PONGWANG LAIPEX 13 - OTSAO BAIBEL (BSI)

Abram hia Lot nyi Afan

¹ Abram a chix kakonu hia chix tuinabu koplaxle Ijip haxtok zongma shuakuxchi ikoxle Kanan haxtok zongma shuathongchi chaxwan to ngui. Lot chuwüi chix füi tomle pao.

² Abram a tüle ahak-aluale tüikya khünak tuita. Chix ma tsom-pom chun, zwon, maihu ibomachu hun hia khopbu huanuma tüikya.

³ Ofüima chix ikha dantoxlaxle onui tuita angkya ata khato le achexle ahamkya Bethel alople ju. Ikhato chixe amipongma pom zaile toxkya Bethel hia Ai tingnu nyi zo to ngui

⁴ ilaxle chixe tö-tsap tuita zing. Ikhato chixe Jowanpa to shwom.

⁵ Lot machu wüi chun, zwon hia maihu, ibomachu chix kako-homkha hia dabu tüikya.

⁶ Ikhoma hokhi pangnyi hanpakma okhonguile müibue fumtsüt angkya onui chitüi, chemthüikoxle hokhi ang tsom-pombu huanuma tüi.

⁷ Ikhoma Abram müi hia Lot müi to humekya khünakbu tata füi ahe ang süt. (Ipong kople ija haxtok ma Kanan nok hia Periz nok tüile wüi ngokya.)

⁸ Ofüima Abram-e Lot ang thüi: “Künyi a haxnu-homsa changle, idaile nang khünak hia ku khünakbu bama hyetdong-kaktsile ngo angkya oli münchang.

⁹ Idaile athaxpi afanhax. Nang mong alualuachi haxtok zünle koplax. Nang lomta ma lelax, ilaxle ku a mama lomkua to leüi.”

¹⁰ Lot-e akhople hu ikoxle Jordan haxsha Zoar alople, tie awangle, Jowanpa tsawatkha lailaile chichangba Ijip nok haxtok lailaile ngünle lax. (Ija a Jowanpae Sodom hia Gomorah tingnu nyi amütüi thoto wüi changkya.)

¹¹ Ikhoma Lot-e chix hanpak ang Jordan haxsha komkaile zünle kop ilaxle handün chikao to achexle pao. Ija a Abram hia Lot nyi afanle paokya kax.

¹² Abram a Kanan haxtok ma wüi ngo, ikoxle Lot a Sodom zui ma haxsha angkya tingnubu khato homzai laxle ngo.

¹³ Ibu khünakbu a Jowanpa zongto chichang-chizangkya tamchu ochax khünakbu changkya.

Abram a Hebron to Achexle Pao

¹⁴ Lot-e danle toxkya füima Jowanpae Abram ang thüi: “Nang ojong tokyahex, pangnu chito akhople müile hukoplax.

¹⁵ Nange ngünle tüikya haxtok komkaile kue nang ang tamchu nangsu-nangsa hwom ang kox angkya changle, idaile ija a othuithuima nang kux ang changle ngoüi.

¹⁶ Kue nang ang owaechu akiak ang chithole su-sa hwom huanuma koxüi; hwom akiakkya füi a chaxwan tok angkya haxbu akiakkya wüi ochwon changüi!

¹⁷ Athax, paolax ilaxle haxtok pangnu khato hulax, chemthüikoxle ija pangwüi kue nang ang kox angkya changle.”

¹⁸ Ikhoma Abram-e chix pom a Hebron ma Mamre angkya otsao pünnu tong ma zai; ikhama chixe Jowanpa ang tö-tsap tuita zing.