NEHEMIA 4 - OTSAO BAIBEL (BSI)

Nehemia-e Chix Mwot füi Apüile Ajongkyabu to Lüt ang Tho

¹ Kwom Judah khünakbue katuk zaikya mwot owang wangkya kax chemtue Sanballat-e atatle laxpuix, chix ang kwom füi mongtsik lai ilaxle kwom chanyi.

² Chix füikya khünakbu hia Samaria nok süpahibu tuntho to chixe akax: “Ija chem chifün chitüikya Judah khünakbue hwome chem mokpu le textüipuix? Hwome tingnu chatle azünle zaile alaiüile texpia? Töbu koxkya makhange hwome ija mwot nyixta ma wüi alaile tsuaküile texlaxpia? Hwome longhom zai angkya longbu zokle ashundaokya athün thomkya longkhixbu makhange chatle zingtsuaküile texlaxpia?”

³ Chix zui ma Tobiah ajongle tüikya, ilaxle chixechu ito bole akax: “Hwome chemningkya katuk zingle alai thoüi? Hijan tuitae ngaxchu ija thule atsun ang thoüi!”

⁴ Kue zangjoppu: “O Zang-e, ibue kwom cha chemle nyipuix apakoplax! Hwome kwom chanyikya anongle hwom khangkho ma wüi düt ang tomkox. Hwom ma atüitüi komkaile tsui pao ang tomkox, ilaxle hwom a mixnok chaxwan to zanda ang kople pao ang tomkox.

⁵ Hwome mokkya ochax mwot bama thailak tüi ang taxtom ilaxle hwom ochaxbu otuechu taxalak, chemthüikoxle hwome ija tingnu azünle zaile ngokya kwom adix-adale changdaoa.”

⁶ Ikhoma kwome chizakle ija zaile alai angkya mwot thuithuile mokle le, ilaxle lebama wüi kwome süitex süifi mwot tsuakle hüi, chemthüikoxle khünaknue mongtsutsule mwot mok.

⁷ Sanballat, Tobiah, ilaxle Arabia nok, Amon nok ilaxle Ashdod nok, ibu khünakbue, kwome Jerusalem long katuk, dangba atsaile tüikya pangwüi athut-apongle tüle thopaole mokle hüi zing atat, ilaxle hwom ang huanuma mongtsik.

⁸ Ikhoma hwom pangwüi tomle nguilaxle Jerusalem to sing angkya ilaxle hwom mwotkho asamle chang angkya hwome kat-azua,

⁹ ikoxlechu kwome kwom Zang to zangjop ilaxle hwom to zanhule nyengo angkya hanpakma ma zangnak zangngaile kwome khünakbu zanhu ang dan.

¹⁰ Judah khünaknue tsai ile ngao: “Hünlit hün laxle kwom shonaile max; Awüt angkya longkhixbu huanuma tüile. Anyix kwome katuk chemle zingthoüi?”

¹¹ Kem zanpabue, hwome kem to asoxle shingle, kem pangwüi mik amüt tamchu mwot athole zak ang tomle machang tanto keme hwom ngün ang münthole thüt.

¹² Ikoxlechu hanpak-hanpak to, zanpabu khato ngole tüikya mama Judah khünakbue kwom hato nguilaxle zan nokbue mok ang atsingle ngokya katzua bama wünle kox.

¹³ Ikhoma kue khünaknu ang changlo, pax hia sanhap, ibu füi akhyep-adile saxthom-saxthom ma süile, zaile malünkya katuk zui akhople zanhule ngo angkya kaxkox.

¹⁴ Kue khünaknu mongthang ngokya ngün ang kop, ikhoma kue hwom lompabu hia alixachongbu füi akax: “Kem zanpabu thua zale taxngo. Zang chemtukux chongkya tamchu za-adünkya hex, texle ataklax, ilaxle hünzom ma-mixbu, hünzom naosombu, hünzom kakonubu, tamchu hünzom homkha hanpak ang azankox.”

¹⁵ Hwome atsingle ajang ngokya kwome awanle laxdaoale kwom zanpabue awan ang kop, ilaxle Zang-e hwom mwotthobu to anaodaoale awan ang kop. Ifüima kwom pangnusa katuk zaile alai angkya hanpakma tamchatle mwot to chat.

¹⁶ Ija makhange ku khünaknu süifie mwot mok ikoxle süifie, chang-pax, di hia sanhap, ibu akhyep adi laxle zanhule nui. Ilaxle kwom lompabue

¹⁷ ija long katuk swonle mwot mokle ngokyabu ku khünaknu to zongbakle fong. Ija katuk zai ma sütle ngokyabue ngaxchu kaochi chak füi mwot mok ikoxle kaochi chak füi chang-pax kop.

¹⁸ Ija mwot mokle ngokya khünak pangnusae wüi ma khyadaxdax ma changlo thole koplaxle mok. Nyazong mütle zan-khong apuk angkya khünak ku füi tomle ngo.

¹⁹ Kue khünaknu, hwom alixachongbu hia lompabu füi akax: “Keme katuk zaikya mwot matsyentsyen le matangtang to mokkya khoma kem khünakbu a chiakchiaksaile tüile.

²⁰ Hünzome nyazong mütkya ozing atatle jangchang, ku zui ma asoxlax. Kem hanpakmale kem Zang azanüi.”

²¹ Ikhoma nyixfo nyixfole, swomsa makhange lyettsi-lyetsabue nyankya kople, kwom süifie katuk zaikya mwot mok ikoxle süifie paxbu füi kwom nyele ajong.

²² Ipongma kue ibu mwot to humele ngokya khünakbu ang kue, hwom to fongle ngokyabu zangnak ma Jerusalem ma ngo angkya changle, ikoxtix keme tingnu a zangnak machu tamchu anyixning mwot mokle ngopongma chu nyele thom ang thoüile akax.

²³ Kue zangnak ma ngaxchu nyi-za chisik, ilailaile ku zuikhuibu hia ku dabu tamchu ku nyetmixbu owaechu ma nyi-za chisik. Ilaxle kwom pangnue chang-paxbu ma chak ma koplaxle ngopu.