PONGWANG LAIPEX 26 - OTSAO BAIBEL (BSI)

Isak a Gerar ma Ngo

¹ Kaitanto Abraham tsün to ledaokya boma athax chuwüi tuinu-nuaknu le. Filistia wanghom Abimelek hato Isak Gerar to pao.

² Jowanpae Isak hato ngailaxle chix ang thüi: “Ijip nok to taxka ikoxle kue nang hama ahokya haxtok ma ngolax.

³ Eja chaxwan to nang wünpa tuita ningle ngolax ilaxle ku nang füi tüile. Kue nang to mohimanüi, chemthüikoxle kue nang ang tamchu nangsix-nangli ang haxtok ibu pangwüi kox angkya changle. Ile kue hünpa Abraham füi tsaotsütdaokya ningle mokle wüi shu angkya changle.

⁴ Kue nang sixlibu ding angkya lyettsi büta lai ang tomüi, ilaxle nang sixlibu ang ibibi haxtok komkaile koxüi. Chaxwannu angkya jat-libue ma hanpak ang mohiman, nangsix-nanglibu makhange tix koplaxüi;

⁵ chemthüikoxle Abraham-e ku kax ma laxle chix ang fakya ku wanlom hia kaxtombu changle thom ang thodaoa.”

⁶ Ikhoma Isak a Gerar ma hom-hax zinglaxle ngo.

⁷ Chemtue ikha tokya khünakbue chix kakonu bama atüile changpuix, chixe thüi: “She a kunao changle.” Rebika a tüle osün müikya mixcha tuita changle le ngünlaxle, she khokho ma chixe mik max angkya nakatak le zalaxle chixe ile atse angkya lai.

⁸ Isak ikhato müimamale ngole hüikya füima Filistia nok wanghompa Abimelek-e thangmik tuita makhange hule changpongma Isak-e ma kakonu Rebika to künle kopkya ngünle lax.

⁹ Ikhoma Abimelek-e Isak sele apüilaxle atüi: “Rebika a nang kakonu changtüi ngün! Ingale ‘She a kunao changpu’ le nange büthüikoxle akax?” Isak-e lan: “She khokho ma kue mik max angkya nakatak le zalaxle kue ile thüikya changkoxa.”

¹⁰ Abimelek-e thüi: “Nange ija chichangkya hwonpu. Ku khünak owawae nang kakonu to twon-jao le chang koxba, ija thaikya a nang khangkho ma wüi düt-se.”

¹¹ Idaile Abimelek-e khünaknu ang kaxkhün koxle akax: “Owawae ija mixsün kakonu to twon-jao le jangchang thüiningle kue chix langüi.”

¹² Isak-e ija haxtok ma manzai ilaxle ija zangpuapua mawüi, amipongkya to othom hoponge nüile puamün ang kop.

¹³ Jowanpae chix to mohimanle chix a saxpu-luawang ang achang. Ile chix okop-olwot ma süchong-süchongle tüle tüi-nangkya mix ang achang.

¹⁴ Chix a chun, maihu hia dabu huanuma tüi-nang le hwom homkha pu-tsale changkya ngünlaxle Filistia noke Isak to miktsak ang süt.

¹⁵ Ile hopa Abraham tsün towüi chix dabue thole alaikya tüküibu to ibue hax füi tix.

¹⁶ Ifüima Abimelek-e Isak ang thüi: “Nang a kwom to kaile jao ahak-aluaüna. Athaxpi kwom haxtok dantoxlaxle paolax.”

¹⁷ Ikhoma Isak-e ikha dantoxlaxle onox ma Gerar haxsha ma athong-anale ngo.

¹⁸ Ami Abraham tsün towüi thole toxkya tüküi, chix zikya füima Filistia noke tixle changdaokya tüküibu Isak-e anaole thole alai ilaxle hopae nyakkya ningle wüi ibu tüküi ang omün nyak.

¹⁹ Isak dabue haxsha to tüküi tho koxle ti bang.

²⁰ Gerar nok chun-nyetmixbue Isak chun-nyetmixbu to ahe, ilaxle hwome thüi: “Ija a kwom ti changpu.” Ikhoma Isak-e ija tüküi ang “Wukdün”, le mün kox.

²¹ Isak dabue chatle tüküi mama tho. Ikhama chuwüi ahe. Ikhoma chixe ija ang “Fuxngai”, le nyak.

²² Chix ikha angkya achexle pao. Chix nguikya khatochu chixe tüküi chatle thole alai. Ija tüküi ma atsi-alakya chemchu chitüi. Chixe ija ang “Mongtex-za-lai”, le nyak. Chixe thüi: “Athaxpi Jowanpae kem ija haxtok ma ngo angkya pandaoa. Ikhama kem a tüle tüinangle changüi.”

²³ Ikha dantoxlaxle Isak Bersheba to pao.

²⁴ Ija jaja wüi Jowanpa ngailaxle chix füi akax: “Ku a hünpa Abraham Jowanpa changpu. Nang taxza; ku dapa Abraham khoma kue nang to mohiman angkya changle. Nang sixlibu kue tüle pu-tsa ang tomüi.”

²⁵ Ikhoma chixe ikhama tö-tsap tuita tan. Jowanpa münlün le nyak ilaxle ikhama chixe nyihom ajongle pom zai. Isak dabue ikhama tüküibu thole alai.

Isak hia Abimelek Nyi Tsaifün-Kaxwün

²⁶ Ofüima Gerar tokhange, chix nguapa Ahuza hia süpahi lompa Fikol nyi koplaxle Abimelek a Isak hato ngui.

²⁷ Isak-e hwom ang thüi: “Hünzome miktsak üntoxle jwonle apao koplaxle ku hato chem to hu ang hüi?”

²⁸ Hwome thüi: “Kwome Jowanpa nang füi tüile le ngün ang kople; idaile kwome thüipu, kem bama tsaotsüt tuita thomhax ilaxle kwome nang füi Tsaotsüt le changüi.

²⁹ Kwome nang to oma chemchu chimokle zingmüi ma pao ang tompu, ilailaile nange chuwüi kwom to oma chemchu taxmok. Athax a Jowanpae nang to mohimankya atsingsho.”

³⁰ Isak-e hwome sax angkya sütling to humele kox ilaxle hwome süt sax ti-lingle chang.

³¹ Ofüinop swomsae hwom pangnue wüi tsaotsütle Tsaotsüt lax. Ile hwom bama muamüi le changkya füima Isak-e hwom chatlax-otix le achat.

³² Ija nyixkha wüio le Isak dabue hwome tüküi thole alaikya apua. Hwome thüi: “Kwome ti atakdaoa.”

³³ Isak-e ija tüküi ang “tsaotsüt”, le nyak. Ile Bersheba tingnue mün kop.

Esau-e Mixnok Shekobu Laxkya

³⁴ Esau zangpua 40 nguikya füima chixe Hit nok sheko anyi lax. Tuita a Beri sacha Judit, ata mixcha a Elon sacha Basemath.

³⁵ Ija mixcha nyie Isak hia Rebika nyi to müimamale tingtui adün.