MÜNCHUAK-TSAI 81 - OTSAO BAIBEL (BSI)

Pangpwon Tsai tuita

¹ Kem wintuk-hanthakya Zang füi mongmüile akhong kox; Jakop Zang achuakle tsai ngaokox!

² Büi-hong samthule khopsya akhaokox; apase tsutsule thuaput-waxmaibu mütle changkox.

³ Lyetzün dongle hia lyetnu komle changpongma, pangpwon hanpakma nyazong mütle changkox.

⁴ Ija a Jakop Zang tokhange hüikya kaxtom, Israel nok ma wanlom changle.

⁵ Chixe Ijip nok to single changpongma chixe ija a Israel khünaknu ang kox.

⁶ Kue nang tok angkya hünlit wütle laxpu; hünzom huaklong hün tsong kue wütle ajo fapu.

⁷ Chemtue hünzome sikngün apongle changpuix, hünzome ku sepu, ilaxle kue hünzom khosünle koxpu. Zangchei-zangfwom nukto ku azwonle ngokya khato khange kue hünzom to lanpu. Meribah shua ma kue hünzom to thwontsingpu. Selah

⁸ Ku khünaknu, ku kaxkhün to apahüi; Israel khünaknu, hünzome ku kax to apakoxbae le texpu!

⁹ Hünzome chemtuechu mama zang to chishwom angkya münchang.

¹⁰ Ku a Jowanpa hünzom Zang changpu, Ijip nok tokya hünzom kue apüipu. Hünzome wikha lanle akahüi, ilaxle kue hünzom tuxüi.

¹¹ “Ikoxlechu ku khünakbue ku kax to chiapa; Israel noke ku kax ma chilax.

¹² Ikhoma kue, hwome mokse tsukyakya mokle hwom ang natütle pao ang tom.

¹³ Ku khünakbue ku kax ma laxle namtüibae texkox chemning chitüi; hwome ku kax ma laxle kangtüibae texkox chemning chitüi!

¹⁴ Kue hwom zanpabu to lütlaxle hwom zanbu pangwüi chak ma kop ang those.

¹⁵ Ku to miktsakle ngokyabu zalaxle ku chitong to akhuxse; hwom sikngün ma oshuk chitüile changse.

¹⁶ Ikoxlechu kue hünzom a müikya wonglai sax füi tuxüi üntoxle fao nax-tibu füi hünzom mongzom-müi ang tomüi.”