MÜNCHUAK-TSAI 59 - OTSAO BAIBEL (BSI)

Khangkhosün hanpakma Zangjopkya

¹ Zanpabu chak tokya ku azünhüi, ku Zang; ku to single changkyabu chak tokya ku kho awa thom hüi!

² Ibu ochax khünakbu chak tokya ku sünle thom hüi; ibu mix lang mix mixhuak ngokyabu chak tokya ku azün hüi!

³ Hulax! Hwome ku lang ang tanle ngole; küntsik-mongma khünakbu ku zan to ka ang asoxle tüile. Ija a ku ochax khoma chichangba kue thaile mokdaokya khomale münchang,

⁴ chichangba chemchem ku thaithaxle changkya khoma lechu münchang, O Jowanpa, hwome ipongpong momle ma chwon kop ang zikkya a.

⁵ Zohüi, Jowanpa Khüthak Zang, ilaxle ku to fong ang nguihüi; nange hukoplax, O Israel nok Zang! Zohüi ilaxle ibu songsaribu to sikangün kox; khualop mixbu to chingchakya taxtüi! Selah

⁶ Hwom a hansonge hwom ngwotnui to anongle chatle, tingnu ziakop ang khongkhongkhale hima zyem lailaile.

⁷ Hwome adix-adakya hia aza-anakya to apalax. Hwom lebu a hwom wikha ma changlobu tüikya lailaile, ikoxlechu owaechu hwom zing münatat le hwome thüt.

⁸ Ikoxlechu Jowanpa, nang hwom chanyipu; nange songsaribu pangwüi ajaopu.

⁹ Nang janzüi to kue mongongpu; nang a ku khangkhomnui, O Jowanpa.

¹⁰ Ku Zang-e ku to mongkünle üntoxle ku hato nguiüijao; ku zanpabu to anaokya chixe ku hama ahoüi.

¹¹ Hwom a taxlangünkox, O Zang, chichangba kwom khünaknue alakle asamüi. Nang janzüi makhange hwom to lütlaxle chiakle sam ang tomkox, O Jowanpa, kwom kho-awapa.

¹² Ochax a hwom tunpün ma tüile; hwom zangwün lili bakle ochax; hwom mongngam ma hwom kop ang tomkox! Chemthüikoxle hwome thuakzomle tamchu atsele,

¹³ nang mongtsik füi hwom olithukox; hwom komkaile olithu ang tomkox. Ifüima Zang-e Israel thakma apünle tüikya, tamchu chixe zangfang pangnu to ole apünkya noknusa tsing ang kopüi. Selah

¹⁴ Ku zanpabu a hansonge hwom ngwotnui to anongle chatle, tingnu ziakop ang khongkhongkhale hima zyem lailaile,

¹⁵ hibu osüt lomle zwonwi ngokya ningle tamchu okhonguile osüt chikopba zang angaile aham ngokya ningle.

¹⁶ Ikoxlechu kue nang janzüi bama tsaingaoüi; chizakkya nang mongkün bama nopfo to ku akhongle tsai ngaoüi. Nang a ku hanpakma khangkhom angkya onui ang jao ngole hüi, sikngün apong pongma ku zak-zui angkya lox-o a.

¹⁷ Ku khosepa, ku nang achuaküi. Zang a ku khangkhomnui changpu, ku to mongkünkya Zang a.