MÜNCHUAK-TSAI 36 - OTSAO BAIBEL (BSI)

Khünaknu Chichangchizangkya

¹ Chichangchizangkyabu füi ochaxe hwom mong othongdua to zangwünle; hwome Zang awütle üntoxle chix chathua zakyajao müntüi.

² Hwome hwom lailai to tüle chuak-chongle thütkya khoma, hwome thütle Zang-e hwom ochax münataküi üntoxle thajaole chang ang müntomüi.

³ Hwom zangwün a chichangchizangle üntoxle thaikyae awangle tüile; oja je mwot hex üntoxle müipuix, ija hwome tam-münmok.

⁴ Hwome azünle lya ma shui laxle ochax mwot-mwot ajangle; hwome mokkya müikya tuita müntüi, üntoxle chem ochax hex ija hwome otuechu münmokpule münthüi.

Zang Müikya

⁵ Jowanpa, chizakkya nang mongküne zangkho to alople; nang ma mongong tüikya zangdingkho to thule tüile.

⁶ Nang otsao a haxnukhobu lailai tsuale; nang sukya a tinu shinthuk jithong büta zule. Khünaknu hia müi-nyax nangkui-nangzang fang ma.

⁷ O Zang, chizakkya nang mongkün chemtukuxkya thalix hex! Kwome nangkui nang baozangbu zangkhung fang ma ziakople ngo ang kople.

⁸ Okhonguikya nange fakya süt füi kwome fongkha pu; nang müikya shuanu angkya ti nange kwom ang aling.

⁹ Nang a khüzün pangwüi otong changle, nang zangngai khomatix kwome zangngai ngünpu.

¹⁰ Opange nang tsingpuix üntoxle otsao khünakbu ang müikya mwot mok ang awanpuix, hwom to chizakle mongkünkox.

¹¹ Ongam füikya khünakbue ku to sing ang taxtom, chichangba chichang-chizangkyabue ku azik le apao ang taxtom.

¹² Ochax khünakbu ojong ma nguakle tüipuix ngünlax. Hwom zo ang chithole ikhama nguakle tüile.