MÜNCHUAK-TSAI 78 - OTSAO BAIBEL (BSI)

Zang üntoxle Chix Khünaknu

¹ Ku khünakbu, ku hwot-nwot to apalax, ilaxle kue akaxkya to mongkoxlax.

² Kue je füikya wanwünkaxbu twon angkya ilaxle kaile toxdaokyabu makhange ohünotünbu akhix-akhanle fa angkya changle,

³ keme atatle tamchu awanle hüidaokyabu makhange, kem pupa hwome kem hama wünle toxkyabu makhange.

⁴ Keme ibu kem su-sa hwom thoto pyenle münthomüi; keme füinao hwom hama wünle koxüi Jowanpa tsak-zong hia chix mwotbu bama a ilaxlechu chixe mokdaokya ohünotün mwotbu bama a.

⁵ Chixe Israel khünaknu ang wanlombu kox ilaxlechu Jakop su-sa hwom ang kaxtombu kox. Chixe kem pupa hwom ang adangle fa chix wanlombu su-sa hwom hama apua angkya a,

⁶ ikoxle tix füinao hwome ibu tsingle naxkoplax ang üntoxle hwome chuwüi taile su-sa hwom hama naxwünlax ang.

⁷ Ile hwome chuwüi Zang to mongong thom ang thoüi ilaxle chixe mokdaokyabu alakle chiasamüi, ikoxle chix kaxtombu kax ma laxle tüiüi.

⁸ Hwom a hwom pupa hwom lailaile, alünle ajongle hia kax ma chilaxkya khünakbu ang chichangüi, chemthüikoxle Zang tokya hwom mongong ma chemtuechu shingmongle chichang ilaxle hwom a chialekya mongong füi chingotsuak.

⁹ Efraim khünakbu, hap hia sanbu füi akhyep-adi laxle, apongle azankya nyix a zikle pao.

¹⁰ Hwome Zang füikya Tsaotsüt thom ang chitho; hwome chix wanlombu müntopu le angam.

¹¹ Chixe chem mokdaolaxpuix ibu hwome alakle asam, hwom mike ngünle chixe mokkya ohünotün mwotbu a.

¹² Ijip nok to Zoün haxsha ma hwom pupa hwome hule ngopongma, Zang-e ohünotün mwotbu mok.

¹³ Chixe tinu ahakle ahan ilaxle imakhange hwom tale le ang tom; chixe tinu a katuk lailaile tangle ajong ang tom.

¹⁴ Anyixningle chixe zangfwom füi hwom azüi ilaxle zangnaknu akaile zangngai füikya wünzung to hwom aham.

¹⁵ Sak-hax to chixe longnu afi ang tom ilaxle ija homongkha tokya hwom ang ti kox.

¹⁶ Chixe longnu homongkha tokya tümik fuakle lai ang tom ilaxle ti a shuajen ningle jenle ju ang tom.

¹⁷ Ikoxlechu hwome Zang zongto ochax lyenkya tamchizak, ilaxle sak-hax to hwome Khüthak Zang füi alün ang süt.

¹⁸ Hwome saxse tsukya süt jukya makhange hwome chaktung-chaktung ma Zang to thwontsing.

¹⁹ Hwome Zang zongto kaxma thüile akax, “Sak-hax to Zang-e süt koxtho ang chami?

²⁰ Chixe longnu afi ang tomkya a otsingwüi changpu, üntoxle ija makhange thokle-thokle ti jenle lai; ikoxlechu chixe kem süt koxlaxle chix khünakbu ang müi koxtsuak ang chami?”

²¹ Ikhoma hwom kax atatkya zuma Jowanpa ang mongtsik, üntoxle hwom füikya chix mongkün sisile chong,

²² chemthüikoxle hwome chix to mongong chitüi üntoxle chixe hwom khosün ang thoüile chiong.

²³ Ikoxlechu chixe ding angkya zangkho füi akax ilaxle ija okadaple chang angkya kaxkox;

²⁴ hwome sax ang manna ajokya makhange chixe hwom ang zangkho tokya saxziak kox.

²⁵ Ikhoma hwome kaxtaimixbue süt sax, üntoxle hwome laxse tsukya pangwüi hwom ang kox.

²⁶ Chixe handünchi zangwinechu jep ang tom; üntoxle chix tsak-zong makhange shuathongchi zangwin cheile ama;

²⁷ üntoxle shuakax angkya fix bütale chix khünaknu hato osabu ajo;

²⁸ ibu a hwom thongnui osung ma hwom nyihombu akhople düt.

²⁹ Ikhoma khünaknue ibu mongtex ma shale saxle mongzom müi; Zang-e hwom ang laxse tsukyakya komle kox.

³⁰ Ikoxlechu hwom müi-nyax ma azamkya zam tamchimüitox üntoxle hwome saxle wüi ngo,

³¹ chemtue Zang hwom füi mongtsikpuix, ilaxle hwomkha angkya mixtsak-naomüi, Israel khünakbu khama sümüikya mixsün hwom langle changpuix.

³² Ile changkox-ngaxchu khünakbue ochax lyen lüwüi ngo; ipongpongle chix ohünotün mwot ngünlaxle ngaxchu hwome chix to mongongkya chitüi.

³³ Ikhoma chixe hwom hanpakbu zak tamdünkya ningle üntoxle chu allele hüikya thama ma hwom hanpakbu ashuk ang tom.

³⁴ Chemtue chixe hwomkha angkya züizüi langüihex; hwome mong alüix üntoxle chix to mongkoxle jopüi.

³⁵ Zang a hwom kho-awapa changkya, ilaxle hwom to fong ang Khüthak Zang hwom to fong ang nguikya hwome texle atak.

³⁶ Ikoxlechu hwom zangwün pangwüi othai changkya; hwome akaxkya tuita ngaxchu khütkhile laxfang chitüi.

³⁷ Hwom a chix kax ma laxle chitüi; hwom a chix füikya tsaosüt Tsaotsüt bama chialekya mongong füi chingotsuak.

³⁸ Ikoxle Zang-e chix khünaknu to chingchajaja. Chixe hwom ochax thailak tüi ilaxle hwom amüt ang chitom. Obithomthom ma hexle chixe hwom füikya chix mongtsik abaxle tüi ilaxle mongtsik adule hüi.

³⁹ Hwom a zile paoün angkya muakya khünakbu changpu, athax jeple toxkya zangwin paole samkya ningle le chixe texle atak.

⁴⁰ Sak-hax to tüipongma hwome janchiabale ku füi chemle alün-aloxpuix; hwome chix ang mong obithom ma amapuix!

⁴¹ Chatchatnaole hwome Zang to thwontsing ilaxle Israel nok Otsao Zang to kak ang tom.

⁴² Hwome achongkya chix tsak-zong alakle asam üntoxle zan nokbu chak tokya chixe hwom khosünle kopkya nyix texle chiatak.

⁴³ Ijip nok angkya Zoün haxsha ma chixe mokkya khomtsikya hia ohünotün mwotbu mong majao chithom.

⁴⁴ Chixe shuanubu aji ang achang, ilaxle Ijip noke ling ang ti ojao chitüile chang.

⁴⁵ Chixe hwom hato hwotbu huanuma alaile ibue hwom to sikngün ang tom, ilaxle lukbu makhangechu hwom haxwan ama ang tom.

⁴⁶ Hwom saxbu sax angkya hanpakma chixe kuknubu ahüile hwom manzai olithu ang tom.

⁴⁷ Chixe hwom grep zubu jun adütle thomjo ang tom ilaxle hwom fupsa pünbu thuple ama ang tom.

⁴⁸ Chixe hwom maihubu jun füi thuple lang ang tom ilaxle chunzyembu zangtsake haple lang ang tom.

⁴⁹ Zikmüt-mangkho kaxhomix ningle nguilaxle chix mongtsik thokle tamchu hwom khang ma hongle, chixe hwom to huanuma kak-kox.

⁵⁰ Chixe chix mongtsik abaxle chitüi chichangba hwom to chak chimokle chitox, ikoxle okak-olak ahüile mik max ang tom.

⁵¹ Ijip nok pangnu homkha tokya chixe tüichongsasa mik-amüt.

⁵² Ifüima chixe chunnyetpa tuita ningle chix khünaknu alaile pao ilaxle sak-hax akaile hwom lomzun.

⁵³ Chixe hwom chaza angkya chitüile azüi, ilaxle hwom ojao chizale aham; ikoxlechu tinu shinthuk a hwom zanpabu ding to atüile hüi.

⁵⁴ Chixe hwom chix otsao haxtok to apüi, chix jaoe lütle kopkya haxnu to a.

⁵⁵ Chix khünakbu nguikya füi tomle ikhato ngokya khünakbu chixe jwonle apao; chixe ija haxtok Israel nok saxthom-homjen bama ahanle lax ang tom ilaxle chix khünaknu ang hwom ngo angkya hom-haxbu kox.

⁵⁶ Ikoxlechu hwome Khüthak Zang zongto chichangle tüi ilaxle hwome chix to thwontsing. Hwome chix kaxtombu kax ma chilax,

⁵⁷ ikoxle hwom pupa hwom lailaile hwom chuwüi alün-aloxle kax ma chilaxle tüi, kwomkexkya san kia to ong ang chimüikya ningle.

⁵⁸ Hwome hwom songsaribu bao shwomnuibu makhange chix mongtsik ang tom, ilaxle hwome chapabu makhange chix tüle shix-ma ang tom.

⁵⁹ Chemtue ija ngünpuix, Zang ang mongtsik dong, ikhoma chixe chix khünaknu komkaile awüt.

⁶⁰ Chixe Shiloh angkya chix nyihom danle tox; ikha a kem khato chix ngonuikya hom changkya.

⁶¹ Chixe kwom zanpabu ang Tsaotsüt Suak kople pao ang tom; ija a chix tsak-zong hia fuazangle tüikya münwan changkya.

⁶² Chix a chix khünaknu füi mongma ilaxle hwom zanpabu chak to hwom mik max ang tom.

⁶³ Naosünbu a zan ma lang ang tom, ilaxle naochabu aju-asom angkya owangax chitüi.

⁶⁴ Changnong-pünthomle changkya khoma zompu-zangpabu mik max angkya atak, ilaxle hwome toxkya zomnubu a mangsop ang ngaxchu chitom.

⁶⁵ Oshuk ma jiple ngokya zopupule Jowanpa zo; chix a mixtsak-naomüi tuita jutokmix ningle tüikya.

⁶⁶ Chixe chix zanpabu jwonle achat; othuithui hanpak ang hwom to zak-akople lüt.

⁶⁷ Ikoxlechu chixe Jusep su-sa hwom chixe chilaxle awüt; chixe Efraim homjen zünle chikop.

⁶⁸ Itülüi chixe Judah homjen wüi zünle kop üntoxle chixe mongbakle koxle künkya Zaion Haxnu wüi zünle kop.

⁶⁹ Zangkangting tokya chix hom lailaile ikhato chixe chix Zangshwom-Hom zai; chixe ija chaxwannu lailaile oshing-mongle zing, tütue chu chaza angkya jao chitüi lea.

⁷⁰ Chixe chix dapa Dawid zünle kop; chixe chun nye ang ngokya chix zünle kop,

⁷¹ ikhato chixe chun ozyembu to hule ngokya changkya, ilaxle chixe Israel nok wanghom ang chix achang, Zang khünaknu chunnyetpa ang chix achang.

⁷² Dawid-e masüi-mixlüikya chitüile mongkoxkya füi hwom to hume ilaxle tsing-wankya füi chixe hwom lomzun.