MÜNCHUAK-TSAI 33 - OTSAO BAIBEL (BSI)

Achuakle Ngaokya Tsai Tuita

¹ Hünzom otsao khünakbu pangwüi, Jowanpae mokle tsuakdaokya bama mongmüi to akhongkox; chix achuak kox, hünzom chix kax ma laxle tüikya pangnusae.

² Khopsyabu akhaole Jowanpa ang münchong fakox, chix hanpakma zu füi zingkya waxmaibu füi tsai ngaokox.

³ Chix ang tsaizün tuita ngaokox, man wüi manle waxmai hongkox, üntoxle mongmüi to akhongkox!

⁴ Jowanpa kaxngaobu a otsingtsing changle, üntoxle chix mwot pangnusa wüi chalomlule tüile.

⁵ Oja otsao tamchu sukya changpuix, ija to Jowanpae mongkünle; tamchu chithwonkya chix mongküne chaxwannu awangle.

⁶ Jowanpae zangkhobu chix kaxtom füi zingle alaipu, chix kaxbu füi zanghan hia lyetnu üntoxle lyettsibu zingle alaipu.

⁷ Tinu shinthuk pangwüi chixe jongta khama asox ang tompu; Molo-Tinu jithongbu chixe pungma hakle thompu.

⁸ Jowanpa achuak kox, chaxwannu pangnue! Chix achuak-achenkox, zangfang angkya khünaknu pangnusae!

⁹ Chixe zangwün pongma, chaxwannu zingle alaipu; chix kaxtom ma pangnusa laipu.

¹⁰ Jowanpa ang chaxwannu nok mongtexbu füi mongzom chimüi; chixe hwom katzuabu mokle le ang chitom.

¹¹ Ikoxlechu chix katzua a othuithuima ngopu; chix mongtex ma oshuk tamchitüi.

¹² Jowanpa hwom Zang ang ngole tüikya haxtok a mongmüi haxtok changle; chixe ma khünak ang kamle kopkyabu a mongmüi mixbu changle!

¹³ Jowanpae zangkangting tokhange asongle hule üntoxle khünaknu kem pangwüi ngünle.

¹⁴ Chaxwannu ma ngokya pangnusa to chixe apün-awangle ngokya onui makhange asongle hule.

¹⁵ Hwom tutex pangwüi chixe zingle koxle ilaxle hwom mwot pangwüi chixe tsingle ngole.

¹⁶ Wanghompa tuitae chix süpahi janzüi füi lütkya chichang; süpahi tuitae chix janzüi füi zan to anaokya chichang.

¹⁷ Zan to lüt angkya hanpakma zankat manbue chem-mwot chithap; hwom ma tüikya chongkya tsak-zonge sün ang chitsuak.

¹⁸ Chix kax ma laxle tüikya pangnusa to Jowanpae hule nyengo, tamchu chithwonkya chix mongkün to mongong tüikyabu to a.

¹⁹ Ozik-omüt chak tokya chixe hwom khosünle kop; nuaknu lepongma chixe hwom ozün ma ngo ang tom.

²⁰ Kwome kwom mongong Jowanpa ma thompu; chix a kwom ziakopmix tamchu fongle fapupa changle.

²¹ Chix khokho ma kwom ang mongmüipu; chix otsao mün to kwome mongongpu.

²² Kwome kwom monghom nang ma thomponge, Jowanpa, ojao chithwonkya nang mongkün kwom füi ngo ang tomhüi.