MÜNCHUAK-TSAI 38 - OTSAO BAIBEL (BSI)

Sikngün Apongkyabu Zangjop

¹ O Jowanpa, nang mongtsiktsik ma ku to sik-taxangün!

² Nange sanhapbu füi ku to maklax ang tom; nange ku hongle atüi.

³ Nang mongtsik khokho ma, ku a müimamale okak ma tüile; ku ochaxbu khoma ku tsangtsa ma komkaile kak paxdaoa.

⁴ Ku a ku ochax jinu ma khang laxle tüile; ibu a ku zongto chisang angkya hünlit ang achangle tüile.

⁵ Chemthüikoxle ku a ongat ang chang koxle, ku makchakbue tsütle tamchu shanle pao ang tomle.

⁶ Ku mongkat ochax lom to kakya khoma, ku a thule akhündaoa; ku a nyixtungtale mongmaxle sop.

⁷ Tsangtsa khamle kakkya füi ku a zokle ngole ilaxle ku a zik hato soxle hüingole.

⁸ Ku a shanle changdaoa ilaxle bakle thule akhündaoa; ku ang mongthang ngole, tsütle kakkyae ku wotpu.

⁹ O Jowanpa, kue chem sungpuix ija nange awan ngopu; ku wotle akhongkya nange pangnu atatpu.

¹⁰ Ku ang khax atukle, ku zong a bakdaoa; ku mikbu angkya ngün angkya zong ashukdaoa.

¹¹ Ku zuikhui hia tomzibu ku hato chinguiüi, chemthüikoxle ku a mak-chak füi awangle tüile; ku kakobue ngaxchu ku hato sox ang anule.

¹² Ku langle awüt-sele tsukyabue ku aman ang tsünle, üntoxle ku to mak-kha sele tsukyabue ku fün ama angkya aza-anale; hwome ku to tungkya ojao münzak.

¹³ Ku a tuita naba mix ningle ilaxle kue atat ang chitho, akax ang chithole tuita kax-ux mix ningle.

¹⁴ Hwome atat ang chitsuakkya khoma ojao kax to chilankyabu ningle, ku.

¹⁵ Ikoxlechu O Jowanpa, kue nang to ongpu; üntoxle, O Jowanpa ku Zang, nange ku kax to lanüi.

¹⁶ Ku shoma khoma ku zangpabue chanyile wanjaikya tüi ang taxtom; kue chithole changkya bama hwom tsaichong-kaxbongkya tüi ang taxtom!

¹⁷ Ku a nguaküi khakha ilaxle ku to tsütle kakkya ojao chizak.

¹⁸ Kue ku ochaxbu ngaipu; ibue ku mongkha künsum-mongtuie awang ang tom.

¹⁹ Ku zanpabu a tsangtsa fanmüile tamchu otsak-ozong füi tüile; ngat-saxsaxle ku to miktsakle ngokyabu huanuma tüile.

²⁰ Opange müikya to oma füi olüix khomle tüipuix ibu a ku füi apüile tüile büthüikoxle kue sukyakya mok ang azong koxa.

²¹ Ku danle taxtox, O Jowanpa; ku füi atsaile sütaxngo, ku Zang!

²² Athax ku to fongfa hüi, O Jowanpa ku khosünpa!