MÜNCHUAK-TSAI 65 - OTSAO BAIBEL (BSI)

Achuakkya hia Münchong fakya

¹ O Zang, kwome nang Zaion ma achuak angkya a asukya changle üntoxle nang kaxtsaobu thom angkya a,

² chemthüikoxle zangjop to nange lankoxle. Pangnu khatokya khünaknu nang hato nguiüi

³ hwom ochaxbu hanpakma a. Kwom thaikyae kwom to lütle, ikoxlechu nange hwom ang thailakkya tüi.

⁴ Nange zünle kopkyabu a mongmüi mixbu changle, nang otsao ngwotnui ma ngo ang nange apüikyabu a. Nang homkha ma tüikya müikya tuina füi ku ang mongtexshakya tüiüi, nang otsao Zangshwom-Hom mohimanbu füi a.

⁵ Nange kwom to zan to lüt ang koxle lan, ilaxle kwom khosün angkya hanpakma nange ohünotün mwot mok. Zangfang angkya khünak pangnusae tinu ta to ngokyabue ngaxchu nang to mongongle.

⁶ Nang janzüi makhange nange haxnubu onui ma dan, ile ataxkya nang tsak-zong aho.

⁷ Tinu-tichap akhongle shixle ngokya nange adang üntoxle tichap azingle ngokyabu a; khünaknu tu ma mwop lai ngokyachu nange wüi adang.

⁸ Zangfang pangnu abütle khosam ma ajong nange mokkya mwot akhokyabu ngünlaxle. Nange mokkya mwotbu makhange, kaochi makhange kaochi alople chaxwannu hato mongmüi-pwonla apüi.

⁹ Nange zangwat ajokya makhange nange haxtok to mongkünkya aho; nange ija ahak-aluale tamchu haxzaoe awangle tüi ang tom. Nange shuasabu tümik fuakle tijenkyae awangle chang ang tom; nange chaxwannu ang saxziak awangle fa. Nange ija ile mok:

¹⁰ hanbai daokya haxtok to nange zangwat okhonguile ajo üntoxle ibu nange ti füi zom ang tom; nange hax a nyentibu füi azomle anai ilaxle hozün küikya pünbu tsong ang tom.

¹¹ Nang müikya khoma nange chemtukuxle kwom ang huanuma puamün ang tompuix! Nang ojong khato paopuix ikhato okhonguikya tüile.

¹² Wun a müizyeme awangle; haxhuabu a mongmüie awangle.

¹³ Chunbue zimfa awangle; haxnuchabu a wonglai tsaxe awangle. Pangnusa wüi mongmüi atungle tsai ngaole akhong.