MÜNCHUAK-TSAI 92 - OTSAO BAIBEL (BSI)

Zang Achuakkya Tsai tuita

¹ O Jowanpa, nang ang münchong fa angkya chemtukux müipuix, Khüthak Zang, nang achuak-achenle ngao angkya a,

² nop-fokya to ojen chifünkya nang mongkün apuk angkya a tamchu jafokya to chialekya nang mongong apuk angkya a,

³ janzi füi title zingkya waxmaibu füi üntoxle dingno tomtomle thuaput angaokyabu füi.

⁴ O Jowanpa khomtsikya nang mwotbu füi ku ang mong amüile; nange chempang mokdaopuix, ibu bama mongmüi to ku ngaoüi.

⁵ Jowanpa, nang chak mwotbu chemkuxma chongpuix! Nang tutexbu chemtukux zupuix!

⁶ Ija a anga tuitae tsing ang chithokya oli tuita; owawa ongat mixe awanle lax ang chithokya:

⁷ chichang-chizangkya hingzang ningle tsongle chu tüikoxlax, thaikya mwot mokle ngokyabu ahak-aluale chu tüikoxlax; ikoxlechu hwom a komkaile amütdaoa angkya changle,

⁸ chemthüikoxle Jowanpa nang a othuithuima akhokya changle.

⁹ Nang zanpabu zi angkya, ija kwome awanle, ilaxle chichang-chizangkya pangnu to anao angkya changle.

¹⁰ Nange ku fao maihupong lailaile tsak-zong füi zingpu; nange ku to mongmüi füi mohimanpu.

¹¹ Kue ku zanpabu to lütkya ngündaoa ilaxle chichang-chizangkyabu sopkya zing atatdaoa.

¹² Otsao khünakbu a pam pünbu lailaile ahui-alyale pu-tsaüi; hwom a Lebanon angkya sedar pün lailaile tsongüi.

¹³ Hwome a Jowanpa homkha ma küikya pünbu lailaile, pün oja Zang Zangshwom-Hom ma ahui-alyale owan müile tüipuix,

¹⁴ ojae ipong azukoxle ngaxchu oziak otia ma wüi ziakle ngopuix ilaxle oja othuithuima hingshe le tamchu otsing mongle tüipuix.

¹⁵ Ija makhange Jowanpa a sukya changpule ahole, ikhoma ku kho-awapa ma thaikya ojao müntüi.