MÜNCHUAK-TSAI 42 - OTSAO BAIBEL (BSI)

LAIPEX ANYI (Mts 42-72) Zanda ang Kople Paothomkya Owawa Zangjop

¹ Müikhi tuitae shuasa bang to sim sungkya ningle, kue nang sungpu, O Zang.

² Ozün ma tüikya Zang, nang sungkya tilan kuma tüile. Kue nang ngwotnui to nguilaxle chemtue nang shwom ang thoüi?

³ Zangnak zangngai ku soppu, mikfi ti tix ku süt changpu; ku zanpabue jento ku ma atüile, “Nang Zang a ojongto tüi?”

⁴ Mongmüi atungkya othom tuita, tsai ngaole tamchu Zang achuakle üntoxle tomtomle ahamle hwom lom azuile tüipongma, chemtue ku othom khato Zang hom to paopuix, ledaokyadu texle atak laxle ku mong ashix.

⁵ Chemkhoma ku ang ipongpongle mongma? Chemkhoma ku ang ipongpongle mongsik-ngün? Kue ku mongong Zang ma thomüi, üntoxle tamchatle kue chix achuaküi, ku khosünpa, ku Zang.

^6-7 Zanda ang ngolaxle ikhato ku mong ashixle, ikhoma ku mongjang chix hato achatpu. Chixe ku chasa hato sikngün angkya tinu tichap ahüile; olithu angkyae tichen lailaile ku to tsele, Harmon haxnu hia Mizar haxnu tokhange Jordan shuanu ma tsaktsakdungle dütkya sapnu ti lailaile.

⁸ Ku khüzün Zang ang zangjople ngaokya Ku ma zangnake tsaizu tuita naxtüi ang chizakkya chix mongkün Jowanpae anyixningle naxaho.

⁹ Zang, ku khosepa ang kue thüipu, “Nange ku büthüikoxle alakpu? Ku zanpabu zothup chak ma ku büthüikoxle sikngünlanle ngo ang tompu?”

¹⁰ Hwome adix-adakyae ku zutle akhix ngole, chemthüikoxle chizakle hwome ku ma atüi ngole, “Nang Zang ojong to tüi?”

¹¹ Ku ang büthüikoxle ipongpongle mongma? Büthüikoxle ku ang ipongpongle mongthangpu? Kue ku mongong Zang ma thomüi, üntoxle anaolechu kue chix achuaküi, ku khosünpa üntoxle ku Zang.