MÜNCHUAK-TSAI 69 - OTSAO BAIBEL (BSI)

Fonghüile Sopkya

¹ Ku khosün hüi, O Zang! Ti a ku dingkux kople tüile;

² Ku a tüle zukya thom ma manle tüile, hax tsakle mongkya kha müntüi; ku a zukya tinu tanti to tüile, ija tichapbue ku a khang ang tomüikhakha.

³ Fong angkya nyakle akhongkyakyae ku zongshole maxündai, Ilaxle ku dingdua a zanle maxngole. Nang nguilaxle ku khosünle kop angkya hanpakma kue nang tanle hungopu.

⁴ Opange amuamuale ku to tsak-khule ngolaxpuix hwom a ku khangmun füi ngaxchu lüile tüile. Ku zanpabue ku bama khualople zangwünle; hwom ma tsak-zong tüile ilaxle hwome ku mik-amüt-sele tsule. Kue chiahuxkya tuina hwome ku ma tsangle.

⁵ O Zang, ku ochaxbu a nang tunthoma pyenle chitüi; ku chemtukuxle ongat changkya hex nange awan ngopu.

⁶ Kue nang to ongkyabu ang zak-akop ang taxtom, Khüthak Jowan Zang! Kue ang to shwomkyabu ang mong amakya tüi ang taxtom, O Israel nok Zang!

⁷ Ku thajao-wünhaikya a nang hanpakma changle ilaxle ku a thünzake akhup laxle tüile.

⁸ Ma haxnu-homsabu zongto ku a tuita mixnok ningle sütle.

⁹ Nang Zangshwom-Hom to mongkoxkyae ku to wün füi zokpupule zokle; nang ajao-ahaile akaxkya kaxbu ku khangkho ma dütle.

¹⁰ Ku ku lualua to puinaipu chisax-chilingle atsaokya makhange, ilaxle khünaknue ku adix-adapu;

¹¹ Kue alüile mangsop nyi-za laxpu, ilaxle hwome ku chanyile wanjai.

¹² Hwome tingjang lomnu to ku mowün, ilaxle jutok-saxngat mixe ku ajaole tsai zingle ngao.

¹³ Ikoxlechu ku hanpakma, kue nang towüi jopüi, Jowanpa; nang mongtsukya khama, nange ku zangjop to lanhüi, Zang. Nang mongkün chongkya khoma ku zangjop to lanhüi, chemthüikoxle khosün ba angkya nang kaxtsao nange otia ma thomle.

¹⁴ Thomkha to dütle maxüi ku azünhüi; ku zanpabu chak tokya ku sünle thom hüi, tüle zukya tinu chak tokya khosünle a.

¹⁵ Tinu-mualyemkya ku hato hüi ang taxtom; jithong to adütle laxle ku tie ling ang taxtom chichangba zuk khae ku saxjokpupule jok ang taxtom.

¹⁶ Chithaile müingokya mongkün füi ku to lanhüi, Jowanpa; chongkya mongkün-chingcha füi ku hato chat-hüi!

¹⁷ Nang dapa thoto nang taxpyen; ku huanuma fuxtsüile tüile: athaxwüi ku to lanhüi!

¹⁸ Ku hato hüilaxle ku sünle kop-hüi; ku zanpabu chak tokya ku azünhüi.

¹⁹ Ku to chemtukuxle adix-ada puix, ija nange tsingle ngopu, ku ang mong chemtukux amapuix tamchu chemtukuxle ajao-ahaipuix; nange ku zanpabu pangwüi ngünle ngopu.

²⁰ Ajao-ahaikyae ku mong ashixle, ilaxle ku a khopi-napale tüile. Kue chingchajaja to sunghudaoa, ikoxle owaechu chingchakya chitüi; ku mong asomkya angkya khünak kue tuita chiatak.

²¹ Ku woknuak ma maxle changpongma, hwome ku ang zik-hing ningkya oma-oshix kox; chemtue ku tilan maxle tüipuix, hwome zik-hing sikya ningkya tisik kox.

²² Hwom fongkhate hwom thama ang naxtom; hwom huxsa fongkhate hwom athomle naxadüt.

²³ Hwom to chakmokle mik asut ang tomkox! Hwom tok-khia jento naile max ang tomkox!

²⁴ Nang mongtsik hwom dingma thokkox; nang mongtsike hwom sikangün kox.

²⁵ Hwom thongnuibu a owachu chitüile tox ang tomkox; hwom nyihombu ma owachu ozün ma ngo ang taxtom.

²⁶ Nange sikangünkyabu to hwome zothup; nange mak-khale changkya sikngün ibu bama hwome zangwün.

²⁷ Hwome ochax lyenkyabu laiza ma bakle thomkox; nang khosün ma hwom ang chem süntswon tüi ang taxtom.

²⁸ Khüzün Laipex angkya hwom mün fwotle naxamütkox; ilaxle hwom a nang khünaknu münzakya khato naxathütkox.

²⁹ Ikoxlechu ku a luakle kakle tamchu khosam ma tüile; ku nwonhüi, O Zang, ilaxle ku khosünhüi!

³⁰ Kue tsai tuita füi Zang achuaküi; kue chix a münchong fakya makhange chix chongle zaxzangkya khuapuüi.

³¹ Ijae Jowanpa ang, chix ang tsom-pom tö koxkya tok to kaile mongmüi angkya changle, owüiole ziakho nguidaokya maihupongpa koxkya füi ngaxchu sütsexle.

³² Chemtue mix fangto ngokyabue ija ngünüihex, hwom ang mongmüikya tüiüi; opange Zang to shwomle tüipuix, hwom ang mong achenüi.

³³ Tuimix-nuakmixbu to Jowanpa nathale ilaxle kunkha to tüikya chix khünakbu chixe otuechu münalak.

³⁴ O ding-hi-hax, tinubu üntoxle chu ima tüikya zünmok pangnusae Zang achuak kox,

³⁵ Chixe Jerusalem khosünüi üntoxle Judah angkya tingnubu tamchatle zingle azünüi. Ikhama chix khünakbu hom-hax zailaxle tingtok kople ngoüi;

³⁶ chix dabu su-sa hwome ija haxtok mantswon kopüi, ilaxle opange chix to mongkünpuix, hwom ikhama ngoüi.