MÜNCHUAK-TSAI 66 - OTSAO BAIBEL (BSI)

Achuakkya hia Münchong Fakya Tsai

¹ Khünaknu pangnu, pwonlatungle akhongle Zang achuak kox!

² Chix mün fuazangle tsai ngaokox; achuak-achenkya fuazang chix ang laxkox!

³ Zang ang thüikox: “Nange mokkya mwotbu chemtukuxle ohünotünhex! Nang tsak-zong huanu changpu zanpabue zalaxle nang tong to puile.

⁴ Haxwan tok angkya pangnusae nang to shwomle; hwome nang achuakle tsai ngaole, hwome nang mün to achuakle tsai ngaole.” Selah

⁵ Nguilax üntoxle Zang-e chem mokdaopuix ito hulax, khünaknu tu ma khomtsikya chix mwotbu to a.

⁶ Chixe tinukha haxkozan ang achang; kem pupa hwome tinu cha hua ma tale le. Chixe chem moklaxpuix ija khoma kwom ang pwonla dong.

⁷ Chixe ma janzüi füi apün-awang ilaxle onokbu thakma chix mik thom. Chix füi alünle ajong angkya mix naktüi. Selah

⁸ Pangnu jat-lie Zang achuak kox; hünzome achuakkya ozing naxatat.

⁹ Chixe kem ozün ma thomle üntoxle düt ang chitom.

¹⁰ Nange kwom to thwontsingle ano, Zang; wün füi khop-jan achukle wankya ningle, nange kwom to wanle ano.

¹¹ Nange kwom tsün ma man ang tom üntoxle kwom tokkhya ma lixkya hünlit dan.

¹² Nange kwom zanpabue kwom to nak ang tom; wün hia tinu-mualyemkya akaile kwomle, ikoxlechu athaxpi nange kwom a chaza angkya chitüikya chifün hato apüidaoa.

¹³ Kue nang hom to zokle ashunkya tö apüiüi; kue chem tsaosax daopuix, kue ija nang ang koxüi.

¹⁴ Kue chem koxüihexle akax daopuix ija kue nang ang koxüi ku sikngün ma ngopongma a.

¹⁵ Tötsap ma zokle ashun ang kue chun koxüi; kue maihupongbu hia zwonbu tö ang koxüi, ilaxle wünkhut a dingkho to dongüi. Selah

¹⁶ Zang achuak-achenle tüikya pangnusa, nguilax üntoxle apalax, ilaxle chixe ku hanpakma chem mokdaopuix, ija kue nang hama wünfang.

¹⁷ Fongle fa angkya hanpakma chix nyakle ku akhong; tsaibu makhange kue chix achuakpu.

¹⁸ Kue ku ochaxbu ajao-ahaile jangchangdaoba, Jowanpa-e ku to münapase.

¹⁹ Ikoxlechu otsingtsingma Zang-e ku to apa; chixe ku zangjop to apa.

²⁰ Kue Zang achuakpu, chemthüikoxle chixe ku zangjop chiawüt chichangthüiba ojem chifünle tüikya ku tokya chix mongkün tsyenle chitüi.