NAHUM 1 - OTSAO BAIBEL (BSI)

¹ 1 Ija a Elkosh makhange Nahum-e, Ninewi hanpak ang ngünkya mikngün ohün bama wünkya zangwün changle.

Ninewi füi Jowanpa ang Mongtsikkya

² Jowanpae Khüthak Zang-e chix zan to kale changkya chemchu adu ang müntho; chix füi apüile tüikya mix to chixe sikngün ang tomle. Ibu to chixe mongtsik füi olüix khomle.

³ Jowanpa ang mong chwonpai ma müntsik, ikoxlechu chix a huanuma tsak-zongle tüile ilaxle thaikya mix to sikngün chifa homle müntox.

⁴ Chixe Molo-Tinu ang kaxtom kox, ikoxle ija ti zople zan! Chixe shuajenbu zople zan ang tom. Bashan angkya manzai haxtok zanle pao, Karmel Haxhua khuifople achang, ilaxle Lebanon angkya maipuabu hüile pao.

⁵ Jowanpa miksho ma haxnubu file pao; chix pomtho ma haxhuabu chule pao. Jowanpa ngaipongma chaxwannu alox sile alox; chaxwannu hia ima tüikya khünaknu abün.

⁶ Chemtue chix mongtsikpuix, ozün ma owa ngothoüi? Khompua-atsikkya chix mongtsik chak tokya owa azang thoüi? Chixe wünle ningkya chix mongtsik thokle adüt; chix tunthoma longnubu haxbu ang achangle akhix.

⁷ Jowanpa a müikya changpu; sikngün pongma chixe chix khünaknu kho awa; chix hato mongchatkya khünakbu to chixe hume.

⁸ Tüle chongkya tinu tichap ningle chixe chix zanpabu amüt; chix kax ma chilaxle tüikyabu hato hwom mikmüt ahüi.

⁹ Nange Jowanpa zongto chichangle chemmok ngo? Chixe nang amütüi. Tam wüi chichangba owaechu ito nüile chix füi chialat.

¹⁰ Tsaxkua hia tsaxsabu wün füi zokle ashunkya lailaile hünzom jutok-saxngat mixbu zokle ashun angkya changle!

¹¹ Ninewi, nang makhange, chichang-chizangkya mwotlom awangle koplaxle owawa nguile, Jowanpa zongto chichangle tüi angkya mix a.

¹² Ija a Jowanpae chix khünaknu Israel nok füi akaxkya kax changle: “Asiria nok a tsak-zongle tamchu huanuma tüikoxlechu, hwom a olithule amütdao angkya changle. Ku khünaknu, kue hünzom sikngün ang tomdaoa, ikoxle kue ija tamchatle ile chang ang müntom.

¹³ Athax kue hünzom ma nok tsak-zong ashuk ang tomüi ilaxle hünzom to khale thomkya janbüi afünle awütüi.”

¹⁴ Ija a nok hanpakma Jowanpae tsuakkya kaxfün changle: “Hwom mün thom angkya hanpakma hwom ang osix-oli chemchu müntüiüi. Hwom baozang zangshwom hombu angkya chapabu kue amaüi. Kue nok hanpak ang zukting achwon ngole: hwom a ozün ma ngokoxle ojao münasu!”

¹⁵ Hulax, kaxho mix tuita, müikya kaxho füi haxnukhobu to nguile ngole! Chix a chixe lütkya bama sungdünüi khakha! Judah khünaknu, hünzome pangpwonle nüilax ilaxle hünzome otsingtsing ma chem tsaosaxle changdaopuix, ija Zang ang laxkox. Chichangchizangkya khünakbue hünzom chaxwan tamchatle tingtakle münchangtoxüi. Hwom a komkaile amüt tsuakdaoa!