PONGWANG LAIPEX 22 - OTSAO BAIBEL (BSI)

Zang-e Abraham ang Isak Tö angkya Kaxtom Kox

¹ Ifüima alüile chingo homtoxle Zang-e Abraham to thwontsing; chixe Abraham nyak: “Abraham a!” Ilaxle Abraham-e lan: “Ui, ku ikhama tüile!”

² Zang-e thüi: “Nang sasün tuita wüi tüikya, owa to nange tüle mongkünpuix, ija Isak koplax ilaxle Moriah chaxwan to paolax. Ikhato haxnukho oja kue ahoüihex, ikhama ku ang chix tö koxhüi.”

³ Ofüinop swomsae tö koxkya ma lax angkya hanpakma Abraham-e ha hidaole afox. Chixe ibu chix mantsak ma hünzing laxle, chix füi tomle Isak hia da anyi koplaxle lai. Zang-e chix hama Zang-e apuakya onui alop angkya hanpakma hwom achex.

⁴ Nyix azom lükya to Abraham-e ija onui ochu to ngün.

⁵ Ifüima chixe da nyi ang thüi: “Ikhama mantsak füi nuibang. Nao kukhi chukha to paolaxle zangshwomle tox üntoxle hünkhi hato chathüi ang.”

⁶ Tö kox pongma lax angkya ha Abraham-e Isak ang apai. Chixe a bitlo tuita iboma wüntak angkya hanpakma wünhandix le kop. Okhi tomtomle ahamle ngopongma,

⁷ Isak-e okax wangle “Apa!”, le nyak. “Ui! Chem ku sa?”, le hopae lan. Isak-e atüi: “Nang ma ha hia wün a tüi, ikoxle tö kox angkya hanpakma chun hosa ang ojongto tüi?”

⁸ Abraham-e lan: “Zang chix jaoe tuita kox angkya changle.” Ilaxle hokhi pangnyi tomtomle ahamle ka.

⁹ Chemtue hokhi Zang-e chix hama akaxle koxkya onui to nguipuix, Abraham-e tö-tsap tuita zing ilaxle ija ding ma ha athünle dan. Chixe sasün khakle koplaxle ija tö-tsap angkya ha dingma dan.

¹⁰ Ifüima chixe sasün lang angkya hanpakma bitlo tswon.

¹¹ Ikoxle Jowanpa kaxtaimixe zangkho tokhange nyakle thüi: “Abraham, Abraham!” Chixe lanle thüi: “Ui, ku ikhama tüile.”

¹² Chixe thüi: “Nao to chak taxmok chichangba tütale chu taxchang. Nange hünsa tuita wüi tüikya chix ang münkoxpu le chiamongkya ngünlaxle athax kue nang ma Zang achuak-achenkya hia chix kax ma laxle tüikya ngünle laxdaoa.”

¹³ Abraham-e akhople hukoxle zu khato ozong awünlaxle chunla tuita ngünle lax. Chixe ija kople apüi ilaxle sasün lüima ija zokle ashunkya tö ang langle kox.

¹⁴ Abraham-e ija onui ang “Jowanpae Koxkya kha”, le nyak. Athax kople khünaknue “Jowanpa haxnu ma chixe kox” le akaxle.

¹⁵ Anaole chuwüi Jowanpa kaxtaimixe zangkho tokhange Abraham nyak,

¹⁶ “Kue ku mün ma tsaosaxpu:Jowanpae akax ngopu: kue nang to okhonguile mohimanüi. Nange ile mokkya khoma tamchu hünsa tuita wüi tüikya ku ang kox angkya chiakhexkya khoma,

¹⁷ Ding angkya lyettsi hia tinu kax tokya sak büta kue nang ang sixlibu kox angkya tsaopu. Nang sixli hwome zan-nokbu to tingtakle tsuaküi.

¹⁸ Jat-li pangnusae, kue nangsu-nangsabu to mohimankya ningle hwom tochu mohimanhüi le ku ang thüiüi: ibu a nange ku kaxtom kax ma laxle tüikya khoma changpu.”

¹⁹ Abraham chix dapa nyi hato chat, ilaxle Abraham ngokya khato hwom tomwüile Bersheba to chat.

Nahor Sixli-hwom

²⁰ Aluile chingo homtoxle Abraham-e Milkah-e hotüi Nahor ang naosom achyet pux-paile koxkya awan ang kop:

²¹ Tüichongpa Uz, chix honao Buz, Aram hopa Kemuel,

²² Kesed, Hazo, Pildash, Jidlaf, üntoxle Bethuel,

²³ Rebika hopa. Abraham honao Nahor ang ibu naosom achyet Milkah-e pux-paile kox.

²⁴ Reumah, Nahor danuchae, Tebah, Gaham, Tahash, üntoxle Makah hwom bibi pux.