MÜNCHUAK-TSAI 45 - OTSAO BAIBEL (BSI)

Wangcha wanghom Tuiju-nasom Tsai

¹ Osün müikya zangwünbue ku khangka awang, wanghompa hanpakma kue ija tsai zingpongma.

² Khünak khama nang a osün amüikya mix; nang a khosam chitüile zangwünkya mix. Othuithuima Zang-e nang to mohimankya mix.

³ Nang changlo latkoplax, tsak-zong chongle tüikya wanghompa; nang a fuazangkya tamchu apünkya changle.

⁴ Chuak-chongle chix tsaplya khoto nga, otsingtsing hia sukya khose angkya hanpakma!

⁵ Nang sanhapbu a junfix tüile, ibue zanpabu okhax-omong apatle le; jat-libu a nang chitong ma düt akhuxle.

⁶ Zang-e nang ang fakya wangting oshuk chitüile ngoüi. Nange nang khünaknu thakma sule apün;

⁷ achangchang to nange mongkün ikoxle chichangchang thua nang anu. Ikhokhoma Zang, nang Jowan-e, nang kamle kop ilaxle mama-mama wanghombu thakto süchongchongkya mongmüi nang ang thokle kox.

⁸ Ongan müikya jingso hia aloi-münga a nang nyibu ma tüile; luakzongbu füi aza-apuale tüikya chongwang homlobu to tsaipabue nang apwon-asale.

⁹ Nang khwa angkya shekobu khama wanghom sachabu tüihule, üntoxle nang tüntong tsaxchi ma wangcha ajongle tüile; she a hun likwün füi aza-apua laxle tüile.

¹⁰ Wanghompa tuinu, ku kax to apahüi: nang khünaknu hia haxnu-homsabu alakdao.

¹¹ Nang sünmüi-johang to wanghompa ang mongzalokya tüiüi; chix a nang kakopa changle, nange chix kax ma lax angkya wüi.

¹² Tair noke nang hato hinghobu apüiüi; hakpa-luapabue nang mong jikle lax ang azongüi.

¹³ Wangchasa a wanghom homlo ma tüile: she sün a chemkuxma müipuix! She nyiwun a hun zi füi takkya changle.

¹⁴ Ibibile aza-apualaxle she a wanghom hato apüi, she tuiju üithobue zunlaxle, üntoxle hwom chuwüi chix hato apüi.

¹⁵ Mongmüi-pwonla atungle hwom ngui üntoxle wanghom homlo to dong.

¹⁶ Nang, ku wanghompa, nang ang su-sa hwom tüle-tüle tüiüi; ibue hünpu hünpa hwom mantswonle apün-awangüi, ilaxle nange hwom a chaxwannu pangnu apün-awang angkyabu ang achangüi.

¹⁷ Ku tsaie nang mün jento fuazangle ngo ang tomüi, üntoxle pangnusae athax füichima jento nang achuaküi.