MÜNCHUAK-TSAI 41 - OTSAO BAIBEL (BSI)

Kak-lak Pongma Zangjopkya

¹ Mixshix zasabu tuitexle tüikya a mongmüi mix changpu; chemtue thangnak tuitaile changüihex Jowanpa hwom to fongüi.

² Jowanpa hwom khüzün ziakople sünthomüi; ija haxtok ma hwom mongmüi ang tomüi; zanpabu tsak-zong chak to chixe hwom mündantoxüi.

³ Hwom kak-lakle changpongma Jowanpa hwom to fongüi ilaxle hwom kaklak amüile faüi.

⁴ Kue thüi: “Jowanpa, kue nang zongto ochax lyendaoa; ku to chingchajaja tüihüi üntoxle ku kak amüile fahüi.”

⁵ Ku zanpabue ku bama chisumüile tüikya kax akaxle. Hwome ku a naxzikox alakle asamdao angle thütle.

⁶ Ku to hu ang nguikyabu a khünzukyabu münchang; hwome ku bama chimüikya zangwünbu afoxle ilaxle pangnu khato ija wünle ahamle.

⁷ Ku to miktsakkyabu pangnue tata füi ku bama huxsa ma zangwünle, ku zyama bama hwome mongto ajangle laxle.

⁸ Hwome thüi: “Chix a chisumüile kak ngole; chixe chemtuechu chix lya danle müntoxüi.”

⁹ Ku zuikhui amüikya, owato kue ataxle mongong tüipuix, owae ku füi saxtsom ahanle saxpuix, chixe ngaxchu ku zan to kale.

¹⁰ Jowanpa, ku to chingcha tüihüi, üntoxle ku kak amüile fahüi, ilaxle kue zanpabu to jan-nong alüiüi.

¹¹ Hwome ku to lüt ang münthopu, ilaxle ku füi nang mongmüile tüikya kue awanüi.

¹² Nange ku to fongüi, chemthüikoxle kue sukya tix mokpu; nange ku jento nang ngwotnui ma thomüi.

¹³ Jowanpa, Israel nok Zang achuak-achenle changkox! Athax üntoxle othuithuima chix achuakkox! Amen! Amen!