PONGWANG LAIPEX 17 - OTSAO BAIBEL (BSI)

Khwonzüt-Zom, Tsaotsüt Münwan

¹ Chemtue Abram zanglao puli-aku changkya hex, Jowanpa chix hato ngai ilaxle akax: “Ku a Khüthak Zang changpu. Ku kax ma laxlax ilaxle chem supuix ija moklax.

² Kue nang füi ku Tsaotsüt laxüi ilaxle nang ang sixli huanuma tüiüi.”

³ Abram-e chix thün hax to lyetle akhux, ilaxle Zang-e akax,

⁴ “Kue ija Tsaotsüt nang füi laxpu: Kue tsaopu nang a jat-li obiobi hopu ang achangüi.

⁵ Nang mün a Abram münchang ikoxle Abraham ang changüi, chemthüikoxle nang a kue obiobi jat-libu hopu ang achangpu.

⁶ Kue nang ang su-sa hwom huanuma koxüi, ilaxle hwom khama züizüi a wanghom angchu changüi. Nang su-sa hwom huanuma tüikya khoma hwom a ojat-olibu ang achangüi.

⁷ “Oshuk-chitüikya Tsaotsüt tuita ang kue ku kaxtsao füichima nang füi tamchu nang su-sa hwom füi thom ang tomüi. Ku a nang Zang tamchu nang su-sa hwom Zang ang ngoüi.

⁸ Athax nang püntüi tuita ang achangle tüikya ija haxtok kue nang ang tamchu nangsu-nangsa hwom ang koxüi. Kanan haxtok komkaile othuithui hanpak ang nangsu-nangsa hwom haxtok ang achangüi ilaxle ku a hwom Zang ang ngoüi.”

⁹ Zang-e Abraham ang thüi: “Nange chuwüi ku füi tomle ija Tsaotsüt thom ang mongtsu angkya oli changle; nange tamchu füichima nangsu-nangsa hwome chuwüi tsüntsün to ija chialakle thom angkya oli.

¹⁰ Nang üntoxle nangsu-nangsabu, hünzom pangnusae wüi, hünzom kha angkya lükaka ang khwonzütle zomzing angkya to mongtsu angkya oli changpu.

^11-12 Athax makhange hünzome lüka naosasa pangwüi ang puxkya füima nyix-achyet lükya to ija Khwonzüt-Zom zingle kox angkya changpu. Hünzom homkhama pux-paile changkya da su-sa hwom tamchu mixnok tokya shakle laxkya da, ibu pangnu angwüi zingle kox angkya changpu. Ijae kem bama Tsaotsüt tüikya münwan ahole ngoüi.

¹³ Mixhuak pangwüie ija zom zing angkya changpu, ijae hünzom füikya ku Tsaotsüt a oshuk chitüikya changpule aho angkya otok to ngün ang kopkya münwan tuita changpu.

¹⁴ Lüka owawa Khwonzüt-Zom chizingkya mix a ku khünak changpule münlaxüi, chemthüikoxle chixe ku füikya Tsaotsüt münthom.”

¹⁵ Zang-e Abraham ang thüi: “Nange nang kakonu ang Sarai le münnyaküi; athax makhange she mün a Sarah changpu.

¹⁶ Kue she to mohimanüi, ilaxle she makhange kue nang ang sasün tuita koxüi. Kue she to mohimanüi ilaxle she a jat-libu honu tuita ang achangüi, ilaxle sasün hwom khama wanghombu chuwüi tüiüi.”

¹⁷ Abraham-e chix thün füi hax to thule akhux, ikoxlechu “Zanglao hota nguiünkya azupa tuitae supux-sapaile chang ang tho ang chami? Sarah angchu zangpuli-bün nguikoxle nao nguidongle chang ang chami?”, le ajang pongma chix nyi.

¹⁸ Chixe Zang ma atüi: “Ishmael ang ku mantswon angkya büthüikoxle chitom angkya?”

¹⁹ Ikoxlechu Zang thüi: “Ile münchang. Nang kakonu Sarah-e nang ang sasün tuita puxüi. Nange ija nao ang Isak le amün angkya changle. Kue ku Tsaotsüt chix füi tamchu chixsu chixsa hwom füi othuithuima thomüi. Ija a oshuk chitüikya Tsaotsüt changpu.

²⁰ Kue Ishmael hanpakma nange tsaiju-kaxjukya atatdaoa, ikhoma kue chix to mohimanüi. Kue chix angchu su-sa hwom tamchu sixlibu huanuma koxüi. Chix a tuita, wanghom bün-anyi hopa ang achangüi, ilaxle chix sixli hwom makhange kue chongkya jat-li zingüi.

²¹ Ikoxlechu ku Tsaotsüt kue hünsa Isak füitix thomüi. Chix a ngaizang itukhae Sarah-e pux angkya changle.”

²² Ibibi zangwün ashukkya füima Zang-e Abraham danle tox.

²³ Ija nyix Abraham-e Zang kax ma laxle chix homkha ma tüikya lüka sühuak pangwüi ang Khwonzüt-Zom zingle kox. Ikhama chix hom ma pux-paikya hia shakle apüikya dabu pangwüi wom.

²⁴ Chixe Khwonzüt-Zom zingpongma Abraham a zanglao puli-bün changkya.

²⁵ Sasün Ishmael a zangbün-azom changkya.

²⁶ Okhi pangnyi wüi nyix tuita ma khwonzütle zomzing.

²⁷ Abram dabu ang chuwüi hokhi füi tomle zingle kox.