MÜNCHUAK-TSAI 83 - OTSAO BAIBEL (BSI)

Israel Nok Zanpabu to Anao angkya Zangjop

¹ O Zang, kax-o ngao-o chithüi sütaxngo; dangja tomtale, kongdi lechu taxngo!

² Hulax! Nang zanpabu a nang zan to kale, nang to miktsakkyabue hyet lomle ngole.

³ Hwome nang khünaknu zongto chimüikya mok ang huxsa ma tungle; nange kho-awale thomkyabu zan to ka ang hwome tungle ngole.

⁴ Hwome thüile: “Oman, keme hwom jat-li thomjole changdao hax, ikoxle tix Israel a othuithui hanpakma alakle changüi.”

⁵ Hwom ile tung angkya ma mong notom ilaxle nang zan to ka ang hwom tata füi zuikhui zingle;

⁶ Edom hia Ishmael nok; Moab hia Hagri nok;

⁷ Gebal, Amon, üntoxle Amalek khünakbu, ilaxle Filistia hia Tair nokbu pangwüi.

⁸ Amon hia Moab nok, Lot su-sa hwom füi chuwüi tuita tsak-zong füikya ningle hwom khato hak. Selah

⁹ Nange Kishon shuanu ma Midi nok tamchu Sisera hia Jabin nokbu to chemle hwondaopuix ija hwom to chuwüi hwonkox.

¹⁰ Endor ma nange hwom to anao, ilaxle hwom mangbu kothofa to shanle pao ang tom.

¹¹ Hwom lompabu tochu Oreb hia Zeeb hwom to hwonkya ningle hwonkox; Zebah hia Zalmunna to lütkya ningle hwom apün-adale ngokyabu tochu anaokox,

¹² chemthüikoxle Zang haxtok a hwom kux ang laxhaxle hwome thüile.

¹³ O Zang, hwom a haxbu ningle chiakle pao ang tomkox, zangwin to tsaxsa jeple paopu ningle a.

¹⁴ Wüne fao zokle ashunkya ningle, wünle-e haxhua wün ang achangkya ningle,

¹⁵ nang zangchei füi hwom jwonle apaokox ilaxle nang zangchei cheinu füi hwom chabüt-lasün ang tomkox.

¹⁶ Jowanpa, zakkope hwom thün to chwop ang tomkox, ilaxle hwome nang tsak-zong changkox-ale thüi ang tomkox.

¹⁷ Hwom to othuithui hanpak ang lüt üntoxle za-adünle khomtsi ang tomkox; chingchingchichale hwom zile pao ang tomkox.

¹⁸ Zangfang pangnu thakma apünkya a Jowanpa a nang tata wüile hwome tsing ang tomkox.