MÜNCHUAK-TSAI 73 - OTSAO BAIBEL (BSI)

AZOM-LÜKYA LAIPEX (Mts 73-89) Zang Sukya Kaxfün

¹ Israel nok hanpakma Zang a otsingtomtata ma müile, mong tsaothale tüikyabu hanpakma a.

² Ikoxlechu kue muaküsa bama mongong chiasam wüi; ku mongong bamaxmaxsa,

³ chichang-chizangkyabue apongkya shomüi ngünlaxle kue ongam to zalole changkya khoma.

⁴ Tsütle kakkyae hwom sikngünkya chitüi; hwom a otsak-ozong füi tsangtsa fan müile ngo.

⁵ Mix lailaile hwom sikngünle chingo; mix ang tüikya tingtui hwom ma ojao chitüi.

⁶ Ikhoma hwome likwün lailaile ongam aliklaxle ngo ilaxle changnong-pünthomle tüikya a zapua ang laxlaxle ngo;

⁷ hwom mong makhange ochax thokle alai, ilaxle hwom kün-mongbu a chichang-chizangkya tutexbue awangle chakjao chingaile ngo.

⁸ Hwome mix chanyi ilaxle ochax baozangbu mowün; hwom ongambu ilaxle mix to afangle thom ang tunglanle ngo.

⁹ Zangkangting tokya Zang mowün amale hwome zangwün ilaxle chaxwan tokma tüikyabu ang hwom kaxkax ma wüi angkya le atsangle kaxtombu kox,

¹⁰ ikhoma Zang khünakbu ngaxchu hwom hato wüi chat ilaxle hwom zangwün to mongtsutsule ong.

¹¹ Hwome thüi: “Zang-e münawanüi; Khüthak Zang-e münataküi.”

¹² Hwom ang okhonguile tüile ilaxle jento onui nui kople ngole.

¹³ Kue ku lualua to atsaole thomkya üntoxle kue ochax chilyenle ngokya a obato hia?

¹⁴ O Zang, nange ku han ahomle sikngün ma ngo ang tom; nange ku to nop-fole sikangün.

¹⁵ Kue iningkya jangakax daoba, kue nang khünak tuita ningle mok-saxle ngose münchang.

¹⁶ Kue ija tingtui komkaile ajang ang azongdaoa, ikoxle ija a ku hanpakma huanuma tsakkya tuita ang changle

¹⁷ ku nang Zangshwom-Hom to mapao tanto. Ifüima kue chichang-chizangkyabu to chemle chang angkya hex awanle.

¹⁸ Nange hwom a lyakle nünkya khato thomüi üntoxle hwom a zile pao ang tomüi!

¹⁹ Hwom a chaktung-chaktung ma amüt; hwom a khomtsile max angkya hato ahüi.

²⁰ Hwom a zangngai thoma maxünle bangkya wünmang tuita lailai; chemtue nang zopuix, O Jowanpa, ibu a samle pao.

²¹ Chemtue ku tutex oma ma tüikya hex üntoxle ku mongjang thomzün laxle tüikya hex,

²² ipongma ku a müi ningle ongat ang ngokya; kue nang jao chitsing.

²³ Ikoxlechu ku jento nang zui ma ngo, ilaxle nange ku to nang chak füi kople thom.

²⁴ Nange adangle fakya füi ku lom azüi ilaxle oshukma nange ku achuakachenle pongle kop angkya changle.

²⁵ Zangkangting to ku ang nang boma owa tüi? Ku ang nang tüiün füima, chaxwannu ma kue chem lax angkya tamtüi?

²⁶ Ku tutex hia tsangtsa azu lechu chang koxlax, ikoxle Zang a ku tsak-zong changle; othuithuima kue lomkya a chix tix changpu.

²⁷ Ku danle toxkyabu a maxüi jaojao; nang to ojem chifünkya mongong chithom tsuakkyabu nange amütüi jao.

²⁸ Ikoxlechu ku hanpakma, Zang zui ma ngo angkya chemtukuxkya ohünotün changüihex, Khüthak Jowanpa hama, chix ziamong ma ngo ang kop angkya üntoxle chu chixe chempang mokdaopuix ibu bama khuapule ngo angkya a!