PONGWANG LAIPEX 15 - OTSAO BAIBEL (BSI)

Abram füikya Zang Tsaotsüt

¹ Ifüima Abram-e miksho ma tütali mikngünohün ngün üntoxle Jowanpae chix füi ile akaxkya atat: “Abram, nang ojao taxza chemthüikoxle kue nang to o-le thomüi tamchu hingho chongkya koxüi.”

² Ikoxle Abram-e lan: “Khüthak Jowanpa, nang hinghoe ku ang chem fün amüiüi, chemthüikoxle ku ang osix-oli ang owangaxchu chitüikha. Ku mantswon angkya ku ang Damaska nok Eliazar tata wüi.

³ Nange ku ang su-sa tuita ngaxchu chifakya daile ku dapa hwomkha angkya tuitae ku tuina mantswon angkya changle.”

⁴ Ifüima chixe Jowanpae chix füi tamchatle akaxkya atat: “Ija dapa Eliazar-e nang man müntswonüi; hünsa tomtatae tix nang mantswon angkya changpu.”

⁵ Chix homtho to alailaxle Jowanpae thüi: “Zangdingkho to hulax ilaxle lyettsibu elax, itukux jao nang sixlibu tüi angkya changle.”

⁶ Abram-e Jowanpa to chix mongong thom, ija khoma chix füi Jowanpa ang mongmüi ilaxle chix pongle kop.

⁷ Ifüima Jowanpae chix ang thüi: “Ija haxtok a nang haxtok ang kox angkya hanpakmale Babilon haxtok Ur tingsho tokya nang sele alai paokya Jowanpa a ku changpu.”

⁸ Ikoxle Abram-e lan: “Khüthak Jowanpa, ija haxtok a ku haxtok ang achangüile kue chem ma awanle laxüi?”

⁹ Chixe lan: “Nange maihu tuita, zwon tuita, chun tuita, ibu pangwüi zanglao azom pongkya chang angkya oli; ilaxle osu tuita tamchu jua-o tuita le ku hato apüihüi.”

¹⁰ Abram-e ibu müi Zang hato apüi, ibu anyinyi ang atexlaxle kaochima texta, kaochima texta le atale zyenle dan; ikoxlechu chixe osabu a chiatex.

¹¹ Ibu müimang to okunbu ju, ikoxle Abram-e ibu jwonle apao.

¹² Chemtue zanghan homle changpuix, Abram hato mikngüt hüile jip, üntoxle khomtsikya hia zakya chix hato hüi.

¹³ Jowanpae chix ang thüi: “Nangsu-nangsabu a mixnok chaxwan to püntüi ang ngo angkya changle. Ikha hwom da ang ngoüi ilaxle zanglao 400 bama hwom tüle fuxtsüile ngoüi.

¹⁴ Ikoxlechu hwom da ang thomkya nok to kue sikangünüi, üntoxle chemtue hwome ija mixnok chaxwan danle toxüihex, hwome hwom füi tomle tuinabu huanuma laxlaxle chatüi.

¹⁵ Nang a tsünlo-khothole ngoüi ilaxle mongsom ma zile akhünüi.

¹⁶ Nang su-sa hwom ikhato chatle chat ang zanglao 400 homüi chemthüikoxle hwom ang sikngün koxtangle chichang-chizangle machang tanto kue Amor nok jwonle münapao.”

¹⁷ Chemtue zanghan dütle zangnakle changpuix, wünkhut füikya wüntik tuita ilaxle wünle füikya wünnyan tuita le ibu müithombu oba makhange le.

¹⁸ Ija nyix Jowanpae Abram füi Tsaotsüt laxle thüi: “Ijip shuanu makhange Eufrat shuanu alople ija haxtok kue nang sixlibu ang koxpu.

¹⁹ Ija haxtok a Ken nok, Ken nok, Kadmon nok,

²⁰ Hit nok, Periz nok, Refaim nok,

²¹ Amor nok, Kanan nok, Girgash nok, üntoxle Jebu nok, hwom bibi haxtok changle.”