MÜNCHUAK-TSAI 9 - OTSAO BAIBEL (BSI)

Sukya Chix Kaxfün hanpakma Zang ang Münchong Fakya

¹ Kue ku mong makhange nang achuaküi, Jowanpa; Nange mokdaokya ohünotün mwot pangnu bama kue wünüi.

² Nang khokhoma kwome mongmüi tungle tsai ngaoüi. Khüthak Zang, kue nang achuakle tsai ngaoüi.

³ Nang sün ngün pongma ku zangpabu tok anongle pao; hwom chikhothule nguak üntoxle zile pao.

⁴ Nange kaxfün fa masüi-mixlüikya chitüile, nange kuchima sele kaxfün fale.

⁵ Songsari khünakbu tha nange ajaole üntoxle chichang-chizangkya khünakbu nange olithule; hwom a tütuechu texle chiatakle alakle.

⁶ Kem zanpabu a othuithui hanpak ang ashukdaoa; hünzome hwom tingnubu amadaoa, üntoxle hwom a komkaile alakdaoa.

⁷ Ikoxlechu Jowanpa a othuithuima wanghom changpu; chixe chix tüntong kaxfün fa angkya hanpakma zingpu.

⁸ Chaxwannu chixe otsao makhange apün; sukya kaxfün füi chixe chaxwannu kaxfün.

⁹ Müt-mix shun-mixbu hanpakma Jowanpa a khangkhom nui, thangnak pongma khang azang angkya onui.

¹⁰ Jowanpa, opange nang awanle tüipuix, hwome nang to mongong tüiüi; nang hato nguikya khünak owachu nange chilaxle taxüi.

¹¹ Zaion apünle ngokya Jowanpa achuakle tsai ngaokox! Chixe chempang mokdaopuix ibu pangnok-jating to wünkox!

¹² Sikngün apong daokyabu Zang-e texle atakle; hwom sopkya chixe münalak, üntoxle hwom to thaile mokdaokyabu to chixe sikngün fale.

¹³ O Jowanpa! Ku to chingchalax! Ku zanpabue ku sikangünkya to hule koplax! O Jowanpa! Ozik-omüt tokya ku khosünlax!

¹⁴ Jerusalem angkya khünaknu tunthoma ku ajong tsuak angkya hanpakma ilaxle kue nang achuakkya pangnu li bama hwom hama wüntho angkya hanpakma. Ku ang mongmüiüi, nange ku khosünkya hanpakma.

¹⁵ Songsaribue thap tho üntoxle ima dütdaoa; hwom a hwom tsün ma alüile amandaoa.

¹⁶ Chix otsao kaxfün makhange Jowanpa chix sukya ngaile ahodaoa, üntoxle chichang-chizangkyabu a hwom mwot mawüi alüile mandaoa. Selah

¹⁷ Chichangchizangle tüikya hia Zang pongle chikopkyabu pangwüi oshuk a zik changle.

¹⁸ Tuimix-nuakmixbu a jento ema chilaxle thom angkya le münchang; chitüi-chinangkyabu monghom a jento thuple akhix thom angkya le münchang.

¹⁹ Oman, Jowanpa! Owawa angchu nang tupang pün ang taxkox! Songsaribu hünzom hato apüikox ilaxle hwom bama kaxfün tüi angkya kax ngaikox.

²⁰ Hwom a za ang tomkox, Jowanpa; hwom a ziün angkya khünak changpule hwome tikle lax ang tomkox. Selah