MÜNCHUAK-TSAI 96 - OTSAO BAIBEL (BSI)

Zang a Akhokya Wanghompa

¹ Jowanpa ang tsaizün tuita ngaokox! Jowanpa hato ngaokox, chaxwannu pangnu!

² Jowanpa ang ngaokox, üntoxle chix achuak kox! Nyixfokya to chixe kem khosünkya kaxho müikya apukkox.

³ Chaxwannu hato chix fuazangkya apukkox, üntoxle chu chix ohünotün mwotbu khünaknu pangnu hato.

⁴ Jowanpa a chongkya changle üntoxle chix a achuakle nwon angkya wüi changle; baozangbu pangnu thak to chix chathua za angkya wüi changpu.

⁵ Mixnok baozangbu pangnu wüi chapabu changpu, ikoxlechu Jowanpa chixe tix zangdingbu zingle alaipu.

⁶ Chongwangpa fuazangkyae chix zui akhople tüile; chix Zangshwom-Hom a osün müikya hia tsak-zonge awangle tüile.

⁷ Jowanpa achuak kox, chaxwannu angkya khünak pangnusae; chix fuazang hia tsak-zong achuak kox.

⁸ Fuazangkya Jowanpa mün achuak kox; chix Zangshwom-Hom to tö koplaxle nguikox.

⁹ Chix ngai pongma Otsaopa tunthoma akhuxkox; chix tunthoma anyon kox, zangfang pangnu!

¹⁰ Pangnu jat-li hama: “Jowanpa a Chongwangpa changpu; chaxwannu a onui ma shingmongle dan thomle ilaxle ija a amok ang münthoüi; chixe sukya kaxfün füi chaxwannu kaxfün faüi”, le thüikox!

¹¹ Chaxwannu hia zangding, mongmüikox! tinu-shinthuk hia ima tüikya zünmok pangwüi akhong kox;

¹² wun kothobu ilaxle ima atüitüi pangwüi, mongmüi-pwonlakox! Faokha tokya pünzuabu mongmüile akhong kox

¹³ apün-awang angkya hanpakma Jowanpa chaxwannu to nguipongma. Masüi-mixlüi chitüile sukya kaxfün füi chixe chaxwannu angkya khünaknu thakma apünüi.