MÜNCHUAK-TSAI 35 - OTSAO BAIBEL (BSI)

Fonghüile Jopkya Zangjop

¹ Jowanpa, ku lomtsyenkyabu lomtsyenkox, üntoxle ku füi azankyabu zan to kakox!

² Nang di hia chang-pax koplax ilaxle ku khose ang nguihüi.

³ Ku sikangünle ngokyabu zongto nang pax hia wabu ahakox. Nange ku khosünle kopüile tsaohüi.

⁴ Ku lang angle tungkyabu hwom to lütkya khoma mongmale naxchang! Ku zan to ka ang tungkyabu anongle chatlaxle khosamle naxchang!

⁵ Hwom a zangwin to jeple paokya tsaxsa ningle naxchang, Jowanpa kaxtaimixe hwom achuale changpongma a!

⁶ Hwom lomtang zangnakle tamchu nünle naxchang Jowanpa kaxtaimixe hwom to hongle changpongma a!

⁷ Chemtsai-chemkax chitüikya khato hwome ku tsünle üntoxle ku kop ang zudaole tswom thole.

⁸ Ikoxlechu hwome ija awanüi thoto wüi olithukyae hwom lopüi; hwom a hwom tsün ma wüi amanüi ilaxle hwom olithu ang tomüi.

⁹ Ipongma, Jowanpa khoma ku ang mongmüiüi; chixe ku khosünle kopkoxle ku ang mongmüiüi.

¹⁰ Ku mong makhange abakle kue Jowanpa füi akaxle thüiüi: “Nang lailaikya owachu müntüi. Otsak-ozong tüikyabu chak tokya nange tsak-zong chitüikyabu khosün, hwom to afangle thomkyabu chak tokya mixshix-zasabu khosün.”

¹¹ Ochax khünakbue ku ang münmüile kaxkhi kox, kue ngaxchu chitsingkya mikmütbu bama ku ma kaxhuxfe.

¹² Müikya lüixto hwome ku to oma füi jannong alüi, ilaxle ku khosam khato dütle asam.

¹³ Ikoxlechu chemtue hwom kakpuix, kue mangsop nyiwun lax; Kue süt chisax ti chiling; Kue khang akhuxlaxle

¹⁴ ma zuikhui hia matüi manao hwom hanpak bütukuxle zangjop. Ku akungale sople aham, owawa manu hanpakma mang sople changkya tukux a.

¹⁵ Ikoxlechu chemtue ku hato thangnak hüipuix, hwom pangwüi mongmüi, üntoxle ku chanyi-wanjai ang tomle asox; mixnok wünpabue ku to fit üntoxle chizakle ku to chakmok.

¹⁶ Tuita chafai mix chanyikyabu ningle, miktsak makhange hwome ku to khinle hu.

¹⁷ Jowanpa, nange chemtukux hulanle ngoüi? Ibu zansing chaktokya ku azünhüi; ibu mailangbu chaktokya ku khüzün sünle kophüi!

¹⁸ Ifüima kue nang khünaknu tusox ma nang ang münchong faüi; hwom pangnu tunthoma kue nang achuaküi.

¹⁹ Ibu tselop, ku zanpabue, ku to lütkya wanjai ang taxtom. Chemtsai-chemkax chitüi khato ku to miktsakkyabue ku mongma ngünlaxle mongmüile wanjaikya tüi ang taxtom.

²⁰ Hwome kaxmüi zangjao münwün; itülüi mongsom to mongkünkya khünakbu hanpakma hwome khualop zangwün oli pangwüi alaile.

²¹ Hwome ku ma kaxhux fele akhong, “Nange mokkya kwome ngündaoa!”

²² Idaile Jowanpa, nang taxdang; nang ochu to taxngo!

²³ O Jowanpa, nang ajong üntoxle ku khose hüi; ajonglax, ku Zang, üntoxle ku zangwün tsaitong-kaxza bama chingcha juhüi.

²⁴ O Jowanpa, nang a otsao changle, idaile nange ku a chemmün chiawankya changle le ngaohüi; ku zanpabue ku chanyi-wanjaile chang ang taxtom.

²⁵ “Chix chitüikya müidaoa! Kwome ija lomwüi!” le hwom lualua to zangwün ang taxtom.

²⁶ Ku sikngün to chanyi wanjaile changkyabu hwom to lüt üntoxle kho asamle changkox; ku füi hwom wüi sümüikyabu changpule akaxkyabu to zakkop hia thajaoe chwop ang tomkox.

²⁷ Ku sukya ang achangle ngünse tsukyabu mongmüi laxle hwom chatchatnaole, “Jowanpa a chemtukux chongpuix! Chix dapae tho-lünkya to chix ang mongmüile”, le akhong ang tomkox.

²⁸ Ipongma kue nang otsao khuapuüi, üntoxle han ahomle kue nang achuaküi.