NEHEMIA 2 - OTSAO BAIBEL (BSI)

Nehemia a Jerusalem to Pao

¹ Lyetjang ali füima nyixta, Chongwangpa Artakses-e süt saxle ngopongma, kue chix hato ju pe apüile kox. Chixe wanma chemtuechu chixe ku thünza ma mongma mik-hu thünzam tümangüntox,

² ikhoma chixe atüi: “Nang büthüikoxle mongma ngokya ningle ngünpu? Nang kaklakbu lün ang chichang, ija a lita mongma wüi changpu.” Ku ang mongzangwünkya huanu changkya

³ ilaxle kue lan: “Wanghompa, nang tsünlo zaknuile ngohüi! Tingnu oja ma ku apu-apa hwom akhünle tüipuix, ija tingnu hia pan katuk pangwüi wün füi zokle amale thomdao füima kue ija bama ku mong makya chiaho homtoxle chemle khomle thomtsuaküi?”

⁴ Chongwangpa-e atüi: “Nange lomkya ija chem?” Kue Zangkangting Zang to zangjop,

⁵ ilaxle kue chongwangpa füi akax: “Wanghompa, nang ku füi mongzom müikya jangtüi ilaxle kue ju-lomkya fa ang mongtsukya jangtüi, ku Judah haxtok, ojong khato ku pupa hwom akhünle tüipuix, ikhato ija tingnu tamchatle zingle alai angkya hanpakma ikhato chat ang danhüi.”

⁶ Chongwangpa, ku zui ma thungle ngolaxle ku to chingchale hu, ilaxle ku tsaiju-kaxjukya to müiüile pongle kop. Chixe ku ma, ku chemtukux ngolaxle chat angkya hex ija atüi, ilaxle kue ija chix hama wünle kox.

⁷ Ifüima kue chix ma, Hannop-Eufrat haxtok angkya Gowarnor hato, chixe ku to asun-azule chang angkya tamchu ku Judah chaxwan to aham-atüile chang angkya bama laiza tuita faüile ju.

⁸ Kue, wanghom hwom suak twonmix Asaf hato, Zangshwom-Hom nyetmixbu ngwotnui fülom ma lax ang, tingnu pan katuk ma lax ang ilaxle ku ngwotnui hom ma lax angkya hanpakma ku ang pünfi püntsibu laxkox-o lükya laiza tuita zale fa angkya chuwüi akax. Zang ku füi tüile ngokya khoma chongwangpae kue ajuju pangwüi kox.

⁹ Ku füi tomle chongwangpae züita süpahi lompabu ilaxle mankho makhange azankya süpahibu thomta, le koxle apao. Ku a Hannop-Eufrat alop ang achexle ka. Ikhato kue chongwangpa laizabu Gowarnorbu chak to kox.

¹⁰ Ikoxlechu Beth Horon tinglong angkya Sanballat, ilaxle Amon haxtok angkya alixachong Tobiah hokhie, Israel khünaknu fün amüile mwotmok angkya hanpakma owawa nguile tüileta le atat ang kop. Ikhoma hokhi ang tüle mongtsik.

¹¹ Ku Jerusalem to ka, ilaxle nyix azom hanpakma

¹² Zang-e ku hama mok angkya mwot chempang ahole fapuix ija bama kue owa hamachu chiwün. Ifüima zangnaknu khato ku zo ilaxle, ku boma zuikhuibu koplaxle laile pao. Kwome müi ku nga ang mantsak tuita kopkya boma mama chemchu chikop.

¹³ Ipong kople zangnak lüwüi tüikya ilaxle kwom tingnu akaile hannopchi angkya Haxsha Zünkai makhange shuathongchi Dragon tikhot akaile Ubbish Zünkai to le. Ku ahamle ngopongma, Kue tingnu pan pünle ama thomkya hia wün füi zokle amadaokya fülombu to hule aham.

¹⁴ Ifüima tingnu zongma handünchi kao ma ku shuakuxchi ma tüikya Tümik Zünkai hia Wanghom Tüküi to ngui. Ku nga le tüikya mantsake idu longkhixbu khato le angkya lom chiataktsuak,

¹⁵ ikhoma ku Kidron Haxsha to le le katuk achole ibu to hule aham. Ifüima ku nguikya lom makhange wüi anongle chat ilaxle Haxsha Zünkai makhange tingnu to chatle ngui.

¹⁶ Ima tüile ngokya onok okax-okhobu owae ku ojong to paopuix chichangba chem mokpuix owaechu chitik. Ipong kople mama Jehudi khünakbu: nguapabu, lompabu, okax-okhobu, chichangba owapang mwotmixbu khama womle tüipuix, ibu owa hamachu kue chemle chu ma-akax-ngao.

¹⁷ Ikoxlechu athax kue hwom ang thüipu: “Hulax Jerusalem hia ija pan long katukbu pünle ama thomkya khoma kem chemningkya tingtui ma ngole tüipuix ngünle koplax! Hai, kemepi tingnu pan katukbu chatle zaile amüihax ilaxle kem thajao wünhai oshuk ang achangdao hax.”

¹⁸ Ilaxle Zang chemle ku füi womle ngo tamchu ku to fongle hüi, ilaxle chongwangpae ku füi chempangle akaxpuix, ibu kue hwom hama wün. Hwome lan: “Keme zing angkya mwot owang wangdaoa hax!” Ilaxle hwom mwot ma süt ang ajong.

¹⁹ Chemtue Sanballat, Tobiah, ilaxle Arab nok mün ma Geshem le amünkya hwome ija mwot to ajong ang sütkya ozing atatle changpuix, hwome kwom wanjai ilaxle thüi: “Hünzome chemle thütüntoxle ija mwot mok ang ajongpu? Hünzom a chongwangpa füi alünle ang ajong puixnyi?”

²⁰ Kue lan: “Zangkangting Zang-e kwom ang mwotza alai angkya janzüi fa angkya changle. Kwom a chix dabu changpu, ilaxle kwome ibu zaile alai ang mwot ma süt angkya wüi changpu. Ikoxle Jerusalem angkya tuina chem bamachu hünzom ang makuxle thüi angkya chifün müntüi, ilaxle ikha angkya süt-mwotbu bama hünzom ang süntom chemchu müntüi.”