MÜNCHUAK-TSAI 91 - OTSAO BAIBEL (BSI)

Zang kem Kho-awapa

¹ Khosün hanpakma opang Jowanpa hato paopuix, Khüthak Zang ziakop wanmong ma opang ngole tüipuix,

² ija khünake chix ang thüitsuaküi, “Nang a ku ziakopmix tamchu kho-awa pa changle. Nang a ku Zang; kue nang to mongongpu.”

³ Mike chingünkya thomzün pangnu chak tokya chixe nang khosünle thomüi ilaxlechu mik amüt angkya kak-lak pangnu chak tokya.

⁴ Chixe nang to chix kui-zang füi ole thomüi; chixe humele nang kho sünle thomüi; chialekya chix mongonge nang ziakople tamchu kho-awale thomüi.

⁵ Zangnak ma nang ningkya thomzün thuachu za-ngo angkya müntüi chichangba anyixningle allele hüikya zansing thua za-ngo angkyachu müntüi.

⁶ Zangnak fangto apong angkya kakma-lakshix thuachu münzaüi chichangba zangngai mik ma lang-huak angkya ochaxbu thuachu münzaüi.

⁷ Nang zui ma hajat-hajat khünak zile paokoxle, nang akhople hajat bün jao, ikoxlechu nang to chem münthüi.

⁸ Chichangchizangkyabu to chemle sikangünpuix nange huüi ilaxle ngünüi.

⁹ Nange Jowanpa a nang kho-awapa ang zingdaoa; Khüthak Zang nang ziakop-pa ang a.

¹⁰ Ikhoma tüta ningkya thamaechu nang to chem münthüiüi, tütaningkya chakmok-janlang mixchu nang homzui to münhüiüi.

¹¹ Nang alele chito nang kho-awale kop angkya hanpakma Zang-e chix kaxtaimixbu nang to hu ang tomüi.

¹² Nang cha long to futle mak chilax angkya hanpakma nang abaxtüi ang hwome nang to hwom chakbu füi künle thomüi.

¹³ Nange pu hia mailangbu nang chifa fang ma thomüi, za-adünkya mailang hia amakya oje füikya pubu a.

¹⁴ Zang-e thüile: “Opange ku to mongkün puix, kue hwom khosünüi ilaxle ku ang Jowanpa le ekyabu kho kue awaüi.

¹⁵ Chemtue hwome ku nyaküihex, kue hwom to lanüi; chemtue hwom thangnak ma asuüihex, ku a hwom füi tüiüi. Kue hwom azünüi ilaxle hwom achuak-achenüi.

¹⁶ Kue hwom ang tsünlo-zaknuile ngo angkya hingho koxüi; kue hwom khosünle kopüi.”