NEHEMIA 10 - OTSAO BAIBEL (BSI)

¹ Ija to pongwang ma sohi shingkya a Gowarnor, Hakaliah sasün Nehemia changkya, ilaxle chix füima Zedekiah shing. Ifüima khünak ibibie shing:

^2-8 Nguapabu: Seraiah, Azariah, Jeremia, Pashhur, Amariah, Malkijah, Hattush, Shebaniah, Malluk, Harim, Meremoth, Obadiah, Danel, Ginnethon, Baruk, Meshullam, Abijah, Mijamin, Maziah, Bilgai, hia Shemaiah hwom bibi.

^9-13 Liwi hwom: Azaniah sasün Jeshua, Henadad saxthom angkya Binnui, Kadmiel, Shebaniah, Hodiah, Kelita, Pelaiah, Hanan, Mika, Rehob, Hashabiah, Zakur, Sherebiah, Shebaniah, Hodiah, Bani, hia Beninu hwom bibi.

^14-27 Khünaknu Lompabu: Parosh, Pahath Moab, Elam, Zattu, Bani, Bunni, Azgad, Bebai, Adonijah, Bigwai, Adin, Atar, Hezekiah, Azzur, Hodiah, Hashum, Bezai, Harif, Anathoth, Nebai, Magpiash, Meshullam, Hezir, Meshezabel, Zadok, Jaddua, Pelatiah, Hanan, Anaiah, Hoshea, Hananiah, Hasshub, Hallohesh, Pilha, Shobek, Rehum, Hashabnah, Maseiah, Ahiah, Hanan, Anan, Malluk, Harim, hia Banah hwom bibi.

Kaxfün-zangwün

²⁸ Kwom, Israel khünaknu, nguapabu, Liwi hwom, Zangshwom-Hom Nyetmixbu, Zangshwom-Hom ma tsaingaomixbu, Zangshwom-Hom ma mwotmok mixbu, ilaxle Zang Wanlom kax ma lax üntoxle kem haxtok ma tüikya mixnok khünakbu füi malualua to atsaile ngopuix, kwom, tamchu awanle lax ang thole tsongdaokya kwom su-sabu hia kakonubu füi tomle,

²⁹ kwom lompabu füi tomle tsaotsüt ma womle, ija kax ma chilaxle jangtüi thüiningle othuak-ozom kop angkya takdün füi, Zang-e chix dapa Mosa makhange fakya Zang Wanlom ma tüikya ningle, kwome Zang kaxtom fang ma ngoüihex-ole tsaopu; kwome Jowanpa, kwom Zang-e, kwom ang koxkya kaxtombu kax ma laxle tüiüi; ilaxle kwom chix wanlombu tamchu ijae lomkya oli pangwüi otya ma thomüi.

³⁰ Kwom chaxwan ma tüile ngokya mixnokbu füi kwome tuiju-nasomle münchang.

³¹ Mixnokbue kwom ang hang ang saxziak hia tütali Sabath nyix kha apüile jangchang, kwome hwom kux münshaküi. Anüt-lükya zanglao to kwome haxtok münmo ilaxle thashebu münthom.

³² Zanglao to keme chakpuix tuita thom achyet ma ahankya kha angkya thom tuita khop ngunkhix Zangshwom-Hom mwot ma bakkya to thap ang kox angkya changle.

³³ Keme ibibi tuina Zangshwom-Hom ma zangshwom pongma lax ang kox angkya oli changle: otsao ankhao, nyixfo to koxkya saxziak tö, nyixfokya to zokle ashunle tö ang koxkya müibu, Sabath foto koxkya otsao töbu, Lyetzün Pangpwonbu, ilaxle mama pangpwonbu, mama otsao töbu, Israel nok ochaxbu pao angkya töbu, tamchu Zangshwom-Hom ma laxli tütalichu kox angkya changle.

³⁴ Kem, khünaknu, nguapabu, ilaxle Liwi hwom, ibue Wanlom ma tüikya ningle zanglao to Zangshwom-Hom ma Jowanpa ang zokle ashunkya töbu koxle changpongma opupu saxthome ha apüile koxüihex ang chizing tswonle changüi.

³⁵ Zangpua foto kwome manzai hia pünziak laimo puamün tö tuita ang Zangshwom-Hom to apüiüi.

³⁶ Kwom ang puxkya tüichongsasa nguapabu hato Zangshwom-Hom to apüiüi ilaxle ikhato Wanlom ma tüikya ningle, ija sasün Zang hanpak ang atsaole koxüi. Kwom maihu hosa puxkya pongwang angkya chuwüi Zang hanpak ang atsaole danüi, ija ningle chun hosa hia zwon hosabu chuwüi atsaole koxüi.

³⁷ Kwome zangpua foto puamün tsaxkho shiklaxle zingkya ankhao chuwüi nguapabu hato Zangshwom-Hom to apüile koxüi ilailaile grepti-ju, olip münga hia pünziak pangnuli puamün tö tuita ningle apüile koxüi. Kwom haxtok manzai angkya bünfong saile laxngokya Liwi hwom hato kwome, kwom haxtok ma laikya manzai puamün kha angkya bünfong apüile koxüi.

³⁸ Ibu bünfong afoxle changpongma Arun makhange hüikya nguapabu chu Liwi hwom füi tomle tüi angkya wüi changpu, ilaxle Zangshwom-Hom ma lax angkya hanpak ang Liwi hwome bünfong akopkop pangwüi kha angkya bünfong Zangshwom-Hom pung ma athüt angkya changpu.

³⁹ Israel khünaknu hia Liwi hwom pangnusae wüi, grep-ti, olip münga ibu a, Zangshwom-Hom tiklakbu thomle tüikya pung, nguapabu mwotmok nui to apüile kox angkya changpu, Zangshwom-Hom nyetmixbu, ilaxle Zangshwom-Hom ma tsaipabu hwom ang mahom-mahom tüikya. Kwome kwom Zang hom otuechu chie-chise le müntox.