MÜNCHUAK-TSAI 32 - OTSAO BAIBEL (BSI)

Ochax Ngaikya üntoxle Thailak Kopkya

¹ Opange ochax thailak atakdao laxpuix hwom a mongmüi mixbu changpu, hwom thaikyabu pangwüi alakdaoa.

² Thaikya mwot mokdaoale Jowanpae huxfekya chitüikya mix, tamchu tsetselople chitüikya khünak mohiman.

³ Chemtue kue ku ochax thailak jukya chitüipuix, ku a nyixtung nyixtungle sopkyae künmax-mongshanle tüikya.

⁴ Jowanpa, nange zangnak zangngai ku to sikangün; tsonu zangkhame nyenti azuale awütkya lailaile, ku janzüi a komkaile azandaoa. Selah

⁵ Ipongma kue ku ochax nang hama ngai; kue thaile mokdaokya ku mwotbu pyenle chithom. Selah

⁶ Ikhoma nang kax ma laxle khünak pangnue lom pongma nang to jop angkya changle; tichen lailaile hüikya thangnak tuitae hwom ha alople chichang angkya hanpakma a.

⁷ Nang a ku azwon nui changpu; thangnak tuitai tokya ku kho nangetix sünüi. Nang khosün achuakle ku akhongle ngaopu, chemthüikoxle nange ku ziakoppu. Selah

⁸ Jowanpae thüi: “Nang le angkya lomtang kue apua faüi; ilaxle kue nang ang adangle faüi.

⁹ Man hia mantsak ningle ongat ang taxchang, ibu to a kax ma laxle tüi angkya hanpakma fitle hia wikha ma danglang shole akumathum angkya laile.”

¹⁰ Chichangchizangkya khünakbu a sikngün angkya changle, ikoxlechu Jowanpa to mongong tüikyabu, chithwonkya chix mongkün füi ziakople thomüi.

¹¹ Hünzom otsaobu pwonlatungle mongmüikox, Jowanpae tsuakdaokya hünzom mwot bama a. Hünzom chix kax ma laxle tüikyabu, mongmüi to akhongkox.