PONGWANG LAIPEX 1 - OTSAO BAIBEL (BSI)

Pangwüi Zingkya Pukax

¹ Chemtue Zang-e ding-hi-hax zingle alaipuix,

² chaxwannu a tütachu chichangle tie awangle zangnaktukle tüikya. Zang Chasa a titok to ahamle tüikya.

³ Ifüima Zang-e kaxtom koxle akax: “Zangngai laiün”. Ija ma zangngai lai.

⁴ Ijama zangngai a müihule le ngünle lax. Ifüima chixe zangnak tokya zangngai ahan.

⁵ Chixe zangngai ang “Anyixning”, le nyak üntoxle zangnak ang “Awünning”, le nyak. Ija füima zangnak ilaxle zangngai. Ija a pongwang lükya nyix changkya.

⁶ Ifüima Zang-e kaxtom koxle akax: “Thakchi hia fangchi ahanle ti angkya ti ahan ang ohua laile changün”, üntoxle ija ile chang.

⁷ Zang-e ohua alailaxle thakchi angkya hia fangchi angkya ti ahanle dan.

⁸ Zang-e thakchi angkya ti ang “zangkho”, le nyak. Ija füima zangnak üntoxle zangngai. Ija a nyix anyi lükya changkya.

⁹ Ifüima Zang-e kaxtom koxle akax: “Zangkho zongma fangchi angkya ti haxza alai angkya kuxma jongta khama asoxün”, -üntoxle ija ile chang.

¹⁰ Haxza ang chixe “haxwan”, le nyak ilaxle jongta khama athütle atungkya ti ang “Molo-tinu” le nyak. Zang-e ija müihule le ngün.

¹¹ Ifüima Zang-e kaxtom koxle akax: “Haxwannue pün-zua, otsang hia oziak füikya oli pangwüi alaikox”, -üntoxle ija ile chang.

¹² Ikhoma haxwannue pün-zua oli pangwüi alai. Zang-e ija müihule le ngünle lax.

¹³ Ija füima zangnak üntoxle zangngai. Ija a nyix azom lükya changkya.

¹⁴ Ifüima Zang-e kaxtom koxle akax: “Zangnak hia zangngai ahan ang ding to zangngaibu laiün: üntoxle ibu a hanpak hia zanglao tamchu, zanglom pangpwonbu hanpak hia lyetkua-zangpua lyettex-hantya ang naxngo nui:

¹⁵ chaxwannu Zang angai ang ibu a ding to fale naxngokox” -üntoxle ija ile chang.

¹⁶ Zang-e Zangngai chongkya nyi alai. Zanghan a anyixning apün ang üntoxle Lyetnu a ajaning apün ang; chixe Lyettsibu chuwüi alai.

¹⁷ Chaxwannu to fa angkya hanpakma chixe zangngaibu ding to dan;

¹⁸ ibue anyixning hia ajaning apünüi ilaxle zangnak tokya zangngai atsai ang tomüi. Zang ija müihule le ngün.

¹⁹ Ija füima zangnak üntoxle zangngai: Ija a nyix ali lükya.

²⁰ Ifüima Zang-e kaxtom koxle akax: “Ti a zünmok füi awang ang laxkox, ilaxle zangwin a osabue awang ang laxkox.”

²¹ Ilaxle chixe ti ma tüikya müinu-nyaxpabu hia zünmok oli pangwüi alai ilaxle osa-juxsa oli pangwüi alai. Zang-e ija müihule le ngün.

²² Chixe ibu to mohiman ilaxle ti angkya zünmok hia ding ang osabu ang pu-tsa angkya akax.

²³ Ija füima zangnak ilaxle zangngai. Ija a aga lükya nyix changkya.

²⁴ Ifüima Zang-e kaxtom koxle akax: “Chaxwannue tsom-pom hia faomüi, chongkya hixkya, oli pangwüi alaikox” -üntoxle ija ile chang.

²⁵ Ibu chix chakzing pangwüi chixe müihule le ngün.

²⁶ Ifüima Zang-e akax: “Athaxpi keme khünak zingüi; hwom a kem lailaile tüiüi ilaxle hwome kem khuaküi. Hwom a müi-hi-nyax, o-jux, tsom-pom hia faomüi chongkya hixkya pangnu thakma apün angkya zong tüiüi.”

²⁷ Ikhoma Zang-e chix lailaile-ole khünak-mixsa zingle alai. Chixe hwom sheko hia lüka le zingle alai.

²⁸ Zang-e hwom to mohimanle akax: “Simüi-limüi hüi tamchu pu-tsale changhüi, chaxwannu awanghüi tamchu ija to ohüi; tinu mong tokya janyax hia zangwin angkya osabu tamchu chaxwan tok ma ahamkya zünmok pangwüi thakma apün-awanghüi.

²⁹ Hulax, chaxwannu ma tüikya pünziak laimo oli akiakle kue hünzom ang koxpu; hünzome ibu süt ang saxlax.

³⁰ Faomüi-janyax pangnu, zangwin angkya osabu pangwüi, akhwom-alyangle ahamkya müi pangnu, khüzün zakdün atüitüi pangwüi tamchu fumhing laihing pangnu hünzome süt ang saxüi. Ibu pangwüi kue hünzom ang koxdaoa.” Ilaxle ibu pangwüi ile chang.

³¹ Zang-e chix chakzing müihule le ngün. Ifüima zangnak üntoxle zangngai. Ija a azok lükya nyix changkya.