MÜNCHUAK-TSAI 46 - OTSAO BAIBEL (BSI)

Zang Kem füi Tüile

¹ Zang a kem loxkax changpu, üntoxle sikngün pongma fong ang jento achwonle ngokya janzüi changpu.

² Idaile chaxwannuchu kangnax aloxkox, haxnubuchu molo tinu jithong to naxdütkox,

³ tamchu tüle shixle tinu tichap hüikoxchu, ilaxle wukdongkyae haxhuabu sile achenle changkoxchu, kem za angkya oli chemchu müntüi. Selah

⁴ Zang tingnu hato mongmüi apüikya shuajen tuita tüile, Khüthak Zang otsao homlo to a.

⁵ Zang a ija tingnu ma tüile, ilaxle ija a otuechu münmaüi; huazungle zangngai sheme wüi ija to asun ang chix nguiüi.

⁶ Jat-libu a abüt-abanle, wangtingbu a abünle; Zang atsak-adung, ilaxle chaxwannu achuk.

⁷ Khüthak Jowanpa kem füi tüile; Jakop Zang a kem khangkhomnui changpu. Selah

⁸ Nguilax üntoxle Jowanpae chem mokdaopuix, ito hulax. Hulax, chixe chaxwannu ma chemningkya ohünotün mwot mokdaopuix.

⁹ Chaxwannu tok angkya achax-azan ngokya chixe azak; hapnubu chixe apak awüt, paxbu amale awüt, üntoxle dibu wün khato tak.

¹⁰ Chixe thüi: “Azan ngokya zakün, jat-libu khama apünkya, chaxwannu thakma apünkya Zang a ku changle le awanün.”

¹¹ Khüthak Jowanpa kem füi tüile; Jakop Zang kem khangkhomnui changle. Selah