MÜNCHUAK-TSAI 57 - OTSAO BAIBEL (BSI)

Fongkya Lomle Zangjopkya

¹ Ku to chingcha hüi, O Zang, ku to chingcha hüi, chemthüikoxle ku a nang hato khosün lomle nguipu. Tüle zongkya tinu-tichap madang-madangle, nang zangkhung ma kue khosün koppu.

² Khüthak Zang, kue nang nyakpu, ku ang laxli pangwüi fakya Zang, nang a.

³ Zangkangting tokhange chixe ku to lanüi ilaxle ku khosünüi; chixe ku zothuple ngokyabu to anaoüi. Selah Tamchu chizakkya mongkün hia mongong-chalom Zang-e ku ang ahoüi.

⁴ Ku a Zanpabue akhople tüile, hwom a khünak müi saxsele woknuak ma ngokya mailang ningkyabu changle. Hwom owabu a paxtun hia santun ningle junle; hwom lebu a tüle anaxkya changlo ningle tüile.

⁵ O Zang, nang zaxzangkya zangdingkho to ahokox, nang fuazangkya chaxwan pangnu thakma ahokox.

⁶ Ku zanpabue ku kop angkya nya thale; ku to künthang-mongdange lütle tüile. Hwome ku lomtang ma tswom thole, ikoxlechu ija ma hwom wüi alüi wole. Selah

⁷ Komkaile kue nang to ongpu, O Zang; kue tsai ngaoüi ilaxle nang achuaküi!

⁸ Ku chasa, zohüi! Zohüi, ku thuaput-waxmai! Kue zanghan jip azwotüi.

⁹ Jat-libu khama kue nang ang münchong faüi, O Jowanpa. Kue khünaknu tu ma nang achuaküi.

¹⁰ Chizakkya nang mongküne zangdingkhobu alople; chiathokya nang mongonge zangding to thule.

¹¹ Nang chongkya ahohüi zangding to, O Zang, ilaxlechu nang zangfang pangnu khato nang fuazangkya a.