MÜNCHUAK-TSAI 7 - OTSAO BAIBEL (BSI)

Sukya Kaxfün bama Zangjopkya

¹ O Jowanpa, ku Zang, ku nang hato ku kho awahüi le nguipu; ku achuale ngokyabu pangnu chak tokya ku azünhüile nguipu,

² chichangthüiba mailang tuitae tswonle paopupule hwome ku tswonle paoüi, ikhato ku owaechu sünle kop ang chithoüi, ilaxle ikhato hwome ku ashik-afünle awütüi.

^3-4 O Jowanpa, ku Zang, kue owawa zongto thaile jangchangdaoba, kue zuikhui owawa jangdyendaoba chichangthüiba chemtsai-chemkax chitüi khato kue ku zanpa — owawa zongto changnong-pünthomle jangtüidaoba kue ibu tuita ngaxchu mokle jangchangdaoba:

⁵ ile jangchangdaoba ku zanpabue achua laxle ku naxkopkox, hwome ku texle anguak laxle naxlang kox ilaxle ku omang ang achangle hax to awütle naxtoxkox! Selah

⁶ Nang mongtsik füi ajongkox, O Jowanpa! Tüle shixkya ku zanpabu füi alünle ajongkox; nang ajongkox üntoxle ku to asunkox! Nange lomkya a sukya kaxfün changle,

⁷ idaile khünaknu pangwüi nang akhople apüikox, üntoxle thakchi tokhange hwom to apünkox.

⁸ Nang a khünaknu pangnu kaxfünpa changle. Kuchi ma sele kaxfün fahüi, O Jowanpa; nange awan ngopu ku a chemmün chiawankya mix changpule.

⁹ Nang a otsao Zang changle üntoxle kwom tutex hia küntsu-monglua kaxfün fale. Chichangchizangkyabue mokkya ochax mwot zak ang tomkox üntoxle sukyabu ang hingho fakox.

¹⁰ Zang a ku kho-awapa changle; chix kax ma laxle tüikyabu chixe sünle.

¹¹ Zang a otsao kaxfünpa changle üntoxle othuithuima chichangchizangle tüikyabu thajao ang tomle.

¹² Hwome hwom lomtangbu chilüi jangthüi, Zang-e chix changlo wunle anaxüi. Chixe chix hapnu kun üntoxle ija achwonüi;

¹³ mik amüt angkya chix chang-paxbu laxüi ilaxle wünchua füikya chix sanhap füi ziüi.

¹⁴ Hulax chichang-chizangkya khünakbue chemle ochax mwot ajangle koppuix; hwome sikngün apong angkya katzua laxle üntoxle dyen-ngankya wanlom twonle.

¹⁵ Ikoxlechu mix hanpakma thakya hwom kam ma hwom wüi alüile manle.

¹⁶ Ikhoma chichang-chizangkya ma mwote hwom to alüile sikngün fale ilaxle changnong-pünthomle tüikya hwom mwote hwom to mak-khale.

¹⁷ Chix sukya kaxfün khoma kue Jowanpa to münchong fapu; Khüthak Jowanpa achuakle kue tsai ngaopu.