PONGWANG LAIPEX 23 - OTSAO BAIBEL (BSI)

Sarah Zi ilaxle Abraham-e Zukting Shak

¹ Sarah a 127 zanglao tsünlole ngo.

² She a Kanan haxtok Hebron ma zi. Abraham-e she zikya mangtsa.

³ Chixe chix kakonu mang dan thomkya kha danle tox ilaxle Hit nok hato paolaxle thüi:

⁴ “Ku a ikhato hünzom füi tomle ngokya mixnok wünpa tuita changle; ku kakonu mang akhün angkya hanpakma hünzome ku ang haxtok hidaole hanghüi.”

⁵ Hwome lan,

⁶ “Alixachong, kwom kax to apahüi. Kwome nang to otsak-ozong tüikya lompa tuita ningle hupu; kwom ma tüikya sümüikya zukting ma nang kakonu akhünlax. Nang kakonu mang akhün angkya hanpakma nang ang zukting kox angkya kwom zongto tuita mongmüi changpu.”

⁷ Ifüima Abraham-e hwom chitong to shwomle akhux

⁸ ilaxle thüi: “Ku kakonu mang ikhato akhün angkya hünzom ang mongtsukya jangtüi thüiningle Zoar sasün Efron ma

⁹ Makpelah longlua, chix haxtok chamtua chima tüikya ku ang hang angkya hanpakma chix ma tikle fahüi. Ikha kue ma zukting ang laxkya kuxma, athax hünzom tunthoma anguile otha koxle mwottsuakle changkuxma tikle fahüi.”

¹⁰ Tingnu panja ma mama Hit nokbu füi tomle Efron chix jaochu thungle tüikya; ikhama tüikya noknusae atatle chixe lan,

¹¹ “Alixachong apakoplax; Kue nang ang longlua womle ija haxtok jaojao bakle koxfang. Nange nang kakonu mang akhün tsuak angkya hanpakma, kue ikhama ibibi kwom khünakbu mikngün ma nang ang koxpu.”

¹² Ikoxle Abraham-e Hit nokbu chitong to akhuxle shwom

¹³ ilaxle, noknue atat angkya kuxma Efron ang thüi: “Chingchalaxle ku kax to shong-apahüi. Kue ija haxtok komkaile shaküi. Kue koxkya otha pongle kop hüi, ilaxle kue ku kakonu mang ikhama akhünüi.”

¹⁴ Efron-e lan,

¹⁵ “Alixachong, haxtok a khop ngunkhix ho-ali tha changpu: ikoxlechu kem bama ibu mo chem ang wünngoüi. Nang kakonu ikhama akhünlax.”

¹⁶ Khünaknue atatle Efron-e khop ngunkhix ho-ali, oja thalex-juatai lom ma onok-ziathop changkya hex, ija otha kox angkya Abraham ang mongtsu.

¹⁷ Ijaningle Mamre zongma handün chikao angkya tuina oja Efron kux changkya hex, Abraham kux ang achang. Ikhama haxtok, longlua ilaxle ija khama tüikya pünzua longzi alople tüikya ibu pangwüi wom.

¹⁸ Ija zangwün ma womkya Hit nok pangnusae wüi ija haxtok ang Abraham ku changpule awan.

¹⁹ Ifüima Abraham-e Kanan haxtok angkya ija longlua ma chix kakonu mang akhün.

²⁰ Idaile haxtok hia ikhama tüikya longlua oja Hit nok kux changkya hex, Abraham kux zukting ang achang.