PONGWANG LAIPEX 16 - OTSAO BAIBEL (BSI)

Hagar hia Ishmael Nyi

¹ Athax Sarai, Abram kakonu ma naosom nguidongle chichang. She ang Ijip nok dacha Hagar le amünle mixcha tuita tüikya.

² Sarai-e Abram ang thüi: “Nange hulax, Jowanpae ku ma süshix-naosom nguidongle chang ang müntom; ku dacha hato donglax; owatsing she makhange kue naosombu kop ang tsuakle chu changtüilax.” Abram-e Sarai kax ma lax.

³ Ile Kanan haxtok ma Abram zangbün nguile ngole hüikya füima, chix kakonu Sarai-e hodacha ang thomkya Ijip cha ma kakonu ang lax angkya hanpakma Abram chak to kox.

⁴ Chix Hagar nui to dong, ilaxle she ma nao atüi; üntoxle she ma naotüile le ngünkya zuma Hagar a Sarai zongto ngam ang süt ilaxle ada.

⁵ Ikhoma Sarai-e Abram ang thüi: “Hagar-e ku wünhaikya a nang thaipu. She a nang ang kue tix koxwüi, ikoxle nao nguidongle changkya makhange she-e ku wün ahaile changle. Idaile künyi bama opupu thaipuix, Jowanpae tix kaxfün naxfakox!”

⁶ Abram-e lan: “Müihule, she a nang dacha jao, nang füifüi; she to nange chemle hwonse thütpuix ile hwonkox.” Ifüima Sarai-e Hagar to tüle khax-khule changkya khoma she paole sam.

⁷ Shur lomnu sak-hax lom to shuasa khama Jowanpa kaxtaimix tuita füi Hagar apong.

⁸ Kaxtaimix-e thüi: “Hagar, Sarai dacha, nang ojong tokhange ochito pao ang hüipu?” She-e lan: “Ku a ku hopunu ha angkya pao ang laikya changpu.”

⁹ Chixe thüi: “She hato chatlax ilaxle she hama dacha tuita angwüi tango.”

¹⁰ Ifüima chixe thüi: “Owaechu hwom e-ang chithole kue nang ang osix-oli faüi.

¹¹ Nange sasün tuita ngün angkya changle; nange chix ang Ishmael le amünüi, chemthüikoxle nang mongmaxle sopkya Jowanpae atatdaoa.

¹² Ikoxlechu nang naosa a fao mantsak ningle tüiüi; chix a noknusa zongto zan ang achangüi ilaxle pangnusa wüi chix zongto zan ang achangüi. Chix a ma haxnu-homsabu füi atsaile ngoüi.”

¹³ Ikhoma she-e ma füi zangwünkya Jowanpa ang “Elroi”, le nyak. Chemthüikoxle she-e thüi: “Kue otsing tomtata ma Zang ngün ang koppia? Ku a chix ngün füima ozün ma ngopia?”

¹⁴ Ikhoma Kadesh hia Bered nyi ba angkya tüküi ang khünaknue “Ku ngünle laxkya Ozün ma Tüikya Zang Tüküi”, le nyak.

¹⁵ Hagar-e Abram ang sasün tuita puxle kox, ilaxle chixe ija nao ang Ishmael le amün.

¹⁶ Ipongma Abram a zanglao puli azok nguile tüikya.