MÜNCHUAK-TSAI 39 - OTSAO BAIBEL (BSI)

Sikngün Apongkya Mixe Ngaikya

¹ Kue thüi: “Kue chem mokpuix khünkhikhile moküi, ku le makhange ku ochax to düt ang müntomüi; Ochax khünakbu ku zui ma tüipongma kue chemchu münakax.”

² Kue kaxfa tuita chiakaxle, ku dangle ngopu, müikya oli bama ngaxchu müntsa! Ikoxlechu ku sikngün zia sümama le male hüi,

³ ilaxle ku to künsum-mongtuie wüi lütle hüi. Kue chemtukux ajangle laxpuix, itukuxle ku sikngün chongle pao; Ile chiatüi homle ku chingotsuak:

⁴ “Jowanpa ku chemtukuxle tsünlo ngoüi? Ku chemtue zing angkya? Ku tsün chemtukux chwonle ashuk angkya hex ku hama apuahüi.”

⁵ Nange ku tsün chemtukux moxle zingpuix! Nang miktho ku tsünjang a chemchu chichangkya ningle. Otsingtomta ma zünmok pangwüi a noxtasa jeple toxkya zangwinsa jaojao, Selah

⁶ chaxba tuita tha ngaxchu münchang. Keme mokkya pangnu chem angchu chichang; keme tuina athünpu, ikoxlechu ija owae koplaxüihex chitik.

⁷ Jowanpa, jangchangthüiba kue chem hanpakma monghom thom angkya dai? Kue ku mongong nang ma thompu.

⁸ Ku ochaxbu pangnu tokya ku khosünle thom hüi, ilaxle ongatbue ku chanyikya tüiang taxtom.

⁹ Ku dangle ngoüi, kue kaxfa tuita münzex, chemthüikoxle iningle ku sikngün ang tomkya a nang changle.

¹⁰ Ibobo ma ku-zo owüi thupünfa! Nang chakthom fang ma ku ziüi khakha.

¹¹ Nange sa-male kwom ochaxbu to sikangün, üntoxle kwome mongkünkya nange siake sikya ningle amüt. Otsingtomta ma kwom a zakdün wünkhut-sa tha ngaxchu münchang! Selah

¹² Jowanpa, ku zangjop to apahüi, ilaxle ku sopkya to apahüi; Ku sop-pongma ku to fong ang nguihüi. Ku putong hwom ningle ku chuwüi onox ma nang wünpa tuita ang nguitox wüi.

¹³ Ku chatle tamchingünle paole samüi thoma ku ang mongmüi obo naxtüilax ang ku tata dantoxhüi.