MÜNCHUAK-TSAI 80 - OTSAO BAIBEL (BSI)

Onok Tamchatle Zingle Achat angkya hanpakma Jopkya

¹ Kwom to apahüi, O Israel Chunnyetpa; kwom zing atatlax, nang chun zyem lompabu zing a. Hozang füikya zünmok okho ma nang ngwotnui ma thung laxle,

² Efraim, Benjamin hia Manasseh homjen hwom hato ma ngaile ahole. Kwom hato nang janzüi ahohüi; Nguihüi üntoxle kwom khosünhüi!

³ O Zang, kwom tamchatle achat hüi! Kwom hato nang chingcha ahohüi, ikoxtix kwom khosün ang kopüi!

⁴ Nang khünaknu zangjop füi nang chemtukux mongtsikle ngoüi, Khüthak Jowanpa?

⁵ Nange kwom ang mongtsik sax ang tomle, chongkya pe tuita ma awangkya mikfitibu aling.

⁶ Kwom haxtok ma atinle tomzi chaxwanbu azan ang tom; kwom zanpabue kwom to adix-ada.

⁷ Khüthak Zang, kwom chatle chat ang tomhüi! Kwom ang nang chingcha ahohüi, ikoxtix kwome khosün ataktsuaküi!

⁸ Nange Ijip nok tokya grep zu apüipu; nange mixnokbu jwonle apaolaxle ibu hwom haxtok ma thwompu.

⁹ Nange ija tsale tsong angkya hanpakma onui zangle atsaopu; ija otsing zule ju, ilaxle ijae haxtok pangwüi to u.

¹⁰ Haxhuabu to ijae zangkhung füi o; ija zubu füi tüpong-tüpongkya sedar pünbu to alum.

¹¹ Ijae okangbu Mediterenian tinu alople alyale apao ilaxle ijae Eufrat shuanu jao alople chang.

¹² Nange ija akhople tüikya tsawat büthüikoxle pünle ama? Athax a imakhange alele khünake ija grep oziak ahuxle khai ang tsuak;

¹³ müilabue ibu to ocha füi nakle, ilaxle faomüibu ija saxlaxle ngole.

¹⁴ Kwom hato chat-hüi, Khüthak Zang! Zangkangting tokhange kwom to huhüi; nguilaxle nang khünaknu khosünhüi!

¹⁵ Nange küitoxkya ija grep zu khosünle kop-hüi, nange owan müile tsong ang tomkya ija zusa a!

¹⁶ Kwom zanpabue ija to wün füi zokle ilaxle hamle langle; ibu to mongtsik ashukle hule ilaxle thomjole chang ang tomle!

¹⁷ Nange zünle kopkya khünakbu panle thom hüi ilaxle hwom kho-awale changhüi, nange tsak-zong ang tomkya jat-li tuita a.

¹⁸ Kwome tütue chu nang hato tok münaho; kwom ozün ma thom hüi, ilaxle kwome nang achuakle changüi.

¹⁹ Kwom chatle chat ang tomhüi, Jowanpa Khüthak Zang. Kwom hato nang chingcha ahohüi, ikoxle tix kwom azangle ngo ang tsuaküi.