PONGWANG LAIPEX 21 - OTSAO BAIBEL (BSI)

Isak Puxkya

¹ Chixe tsaodaokya ningle Jowanpae Sarah to mohiman,

² ilaxle Abraham azule changkya füima chix ang sasün tuita puxle kox. Naosa a Zang-e lyettex-hantyale toxkya tue pux.

³ Abraham-e chix ang Isak le mün kox.

⁴ Chemtue Isak nyix-achyet nguile hüipuix, Zang kaxtom tüikya ningle Abraham-e chix ang khwonzüt-zom zingle kox.

⁵ Isak pux pongma Abraham a hota zanglao nguile changdaokya.

⁶ Sarah-e akax: “Zang-e ku hato mongmüi angkya tamchu nyi angkya hanpak apüile fadaoa. Ija zing atatkya pangnusa ku füi tomle nyiüi.”

⁷ Anaole chu she-e thüi: “Sarah-e naopai ang kopüile Abraham füi owae akax tsuakse? Ikoxlechu kue azusong khato chix ang sasün tuita puxle koxdaoa.”

⁸ Naosa tsongle hüi, ilaxle chix ang fongsüt owang wangle juthwom nyix, Abraham-e chongle püntux.

Hagar hia Ishmael Nyi Apaokya

⁹ Ijip nok dacha makhange Abraham ang puxle koxkya Ishmael, nyixta sarah sasün Isak füi abaole ngokya.

¹⁰ Sarah-e ija ngünlelax ilaxle Abraham ang thüi: “Ija dacha sasün nyi apaodao. Ija mixcha sasüne nang tuina, oja ku sa Isak-e kop angkya hex, ikha angkya tuita chu kop angkya oli münchang.”

¹¹ Ijae Abraham mong huanuma aduk-athang ang tom, chemthüikoxle Ishmael chuwüi chix sasün changpu.

¹² Ikoxle Zang-e Abraham ang thüi: “Nang dacha Hagar hia naosa nyi bama ojao taxaban. Sarah-e chem akaxpuix ija moklax, chemthüikoxle kue nang ang tsaodaokya sixlibu a Isak makhange tix atak angkya changle.

¹³ Kue dacha sasün ang chuwüi kue su-sa hwom huanuma kox angkya changle. Ile hwom chuwüi tuita jat-li ang achang ang tomüi. Chix chuwüi nang sasün tuita changle.”

¹⁴ Ofüinop swomsae Abraham-e Hagar ang saxtsom hia müikhwon nyitsong tuita ma ti awangle sholaxle kox. Chixe she sasün she tok ma apütle kox ilaxle apao. She laile pao ilaxle Bersheba sak-hax to samle aham ngo.

¹⁵ Ling ti komle changkya füima, she-e naosa fum-mua khung to danle tox

¹⁶ ilaxle zangdom tukux atsaile pao üntoxle thung. She-e ma füi alüile akaxle thüi: “Kue kusa zikya ngün ang münaduthoüi.” She ija khato ngopongma, she sop ang süt.

¹⁷ Naosa sopkya zing Zang-e atatle lax, ilaxle zangkangting tokhange kaxtaimix tuitae Hagar füi akax: “Hagar, cheme nang künduk-mongthang ang tompu? Nang taxza. Naosa sopkya Zang-e atatle laxdaoa.

¹⁸ Ajonglax, chix hato nguilaxle chix paikox üntoxle chix ang mong asomkox. Kue chix su-sa hwom makhange chongkya jat-li tuita alaiüi.”

¹⁹ Ifüima Zang-e she mikdap, ilaxle she-e tüküi tuita ngünlelax. Pao üntoxle she-e ija tüküi angkya ti müikhwon nyitsong ma awangle kho. Ikha angkya hidaole she-e naosa ang aling.

²⁰ Chix tsongle hüikya füi tomtomle Zang a ija nao füi tüikya; chix a Paran sak-hax faokha to ngo üntoxle müikop-nyaxlo ang thokya müihapmix tuita ang achang.

²¹ Chix honue chix kakonu ang Ijip nok naocha tuita apüile kox.

Abraham hia Abimelek Nyi Tsaotsüt

²² Ipongma Abimelek chix süpahi lompa Fikol füi nguilaxle Abraham ang thüi: “Nange amokmok pangwüi ma Zang nang füi tüile.

²³ Idaile ikhama Zang tunthoma, nange ku tamchu kusu-kusa hwom chichangba ku sixli hwom to dyen-nganle münchangpu le tsaosaxhu. Ku nang zongto müile hüidaoa, idaile ku zongto tamchu ija nang ngole tüikya haxtok zongto nang sule tüiüile tsaosaxhu.”

²⁴ Abraham-e akax: “Kue tsaopu.”

²⁵ Abimelek dabue kople thomkya tüküi bama Abraham-e Abimelek ang kaxthup-ngaotünkya kox.

²⁶ Abimelek-e thüi: “Kue ija owae mokpuix münawan. Nange ku hama ija chiakax khato, kue ija bama athax tix atat ang koppu.”

²⁷ Ifüima Abraham-e Abimelek ang chun hia maihubu hidaole kox, ilaxle hokhi anyie ija nyix tuita tsaifün-kaxwün le chang.

²⁸ Abraham-e chix müizyembu kha angkya chun hosa anüt süile kop,

²⁹ ilaxle Abimelek-e chix ma atüi: “Nange ija chem hanpak ang mokpu?”

³⁰ Abraham-e lan: “Ibu chun hosa anüt pongle koplax. Ile changkya makhange tix tüküi thokya mix a ku wüi changpule nange awanle laxkya ang changpu.”

³¹ Ikhoma ija onui ang Bersheba chemthüikoxle hokhi anyie tsaotsütkya onui a ikha changpu.

³² Bersheba ma hwome ija tsaifün-kaxwün le chang füima, Abimelek hia Fikol nyi Filistia nok to chat.

³³ Ifüima Abraham-e Bersheba ma tamarik pün küi ilaxle Jowanpa oshuk-okim chitüikya Zang to shwom.

³⁴ Abraham Filistia nok ma okuilole ngo.