MÜNCHUAK-TSAI 64 - OTSAO BAIBEL (BSI)

Zyakople Kho-awa angkya hanpakma Zangjopkya

¹ Ku ang sikngün ma tüile, Zang: ku zangjop to apahüi! Ku-a zanpabu thua zale: Ku khüzün khosünhüi!

² Chichangchizangkyabu tungkya chak tokya ku kho-awale kop-hüi, ochax khünakbu mwopkya chak tokya-a.

³ Hwome hwom lebu a changlo lailaile wunle anaxle thom ilaxle tsaima-kaxshix a sanhap hanpak ang twon

⁴ Zakkop-ashukkya kaxthai zangwünbu apuk ang hwom tüle mom; hwome khünak mixmüibu ongat khunkhe füi amütle awüt.

⁵ Hwome tungkya chichangchizang mwotlom to tata jikle adüt; kam thale ojongma tsünüihexle hwome zangwün. Hwome thüi: “Ibu a owaechu mün-ngünüi.”

⁶ Hwome ochax mok ang tung, ilaxle thüi: “Keme tsaothale mik-amüt ang tung angkya katzua tsuakdaoa.” Khünak künmong hia woktex a ohünotün changle.

⁷ Ikoxlechu chix sanhapbu füi hwom to hap, ilaxle allele hwome maklax.

⁸ Kax ibu khoma chixe hwom amütüi; hwom ngünkyabu pangnue ngom saküi.

⁹ Hwom pangwüi abütüi; Zang-e chem mokdaopuix ija bama hwome ajangüi ilaxle chix mwotbu mo wünle changüi.

¹⁰ Jowanpa chempang mokdaolaxpuix ija bama otsao khünakbu pangnu ang mongmüiüi. Hwome chix ma chalomlukya ataküi; müikya khünak pangnue chix mün achuaküi.