NEHEMIA 6 - OTSAO BAIBEL (BSI)

Nehemia Zan to Ka ang Oshua Lomkya

¹ Sanballat, Tobiah, Geshem, ilaxle mama kwom zanpabue, kwome chiapongkya kha jao chitoxle katuk zaile ashukkya zing atat; ipongma kwome zünkaibu ma kahakbu apüt angkya mwot matsuakkya.

² Ikhoma Sanballat hia Geshem nyie, Ono haxsha ma kue hwom füi apong angkya kaxho tuita ahüi. Ija a hwome ku to chakmok ang atsingkya kax changkya.

³ Kue hwom füi ija kaxho füi khünak tuita akat: “Kue khütkhaxkya mwot mokle ngole, ku ikhato ju ang müntho. Hünzom füi apong ang jukya khoma kue ija mwot azakle thom ang müntho.”

⁴ Hwome ku hato ija kaxho tuitata wüi othom ali ma ahüi, ilaxle kaxho hüikya dang to kue chu ija kaxlan tuitata wüi koxle kaxnong achat.

⁵ Ifüima aga lükya kaxho füi Sanballat-e chix dabu ku hato akat; izuma a laiza tuita chihak homtoxle ahüi.

⁶ Ija a ile tüikya: “Nang üntoxle Judah khünakbue alünle ajongse le hyet lomle ija katuk zingle ngoputa. Nang wanghom ang achang angchu azong ngoputa. Ija zangwün a tomzi nok pangkha towüi wünle paole ta.

⁷ Ilaxle nang tuita Judah nok wanghom ang achangkya kax angaile Jerusalem ma khuapu ang tom angkya hanpakma nange ajebu züizüi achwonle thomdaoa ta. Ibu pangwüi Geshem-e ku hama wünle changdaoa. Tütakoxlechu wanghompa-e ija kax atatle laxüi, ikhoma kue thüipu, ija zangwün azut ang künyi tam apong koxle wüi müiüi.”

⁸ Kue chix hato kaxnong achatle: “Nange wünkya zangwün tuita chu otsingtsing münchang. Nange ibu pangwüi nang lailaie alaile wünkya kax changle.”

⁹ Kwome mwot athole danle naxtox ang kwom aza-anale chang angkya hwom mongtex changkya. Kue zangjop: “Ikoxle athax, Zang, nange ku tsak-zong ang tomhüi!”

¹⁰ Ipongma ku Delaiah sasün üntoxle Mehetabel susün Shemaiah, owae chix hom dantox ang chimüile tüile asupuix, chix hato paole asu. Chixe ku ang thüi: “Nang üntoxle ku, künyi a Zangshwom-Hom angkya Otsao Nui to pao üntoxle kahakbu haklaxle azwonle ngo angkya wüi changle, chemthüikoxle hwom a nang lang ang nguile ngole. Opupu zangnak ma wüi changtüi, awünningle hwom nang lang ang ngui angkya changle.”

¹¹ Kue lan: “Ku a mixtho to paolaxle azwonle ngofang khünak münchang khünak münchang. Zangshwom-Hom to khünle ngolaxle kue ku khang azang ang azongüile nange thütpia? Kue ile otuechu münmok.”

¹² Kue chemtue ija bama tamchatle ajang laxpuix, Zang-e Shemaiah füi münakax ikoxlechu Tobiah hia Sanballat nyie ku ang ija kaxkhün koxle aza ang zuizun koxlaxle shakkya changale kue tsingle lax.

¹³ Hwome ku mün ama angkya hia zak-akop ang tho angkya hanpakma ku ang ochax alyen angkya hanpakma azan-anale chang ang chix shak.

¹⁴ Kue zangjop: “Zang, Tobiah hia Sanballat nyie mokkya mwot texle ataklax ilaxle hokhi to sikangün kox. Ajenu Noadiah hia mama ajebu opange ku aza ang azong daopuix, hwom texle atakkox.”

Mwot Ashukkya

¹⁵ Mwottho ma ajong füima nyix punyi-bün boma nyix anyi-lükya to Elul lyetnu ma nyixtsa-aga nyixkha mwot pangwüi tsuakle hüi.

¹⁶ Chemtue kwom zanpa ang ngokya tomzi nokbue ija kax atatpuix, ija mwot pangwüi Zang-e fongle tsuakle hüikya daile hwom ang thün aho angkya onui müntüile awanle lax.

¹⁷ Ija tuktuk ma Judah lompabu pangwüi Tobiah hato tsaiwün-kaxwün wangle tüikya.

¹⁸ Chix hohopa ang Judah khünak chang koxle tamchu Arah sasün Shakaniah khoma Judah angkya khünaknu huanuma chix chima sütle tüikya. Ija obo angchu, chix sasün Jehohanan-e Berekiah sasün Meshullam sacha kako ang lax.

¹⁹ Khünaknu ku tunthoma Tobiah-e müikya mwot mokkyabu mo wün ilaxle kue chem zangwünpuix ija chix hama wünle kox. Ilaxle chixe ku azale mong ahik ang ku hato laiza akatkya chizak.