MÜNCHUAK-TSAI 58 - OTSAO BAIBEL (BSI)

Chichangchizangkya Khünakbu to Sikngün ang tom angkya hanpakma Zangjop

¹ Hünzom apün-awangkyabue tütue ngaxchu sukya zangwün tsuakle facha?

² Münfa! Hünzome mae moktsuak angkya ochax bama ajang wüi, ilaxle haxtok ma chakmok-janlangle mix mik amütle.

³ Ochax mwot mokkyabu hwom tsüntsün ma thaile le hwome puxkya tokhange wüi kaxthai zang wünle.

⁴ Hwom a pubu lailaile oje-e awangle tüile; putsom naba tuita ningle hwome na zimle,

⁵ chichangba tüle atsingkya hingtwon mix kaxzex chemle chiatat puix, ija lailaile hwome ma nabu zimle.

⁶ O Zang, ibu za-adünkya mailangbu owa akhaidao.

⁷ Ti zople samkya ningle hwom osün chingünle naxsamün; hwom a lomnu tang tokya fumbu ningle cha füi nakle naxakhix dao.

⁸ Hwom a haxbex khato chule paokya khoptua ningle naxchang kox; hwom a zangngai tamchingüntoxle omang ma puxkya naosa ningle naxchang kox.

⁹ Hwome ija awanüi thoto wüi, hwom a hingzang zütpupule zütle awütüi; za-adünkya chix mongtsik füi Zang-e hwom mütle awütüi hwom ozün ma tüipongma wüi a.

¹⁰ Ochax khünakbu to sikangünkya ngünpongma otsao khünakbu a mongmüiüi; hwom a ochax khünakbu aji ma somüi.

¹¹ Khünaknue thüiüi: “Otsingtsingsa ma otsao khünakbu ang hingho koxdaoa; zangfang ang kaxfün fakya Zang tüijao tüile.”