MÜNCHUAK-TSAI 37 - OTSAO BAIBEL (BSI)

Chichangchizangkya hia Müikya Khünakbu Lomshuk

¹ Chichangchizangkyabu khoma hexle nang taxaban; othai mwot mokkyabu to zalole taxchang.

² Hingzang ozan lailaile hwom a lebama wüi samünüi; hwom a pün zanle zikya ningle zile paoünüi.

³ Jowanpa to mongong thomlax üntoxle müikya moklax; ija haxtok ma azangle ngolax.

⁴ Nange ma mongmüi Jowanpa ma lomlax, nang mong ma atsutsu chixe nang ang faüi.

⁵ Nange ma alüile Jowanpa chak to koxkox; chix to mongkya tüikox, chixe nang to fongüi;

⁶ chixe nang otsao senu zatzong pongkya ningle nyan ang tomüi.

⁷ Adukya tüikox üntoxle Jowanpa mok angkya tanle changkox; ahak-aluale changkyabu hanpakma mong taxthang chichangba hwom ochax mwotbu ma ozalünkya bama taxaban.

⁸ Mong abüt-abankya hia mongtsik mongma ang onüi taxkox; ijae thama hato zunle paoüi wüi.

⁹ Opangsae Jowanpa to mongong thompuix hwome haxtok kopüi, ikoxle chichang-chizangkyabu a jwonle apaoüi.

¹⁰ Chichangchizangkyabu a lebama wüi samünüi; nange hwom lomkoxlax, ikoxlechu hwom a münatak;

¹¹ Ikoxlechu puinaikyabu haxtok kopüi ilaxle mongsom hia okop-olwot ma pwonla dongkya ngünüi.

¹² Chichangchizangkyabu müikya khünakbu to tungle üntoxle miktsak füi hwom chanyi-wanjaile.

¹³ Ikoxlechu chichang-chizangkyabu cha Jowanpa nyile, chemthüikoxle lebama wüi hwom olithudao angkya chixe awanle.

¹⁴ Mixshix zasabu mik amüt angkya hanpakma, tamchu sukya mwot mokkyabu lang angkya hanpakma, chichang-chizangkya khünakbue hwom changlobu syetle üntoxle hapnubu kutle;

¹⁵ Ikoxlechu hwom a ma changlolo fang ma lamüi, ilaxle hwom hapnubu a amale awütüi.

¹⁶ Müikya khünake hidaole wüi koplax ngokya a chichangchizang khünakbu tuina pangwüi athütkya füi ngaxchu okho,

¹⁷ chemthüikoxle Jowanpa chichang-chizangkya khünakbu tsak-zong pao angkya changle, ikoxlechu müikya khünakbu a chixe kho-awale kopüi.

¹⁸ Chix kax ma laxle tüikyabu to Jowanpa humele, ilaxle ija haxtok a othuithuima hwom kux ang changüi.

¹⁹ Tuma-wanshix pongma hwom ang sik mün-ngünüi; tuinu nuaknu lepongma hwom okhonguile ahak-achakle ngoüi.

²⁰ Ikoxlechu chichang-chizangkyabu a zile paoüi; Jowanpa zongto zanpabu a fao maipua huimaxkya ningle samle paoüi; wünkhut lailaile hwom amuale samüi.

²¹ Chichangchizangkya khünakbue thashe laxle apüile ikoxlechu chemtuechu ija chiachat, ikoxle müikya khünakbu a hwom hinghobu mongtsutsule ahan-achei lelaxle.

²² Opang to Jowanpa mohimanle changpuix, chaxwan a hwom kux ang changüi, ikoxlechu opang to thuakzomle changpuix ibu a jwonle asamüi.

²³ Kem le angkya lomtang ma Jowanpa kem lomzunle üntoxle chix mong amüikyabu chixe khosele kople.

²⁴ Hwom ati koxlechu, hwom ikhama nguakle münngoüi, chemthüikoxle hwom zole ajong ang Jowanpa asun angkya changle.

²⁵ Athax ku azudaoa, ku tsünlole ngole hüidaoa, ikoxlechu ibibi bama kue müikya khünakbu Jowanpa ahaile awütkya münngüntox chichangba hwom su-sabue jusax ang ahamkya münngüntox.

²⁶ Othuithuima hwome mix ang amuamuale kox-zunle changle, ilaxle hwom su-sabu a mohiman ang achangle.

²⁷ Ochax füi atsai laxle müikya mwot moklax, jangchangba nang sixlibu haxtok ma othuithuima ngoüi;

²⁸ chemthüikoxle chem supuix ija to Jowanpa mongkünle ilaxle chix to mongong thomkya khünakbu chixe danle müntox. Jento chixe hwom khosele, ikoxlechu chichang-chizangkya su-sabu a jwonle apaoüi.

²⁹ Otsao khünakbue haxtok kopüi ilaxle ikhama jento ngoüi.

³⁰ Khünak müikyabu zangwün ma je tüile, üntoxle ibu a othuithuima sukya changle.

³¹ Hwome hwom Zang wanlombu hwom mongkha ma thomle ilaxle ija füi chemtuechu atsaile münpao.

³² Chichangchizangkya khünakbue müikya khünakbu to tan ngole üntoxle hwom ang lang ang azongle;

³³ Ikoxlechu Jowanpae ibu a hwom zanpabu tsak-zong chak to mündanüi chichangba kaxfün laxpongma hwom thajao ang münchang.

³⁴ Nang monghom Jowanpa ma thomlax ilaxle chix kaxtombu kax ma laxlax; hünzom ang haxtok koxle chixe hünzom achuak-achenle changüi, üntoxle chichang-chizangkya khünakbu jwonle apaokya hünzome ngün ang kopüi.

³⁵ Hanpak tuita ma, chichang-chizangkya khünak tuita owa zadünkya mix changkya hex, kue chix tsingle ngokya; chix a pangnu to akaile Lebanon haxnu angkya sedar pünnulailaile tüikya.

³⁶ Ikoxle ofüima ku imakhange le, ikoxle chix ikhama chibang;

³⁷ Müikya hia otsao khünakbu to hulax; somdangkya khünakbu ang sixlibu tüile,

³⁸ ikoxle ochax khünakbu a komkaile olithudaoa, ilaxle hwom su-sabu a okothom ang tomle.

³⁹ Jowanpa otsao khünakbu khosünle kople üntoxle thangnak hüipongma chixe hwom kho-awale kople.

⁴⁰ Chixe hwom to fongle üntoxle hwom azünle; chichang-chizangkya khünakbu chak tokya chixe hwom khosünle kople, chemthüikoxle khosün lomle hwom chix hato nguile.