxkya olüix kue wüi tsangthompu. Kue iningkya tsai-kax, ku thaikya münchanghex-ole aho ang chemtuechu nang hama wünle chichang. Zangnak ma ahuxkya wüi changlax chichangba zangngai ma ahuxkya wüi changlax, chem maxpuix ija tha kukue wüi thomle hüipu.

⁴⁰ Obithomthom ma hexle ku to anyixningle zanghannue huakle langpu ilaxle awünningle zangkonge zile, jipkox mikngüt ojao chihüi le fuxtsüile nuzao hüipu.

⁴¹ Ledaokya zanglao tsa ku nang hom ma ngole hüipu. Hünsa naocha anyi shak ang kue zanglao 14 nang hom ma nang mwot mokle koxpu, ilaxle zanglao azok a nang müibu to humele ngole hüipu. Ikoxle nange ku ang kox angkya otha othom bün ma lüixchüix le hüipu.

⁴² Ku apa Abraham hia Isak hwome Zang ku füi chitüi thüikoxba, nange ku chemtue wüi chak-hua ma apaodaose wüi changtüi. Ikoxle Zang-e ku sikngün hia ku mwot ngünlelax ilaxle müja chixe chix kaxfün nang hato angaile fapu.”

Jakop hia Laban Nyi Tsaotsüt

⁴³ Laban-e Jakop ang thüi: “Ibu shekobu a kusa hwom changle; hwomsu-hwomsa hwom a ku hanpak changle, ilaxle ibu müibu chu komkaile ku kux changle. Otsingtomtata nange ikhama angün-ngün komle ku kuxkux wüi. Ikoxlechu kue kusa hwom tamchu hwom su-sa hwom kople thom ang chemchu chimok tho koxle,

⁴⁴ kue nangfüi tsaotsüt tuita thomse tsupu. Oman, künyi bama Tsaotsüt laxkya münwan ang long athünhax.”

⁴⁵ Idaile ija tsaotsüt tsaikhax-kaxkhün ang lax ang Jakop-e long athün.

⁴⁶ Chixe chix khünakbu ang longnubu apüile athün angkya kaxtom kox. Ifüima hwome ija longthün hama fongsax.

⁴⁷ Ikha ang Laban-e Sahadutha, le nyak ikoxle Jakop-e Galid le nyak.

⁴⁸ Laban-e Jakop ang thüi: “Ija longthün a künyi monyi hanpak ang tuita tsaikhax-kaxkhün ang ngoüi.” Ikhoma ikha ang Galid le nyak.

⁴⁹ Chatle chu Laban-e thüi: “Tata füi atsaile ngopongmachu kem to Jowanpae hule naxngo.” Ikhoma ikha ang Mizpahlechuwüi nyak.

⁵⁰ Laban-e ile chuwüi thüi: “Nange kusanyi to chimüile hwon ilaxle mama sheko owawa tamlax le jangchang thüiningle, kue ibu awan ang chikop, ikoxlechu Zang-e kem to hule ngokya texle ataklax.

⁵¹ Ikhama kue longnubu athünkya longthün künyi bama münwan tamchu Tsaotsüt texle atak angkya hanpak ang tüile.

⁵² Longthün pangnyi wüi tamchu longküikya a ibu texle atak angkya hanpak changle. Ija longthün akaile ku nang zan to münka, ilaxle nang chuwüi ija longthün hia longküikya nyi akaile ku zan to taxka.

⁵³ Abraham hia Nahor hwom Zang-e künyi bama kaxfün fa angkya changle.” Ifüima Zang owa to hopa Isak-e shwompuix, chix mün ma, ija Tsaotsüt otya ma thomüi le Jakop-e tsaotsüt.

⁵⁴ Chixe müi tuita lang ilaxle haxhua to tö ang ija kox ilaxle ma khünakbu fongsax ang se. Hwome fongsax füima ija ja haxhua to zang angai.

⁵⁵ Ngainop ningle swomsa ma Laban-e hosu hwom füi tun apong ilaxle sasün hwom füi hox-jo le tsaitsuak-kaxtsuak laxle hom to chat.